Bhavnagar,તા.૨૫
આધુનિકતા અને ડિજિટલાઈઝેશનના આ યુગમાં સંસ્કારી નગરી ભાવનગર અને સમગ્ર જિલ્લો સાયબર અપરાધીઓના રડાર પર આવી ગયો છે. શાતિર સાયબર માફિયાઓએ અચાનક સાયબર એટેક કરીને ભાવનગર શહેર અને જિલ્લાના અલગ-અલગ વિસ્તારોમાંથી કુલ ૯ નાગરિકો પાસેથી રૂ. ૧૩,૭૪,૫૯૯ ની માતબર રકમ સફાચટ કરી નાખી છે. નકલી એપ્લિકેશન, બેંક કેવાયસી, પાર્ટ ટાઈમ જોબ, ઓનલાઈન ટાસ્ક અને શેરબજારમાં રોકાણ જેવી લોભામણી લાલચો આપીને ગઠિયાઓએ નાગરિકોને શિકાર બનાવ્યા છે.
બોરતળાવના હીરાકામ કરતા ભાવેશભાઈ કિકાણી ઇન્સ્ટાગ્રામ પર ફ્રી મેચ જોવા માટે એજીટીવી’ નામની એપીકે ફાઈલ ડાઉનલોડ કરતાં જ તેમનો મોબાઈલ હેક થઈ ગયો હતો અને ૪ બેંક ખાતાઓમાંથી રૂ. ૯૪,૪૦૦ ઉપડી ગયા હતા.
નવી વિઠ્ઠલવાડીના મજૂરી કામ કરતા દીપકભાઈ ચૌહાણને વોટ્સએપ પર બેંક ઓફ ઈન્ડિયાની નકલી કેવાયસી લિંક મોકલી મોબાઈલ હેક કરી રૂ. ૫૦,૦૦૦ ઉપાડી લેવાયા હતા.
સિદસર રોડના ૭૪ વર્ષીય નિવૃત્ત વૃદ્ધ ઉપેન્દ્રભાઈ ઓઝાએ ટાઈલ્સ ખરીદતી વખતે સરનામું કન્ફર્મ કરવા ગૂગલ પરથી મેળવેલા કસ્ટમર કેર નંબર પર સંપર્ક કરતાં, ઠગે ફાઈલ ડાઉનલોડ કરાવી ગુગલ પે મારફતે રૂ. ૫૦,૦૦૦ ટ્રાન્સફર કરી લીધા હતા.
વિના આટીપી-લિંકે ખાતામાંથી પૈસા ગાયબઃ
ઇસ્કોન મેગાસિટીના વેપારી કિરીટકુમાર પટેલના બેંક ખાતામાંથી કોઈપણ ઓટીપી કે લિંક વગર યુપીઆઇ મારફતે રૂ. ૧.૨૦ લાખ ઉપડી ગયા હતા.
સુભાષનગરના બુધાભાઈ વાળાને એસબીઆઇના બ્રાંચ મેનેજર તરીકે ઓળખ આપી જૂના સિક્કા ખરીદવાની લાલચ આપી ક્યૂઆર કોડ મારફતે રૂ. ૮૭,૬૯૯ મેળવી લેવાયા હતા.
સુભાષનગરના ચિંતનભાઈ રાવળને શેરબજારમાં ઊંચા વળતરની લાલચ આપી ‘ધનલાઈટ’ કંપનીના નામે ડીમેટ એકાઉન્ટ ખોલાવી રૂ. ૧,૩૪,૫૦૦ જમા કરાવી છેતરપિંડી આચરાઈ હતી.
રૂવાપરી રોડની અક્સાબેન શેખે યુટ્યુબ રીલ્સ પર ડ્રેસની જાહેરાત જોઈ સંપર્ક કરતાં, ક્યૂઆર કોડ મારફતે ટુકડે-ટુકડે રૂ. ૧,૨૬,૭૧૮ ઉપાડી લેવાયા હતા.
સિહોરના ગુંદાળા ગામના હરદેવભાઈ ખેર નામના વેપારી પાસેથી આસામના સોપારી એજન્ટ મહેશ્વર મોહિત રોયે રૂ. ૪,૨૦,૦૦૦ ઓનલાઈન ટ્રાન્સફર કરાવી સોપારી મોકલ્યા વિના છેતરપિંડી કરી હતી.
મહુવાના સથરા ગામના અર્જુનસિંહ વાળા પાસે ભોપાલમાં ઓફિસ હોવાનું કહી કોર્સ સર્ટિફિકેટ આપવાના નામે મોહમદ અન્સાર નામના શખ્સે રૂ. ૨,૯૨,૦૦૦ ટ્રાન્સફર કરાવી લીધા હતા.
ભાવનગર સાયબર ક્રાઈમ સેલ અને ટેકનિકલ ટીમોએ બેંક ખાતાઓ ફ્રીઝ કરવા અને આઇપી એડ્રેસ તથા સીડીઆર આધારે તપાસ તેજ કરી છે. સાયબર ક્રાઈમ સેલના પીઆઇ ચૌધરીએ નાગરિકોને અપીલ કરી છે કે નવરાત્રિ નજીક આવતાં ગરબા પાર્ટનર કે અન્ય પેકેજીસના નામે આવતી અજાણી લિંક્સ પર ક્લિક ન કરવું અને કોઈપણ સાયબર ફ્રોડ થાય તો તુરંત ૧૯૩૦ હેલ્પલાઈન પર સંપર્ક કરવો.
