New Delhi, તા.11
અલ્ફાબેટની માલિકીની કંપની ગૂગલ ક્લાઉડે મંગળવારે માહિતી આપી હતી કે ભારતમાં તેના કેટલાક યુઝર્સએ ઇન્ટરનેટ સેવાઓમાં અવરોધનો સામનો કરવો પડ્યો હતો. આ સમસ્યા એક ડેટા સેન્ટરમાં આગ લાગવાના બનાવને કારણે સર્જાઈ હતી, જેના પગલે સુરક્ષાના ભાગરૂપે ટેક્નિકલ સાધનો બંધ કરવા પડ્યા હતા.
કંપનીના જણાવ્યા અનુસાર, આગ લાગતા જ ડેટા સેન્ટરની વીજ પુરવઠા વ્યવસ્થા તાત્કાલિક બંધ કરવી પડી હતી. પરિણામે, દિલ્હીમાં આવેલું સ્થાનિક કનેક્ટિવિટી કેન્દ્ર સંપૂર્ણપણે અલગ પડી ગયું અને સમગ્ર મહાનગર વિસ્તારમાં નેટવર્ક ક્ષમતામાં નોંધપાત્ર ઘટાડો નોંધાયો હતો. જોકે, આગ ક્યારે લાગી અને તેનાથી કેટલું નુકસાન થયું તે અંગે કંપનીએ કોઈ વિગતો જાહેર કરી નથી.
આ ઘટનાની અસર દિલ્હી, મુંબઈ, ચેન્નાઈ અને આસપાસના વિસ્તારોમાં જોવા મળી હતી, જ્યાં ઇન્ટરનેટની ગતિમાં નોંધપાત્ર ઘટાડો થયો હતો. આવી ટેક્નિકલ ખામીઓને કારણે વિવિધ વ્યવસાયો તેમજ ગ્રાહકો દ્વારા ઉપયોગમાં લેવાતી એપ્લિકેશન્સ, વેબસાઇટ્સ અને આંતરિક ડિજિટલ સિસ્ટમોની કામગીરી પણ ધીમી પડી ગઈ હતી.ગૂગલ ક્લાઉડે જણાવ્યું હતું કે, હાલ આ સમસ્યાનો કોઈ વૈકલ્પિક ઉપાય ઉપલબ્ધ નથી અને સેવાઓને સંપૂર્ણપણે પુનઃસ્થાપિત કરવા માટે સતત પ્રયાસો કરવામાં આવી રહ્યા છે.
