ત્રણ વર્ષથી શારીરિક શોષણ કર્યાનો આક્ષેપ; પોક્સો સહિતની ગંભીર કલમો હેઠળ જામજોધપુર પોલીસની કાર્યવાહી
(નયના દવે દ્વારા)
Jamnagar તા.૧૭
Jamnagar જિલ્લાના જામજોધપુર તાલુકાના એક ગામમાં માનવતાને શરમાવે તેવી ગંભીર ઘટના સામે આવી છે. પોતાની જ પુત્રી પર લાંબા સમય સુધી દુષ્કર્મ આચર્યાના આક્ષેપ સાથે એક પિતા સામે જામજોધપુર પોલીસ મથકે બળાત્કાર અને પોક્સો સહિતની ગંભીર કલમો હેઠળ ગુનો નોંધવામાં આવ્યો છે, જેથી ભારે ચકચાર જાગી છે.
પોલીસ ફરિયાદ મુજબ પીડિતા સગીર વયની હતી ત્યારથી આરોપી પિતા દ્વારા ઘરના અન્ય સભ્યોની ગેરહાજરીમાં ધાકધમકી આપી વારંવાર શારીરિક શોષણ કરવામાં આવતું હતું. ફરિયાદમાં આરોપ મૂકવામાં આવ્યો છે કે છેલ્લા અંદાજે ત્રણ વર્ષથી આરોપી પુત્રી પર દુષ્કર્મ આચરતો હતો.જાણવા મળતી વિગતો મુજબ પીડિતા ત્રણ મહિના અગાઉ જ પુખ્ત વયમાં પ્રવેશી છે. લાંબા સમયથી ચાલતા કથિત શોષણથી કંટાળી અંતે તેણીએ હિંમત દાખવી પોલીસ સમક્ષ ફરિયાદ નોંધાવી હતી.જે ફરિયાદના આધારે જામજોધપુર પોલીસે આરોપી પિતા સામે બળાત્કાર સંબંધિત કલમો ઉપરાંત પીડિતા સગીર વયની હતી તે સમયગાળાને ધ્યાનમાં રાખી પોક્સો (બાળકોને જાતીય ગુનાઓથી રક્ષણ) અધિનિયમ હેઠળ પણ ગુનો નોંધ્યો છે.
બનાવની ગંભીરતાને ધ્યાનમાં રાખી પોલીસે આરોપીની અટકાયત કરી લીધી છે. વધુ પૂછપરછ અને તપાસ માટે આરોપીને કોર્ટમાં રજૂ કરી રિમાન્ડ મેળવવાની કાર્યવાહી હાથ ધરવામાં આવી રહી છે. પોલીસ દ્વારા સમગ્ર મામલે વધુ તપાસ ચાલુ હોવાનું જાણવા મળ્યું છે.
