જામનગર-દેવભૂમિ દ્વારકામાં ૩૪૭ ટીમોની કાર્યવાહી, એક જ દિવસમાં રૂ.૯૩૪.૭૫ લાખની વસૂલાત
(નયના દવે દ્વારા)
Jamnagar તા.૩૦ઃ
જામનગર અને દેવભૂમિ દ્વારકા જિલ્લામાં પીજીવીસીએલ દ્વારા બાકી વીજબીલની વસૂલાત માટે મેગા ડિસકનેક્શન ડ્રાઇવ યોજવામાં આવી હતી. બંને જિલ્લાના ૫૪,૦૮૦ ગ્રાહકો પાસેથી અંદાજે રૂ.૨૩ કરોડની બાકી રકમ વસૂલવા હાથ ધરાયેલી કાર્યવાહીમાં ૩૪૭ ટીમો મેદાનમાં ઉતારવામાં આવી હતી. એક જ દિવસની કામગીરી દરમિયાન કુલ ૮,૯૦૪ ગ્રાહકોના કનેક્શન ડિસકનેક્શન માટે મૂકવામાં આવ્યા હતા, જેમાંથી ૨,૦૩૬ કનેક્શન વાસ્તવમાં કાપી નાખવામાં આવ્યા હતા.
ડિસકનેક્શન પૂર્વે જ ૩,૪૫૬ ગ્રાહકોએ બાકી વીજબીલની રકમ ભરપાઈ કરી હતી. આમ, કુલ ૫,૪૯૨ ગ્રાહકો સામે કાર્યવાહી હાથ ધરી રૂ.૭૦૩.૬૮ લાખની બાકી રકમ આવરી લેવામાં આવી હતી. જ્યારે ડિસકનેક્શન બાદ રીકનેક્શન માટે ૧,૫૭૮ ગ્રાહકોએ રૂ.૨.૯૦ લાખ ચાર્જ સહિત રૂ.૧૮૫.૪૩ લાખની ભરપાઈ કરી હતી.
વીજ તંત્રની આ મેગા ડ્રાઇવ દરમિયાન એલટી એનર્જી કલેક્શન થકી રૂ.૫૯૩.૭૪ લાખ તથા ઓનલાઈન કલેક્શન થકી રૂ.૩૪૧.૦૧ લાખ મળી કુલ રૂ.૯૩૪.૭૫ લાખની વસૂલાત કરવામાં આવી હોવાનું જણાવાયું છે.
ડિવિઝનવાર કાર્યવાહીઃ
સિટી-૧ ડિવિઝનમાં ૪૬ ટીમોએ ૧,૩૨૨ કનેક્શન સામે કાર્યવાહી કરી હતી, જેમાં ૩૬૩ કનેક્શન કાપવામાં આવ્યા હતા અને રૂ.૧૬૧.૬૫ લાખની વસૂલાત થઈ હતી.
સિટી-૨ ડિવિઝનમાં ૬૨ ટીમોએ ૧,૬૮૫ કનેક્શન સામે કાર્યવાહી કરી ૨૬૪ કનેક્શન કાપ્યા હતા અને રૂ.૩૩૮.૫૩ લાખની વસૂલાત કરી હતી.
ગ્રામ્ય ડિવિઝનમાં ૮૦ ટીમોએ ૧,૬૩૨ કનેક્શન સામે કાર્યવાહી કરી ૩૪૨ કનેક્શન કાપ્યા હતા અને રૂ.૧૧૧.૯૮ લાખની વસૂલાત થઈ હતી.
જામજોધપુર ડિવિઝનમાં ૫૦ ટીમોએ ૧,૧૭૬ કનેક્શન સામે કાર્યવાહી કરી ૪૩૯ કનેક્શન કાપ્યા હતા અને રૂ.૭૫.૬૪ લાખની વસૂલાત કરી હતી.
ખંભાળિયા ડિવિઝનમાં ૫૩ ટીમોએ ૧,૫૫૦ કનેક્શન સામે કાર્યવાહી કરી ૩૧૯ કનેક્શન કાપ્યા હતા અને રૂ.૧૧૭.૨૬ લાખની વસૂલાત કરી હતી.
દ્વારકા ડિવિઝનમાં ૫૬ ટીમોએ ૧,૫૩૯ કનેક્શન સામે કાર્યવાહી કરી ૩૦૯ કનેક્શન કાપ્યા હતા અને રૂ.૧૨૯.૭૦ લાખની વસૂલાત કરવામાં આવી હતી.
