(નયના દવે દ્વારા)
Jamnagar તા.૧૭
Jamnagar શહેરના સીટી સી વિભાગ વિસ્તારમાં સર્વેલન્સ સ્કોડે બાતમીના આધારે કાર્યવાહી કરી બજાજ મેક્સીમા રીક્ષામાં લઈ જવાતો વિદેશી દારૂનો જથ્થો ઝડપી પાડ્યો હતો. પોલીસે બે શખ્સોની ધરપકડ કરી કુલ રૂ. ૧,૧૨,૨૦૦નો મુદ્દામાલ કબજે કર્યો છે.
Jamnagarના પોલીસ અધિક્ષક ડો. રવિ મોહન સૈનીના માર્ગદર્શન હેઠળ પ્રોહિબિશનના ગુનાઓ શોધવા માટે કાર્યવાહી હાથ ધરવામાં આવી હતી. તે દરમિયાન સીટી સી વિભાગ પોલીસ મથકના પોલીસ નિરીક્ષક એન. બી. ડાભીના માર્ગદર્શન હેઠળ પોલીસ સબ ઇન્સ. વી. એ. પરમાર અને તેમની ટીમ પેટ્રોલિંગમાં હતી.
દરમિયાન પોલીસને બાતમી મળી હતી કે આરવ હાઇટ્સ વિસ્તારમાંથી બજાજ મેક્સીમા રીક્ષા નંબર જીજે-૩૨-યુ-૩૨૧૧ માં વિદેશી દારૂનો જથ્થો લઈ જવાઈ રહ્યો છે. બાતમીના આધારે વોચ ગોઠવી રીક્ષાને અટકાવી તપાસ કરતા તેમાંથી ભારતીય બનાવટના વિદેશી દારૂના ૨૨૪ ચપટા નંગ કિંમત રૂ. ૬૭,૨૦૦ મળી આવ્યા હતા.પોલીસે દારૂ ઉપરાંત એક મોબાઇલ ફોન કિંમત રૂ. ૫,૦૦૦ અને રીક્ષા કિંમત રૂ. ૪૦,૦૦૦ મળી કુલ રૂ. ૧,૧૨,૨૦૦નો મુદ્દામાલ કબજે કર્યો હતો.
આ કેસમાં પોલીસે સાગર કમલભાઈ વઢીયાર (ઉંમર ૧૮) અને લક્ષ્મણ શેરસિંહ માલપરા (ઉંમર ૧૮), બંને રહે. બાવરીવાસ, જામનગરની ધરપકડ કરી છે. જ્યારે દિપુ કમલભાઈ વઢીયાર અને બિપીન ઉર્ફે લાકડી કારાભાઈ મુછડીયા ફરાર હોવાનું જાણવા મળ્યું છે. તેમની શોધખોળ હાથ ધરવામાં આવી છે.આ અંગે પોલીસ હેડ કોન્સ્ટેબલ ખીમશીભાઈ ગોવિંદભાઈ ડાંગરે ફરિયાદ નોંધાવી છે. સમગ્ર કાર્યવાહી પી.એસ.આઈ. વી. એ. પરમાર તથા સર્વેલન્સ સ્કોડની ટીમે સફળતાપૂર્વક પાર પાડી હતી.
