અચાનક પવનનું એક પ્રચંડ ઝાપટું આવ્યું અને જમીન પરથી ધૂળનો મોટો વંટોળ આકાશ તરફ જવા લાગ્યો હતા
(સંપૂર્ણ સમાચાર સેવા)
Tamil Nadu, તા.૨૨
તમિલનાડુના તૂથુકુડી જિલ્લામાં રવિવારે સાંજે એક અત્યંત ડરામણી અને દુર્લભ ઘટના સામે આવતા સ્થાનિક લોકોમાં ભારે ફફડાટ ફેલાયો છે. આકાશમાં ધૂળ અને વાદળોનો એક વિશાળ ઘુમાવદાર સ્તંભ જોવા મળ્યો હતો. જે હૂબહૂ અમેરિકામાં આવતા વિનાશક ટોર્નેડો જેવો લાગતો હતો. આ તીવ્ર વાવાઝોડાના કારણે અનેક ઘરો, દુકાનો, ટોલ પ્લાઝા અને એક ખાનગી થીમ પાર્કને મોટું નુકસાન પહોંચ્યું છે. જ્યારે ૬ લોકો ઇજાગ્રસ્ત થતાં તેમને હોસ્પિટલમાં દાખલ કરાયા છે. જો કે, ભારતીય હવામાન વિભાગ (ૈંસ્ડ્ઢ) ના સત્તાવાર અહેવાલ મુજબ આ વાસ્તવિક ટોર્નેડો નહોતો, પરંતુ કમ્યુલોનિમ્બસ વાદળોની સિસ્ટમ સાથે જોડાયેલો એક શક્તિશાળી થંડરસ્ટોર્મ અપડ્રાફ્ટ હતો.
આ ઘટનાની વિગતવાર માહિતી અનુસાર, તૂથુકુડી જિલ્લામાં સાંજના સમયે અચાનક વાતાવરણ પલટાયું હતું અને ભારે આંધી સાથે તીવ્ર વરસાદ શરૂ થયો હતો. સ્થાનિક પ્રત્યક્ષદર્શીઓએ જણાવ્યું કે અચાનક પવનનું એક પ્રચંડ ઝાપટું આવ્યું અને જમીન પરથી ધૂળનો મોટો વંટોળ આકાશ તરફ જવા લાગ્યો હતો. આ વાવાઝોડાના માર્ગમાં આવતી તમામ વસ્તુઓ ઉડી ગઈ હતી. અનેક મકાનોના છાપરા અને પતરાં હવામાં ઉડી ગયા હતા, રોડ પરના વીજળીના થાંભલા નમી પડ્યા હતા અને સ્થાનિક થીમ પાર્ક તેમજ ટોલ પ્લાઝાને વ્યાપક નુકસાન થયું હતું. સોશિયલ મીડિયા પર આ ભયાનક દ્રશ્યોના વીડિયો પણ ખૂબ વાયરલ થઈ રહ્યા છે.
હવામાન વિભાગના જણાવ્યા અનુસાર, આ વિસ્તારમાં સર્જાયેલા સાયક્લોનિક સર્ક્યુલેશન અને સ્થાનિક ગરમીના કારણે આ તીવ્ર વાવાઝોડું ઉત્પન્ન થયું હતું. કમ્યુલોનિમ્બસ વાદળો જમીનથી ૩ કિલોમીટરથી લઈને ૧૮ કિલોમીટરની ઊંચાઈ સુધી બની શકે છે અને તેમાં ઉપરની તરફ હવાનો પ્રવાહ (જેને અપડ્રાફ્ટ કહે છે) અત્યંત વેગીલો હોય છે. આ શક્તિશાળી અપડ્રાફ્ટે જમીન પરની ઢીલી માટી અને ધૂળને ઉપર તરફ ખેંચી લીધી હતી, જેના કારણે હવામાં ઘુમાવદાર ખંભા જેવી આકૃતિ બની ગઈ હતી અને તે ડસ્ટ ડેવિલ કે સેન્ડ સ્પાઉટ જેવો નજારો આપતી હતી.
હવામાન વૈજ્ઞાનિક વીઆર દુરઈએ સ્પષ્ટ કર્યું છે કે ટોર્નેડો એક અત્યંત શક્તિશાળી અને ફરતો હવાનો સ્તંભ છે જે સુપરસેલ વાદળોથી જમીન સુધી જોડાયેલો હોય છે અને તેની ગતિ ૩૦૦ કિલોમીટર પ્રતિ કલાક કે તેથી વધુ હોઈ શકે છે. તેની સરખામણીએ થંડરસ્ટોર્મ અપડ્રાફ્ટ ઓછો શક્તિશાળી હોય છે, જે વાદળમાં ભેજ અને ગરમ હવાને ઉપર લઈ જાય છે અને તેનો પ્રવાહ ૧૦૦ કિલોમીટર પ્રતિ કલાક આસપાસ હોઈ શકે છે.
ભારતમાં ભૌગોલિક સ્થિતિ અને ચોમાસાની પેટર્નના કારણે સાચા ટોર્નેડો આવવા ખૂબ મુશ્કેલ છે, પરંતુ ગ્લોબલ વોર્મિંગ અને ક્લાયમેટ ચેન્જના કારણે હવે આવા શક્તિશાળી સ્થાનિક તોફાનોની તીવ્રતા સતત વધી રહી છે.
