Jamnagar તા.21
જામનગર મહાનગરપાલિકાની ચૂંટણીમાં પ્રચારકાર્ય જોર પકડી રહ્યું છે ત્યારે છેલ્લા ત્રણ દાયકાથી શાસનમાં રહેલ ભાજપના શહેર પ્રમુખ સહિતના નેતાઓએ સત્તાના
મદમાં અને વ્યક્તિગત ગમા-અણગમાને ધ્યાનમાં રાખીને ઉમેદવારોની કરેલી પસંદગી સામે અંદરખાને ભાજપના જ કાર્યકરોમાં અસંતોષનો ઉકળતો ચરૂ ભાજપે મતદાનમાં અમુક વોર્ડમાં દઝાડે તેવી સ્થિતિ જોવા મળી રહી છે.
જામનગર મહાનગરપાલિકાની અંદર 1995 થી ભાજપનું શાસન રહ્યું છે. ખાસ કરીને ગત્ ટર્મથી વાત કરીએ તો કુલ 64 બેઠકમાંથી ભાજપ 50 બેઠક જીત્યું હતું. ગત્ વખતે શહેર ભાજપ સંગઠ્ઠન પાંખ અને ધારાસભ્ય અને સાંસદ સહિતના સ્થાનિક નેતાઓ વચ્ચે પુરતું સંકલન હોવાથી ઉમેદવારોની પસંદગીમાં પણ બેલેન્સ જોવા મળ્યું હતું જેના કારણે ભાજપને ઐતિહાસિક જીત સાંપડી હતી. પરંતુ થોડા મહિના પહેલાં શહેર ભાજપની નવી બોડી બનાવવામાં આવી હતી.
આ બોડીમાં શહેર પ્રમુખ બિનાબેન કોઠારીએ અનેક સ્થાનિક નેતાઓની ભલામણો અને સક્ષમ અને પક્ષના વફાદાર કાર્યકરોની અવગણના કરી હતી. પદના મદમાં આવીને જે રીતે સંગઠ્ઠનની રચના કરી અને તે પછી મહાનગરપાલિકાની ચૂંટણી માટે ઉમેદવારોની પસંદગીમાં લાલિયાવાડી કરી તેની અસર હવે ચૂંટણી પ્રચાર દરમિયાન અનેક વોર્ડમાં જોવા મળી રહી છે.
વ્યક્તિગત ગમા-અણગમાના કારણે અનેક સિનિયરોને સાઇડલાઇન કરી દેવાની શહેર પ્રમુખની પ્રવૃત્તિ ભાજપને આ વખતે બેઠકોની સંખ્યામાં ઘટાડો આપે તેવી પણ ભારે શક્યતા ભાજપના જ લોકો અંદરખાને જોઇ રહ્યાં છે.
જે રીતે શહેર ભાજપ પ્રમુખ બિનાબેન કોઠારીએ સ્થાનિક આગેવાનો અને પક્ષને વફાદાર સિનિયર લોકોની બાદબાકી કરી પોતાની જીહજુરી કરનારાને ટીકીટોની લ્હાણી કરી છે તેનાથી અનેક કાર્યકરો સમસમી ઉઠ્યાં છે.
ભૂતકાળમાં ભાજપની વિરૂધ્ધ પ્રવૃત્તિ કરનારાને ટીકીટનો શિરપાંવ આપ્યો છે. અનેક વોર્ડમાં ભાજપના ઉમેદવારોને લોકસંપર્ક દરમિયાન મતદારોનો જોઇએ તેવો પ્રતિસાદ ન મળવા પાછળ ટીકીટની મનસ્વી ફાળવણી જવાબદાર હોવાનું પણ લોકમુખે ચર્ચાય છે.
એવું પણ કહેવાય છે કે, શહેર ભાજપ પ્રમુખ દ્વારા અમુક ટીકીટ માટે પાર્ટીના સિનિયર અને સનિષ્ઠ ઉપરાંત જવાબદાર આગેવાનો અને કાર્યકરોની લાગણી પણ ધ્યાનમાં લીધી નથી. માત્ર શહેર સંગઠ્ઠન ઉપર પોતાનું વર્ચસ્વ સાબિત કરવા માટે ભાજપના ટીકીટ માટેના માપદંડ સાથે પણ બાંધછોડ કરી છે.
અનેક વોર્ડમાં જે તે વોર્ડમાં ન રહેતાં કાર્યકરને ટીકીટની ફાળવણી કરી છે. એટલું જ નહીં જેની સામે કાર્યકરોનો અને મતદારોનો રોષ સ્પષ્ટ હતો તેમ છતાં આવા ઉમેદવારને કોઇ અકળ કારણસર સાચવી લેવાયા છે. અમુક કોન્ટ્રાકટરોને પણ ભાજપના ઉમેદવાર બનાવી દેવાની શહેર ભાજપ પ્રમુખની નીતિરીતી પણ અનેક કાર્યકરોને ગળે ઉતરતી નથી.
