Surendaranagar, તા.27
ચોટીલા હાઇવે બસ સ્ટેન્ડ પર કાયદો અને વ્યવસ્થાની સ્થિતિ સામે સવાલો ઉભા થયા છે. અહીં બસ સ્ટેન્ડની અંદર બે વ્યક્તિઓ નશાની હાલતમાં જોવા મળ્યા હતા, જેના કારણે સવારના સમયે મુસાફરો અને યાત્રાળુઓને ભારે મુશ્કેલીનો સામનો કરવો પડ્યો હતો.
સવારના સમયે મુસાફરોની અવરજવર વધી રહી હતી ત્યારે આ બંને નશામાં ધૂત શખ્સો બસ સ્ટેન્ડની અંદર જ આડા પડ્યા હતા. આખરે કંટાળેલા મુસાફરો અને સ્થાનિક લોકોએ તેમને બસ સ્ટેન્ડની બહાર કાઢ્યા હતા.
જાહેરમાં દારૂનું સેવન કરીને આવા તત્વો દ્વારા જાહેર સ્થળોનો માહોલ બગાડવામાં આવી રહ્યો છે. નોંધનીય છે કે આ હાઇવે બસ સ્ટેન્ડની નજીકમાં જ પોલીસ ચોકી આવેલી છે. પોલીસ ચોકી નજીક હોવા છતાં બસ સ્ટેન્ડમાં અવારનવાર આવા અસામાજિક તત્વોનો જમાવડો જોવા મળે છે. આના કારણે ચોટીલા દર્શનાર્થે આવતા હજારો દર્શનાર્થીઓ અને મહિલા મુસાફરોમાં અસુરક્ષાની લાગણી વ્યાપી છે.
જાહેરમાં દારૂનું વેચાણ અને દારૂડિયાઓનો અડ્ડો બની ગયેલા બસ સ્ટેન્ડને લઈને સ્થાનિક લોકોમાં ભારે રોષ છે. પોલીસ ચોકી નજીક હોવા છતાં પોલીસની નિષ્ક્રિયતા સામે સવાલો ઉઠી રહ્યા છે. સ્થાનિક રહીશો અને મુસાફરો પોલીસની કામગીરી પર શંકા વ્યક્ત કરી રહ્યા છે.
લોકોએ માગ કરી છે કે બસ સ્ટેન્ડ વિસ્તારમાં કડક પેટ્રોલિંગ કરવામાં આવે અને ખુલ્લેઆમ દારૂ વેચતા તથા પીનારા તત્વો સામે તાત્કાલિક ધોરણે સખત કાર્યવાહી કરવામાં આવે.
