Kolkata, તા.9
કોલકાતા ખાતે આવેલા ઐતિહાસિક ઇડન ગાર્ડન્સ મેદાન પર સોમવારે રમાયેલી IPL 2026 ની 12મી મેચમાં એક રસપ્રદ દ્રશ્ય જોવા મળ્યું. કોલકાતા નાઈટ રાઇડર્સ અને પંજાબ કિંગ્સ વચ્ચેની આ હાઇ-વોલ્ટેજ મેચ દરમિયાન KKR ના સહ-માલિક અને બોલિવૂડ સુપરસ્ટાર શાહરૂખ ખાન સ્ટેન્ડમાં હાજર હતા.
મેચની શરૂઆત કોલકાતા માટે બિલકુલ અનુકૂળ રહી નહોતી. ટોસ જીતીને પહેલા બેટિંગ કરવાનો નિર્ણય લીધા પછી ટીમે માત્ર બીજી જ ઓવરમાં બે મહત્વપૂર્ણ વિકેટ ગુમાવી દીધી. ફિન એલન (6) અને કેમેરોન ગ્રીન (4) ઓછા રને આઉટ થયા, જેને કારણે ટીમ પર શરૂઆતમાં જ દબાણ આવી ગયું.
આ દરમિયાન અચાનક વરસાદે મેચમાં વિક્ષેપ ઉભો કર્યો અને રમતને રોકવી પડી. રમત બંધ થઈ ત્યારે કેમેરાએ શાહરૂખ ખાનને KKR ના CEO વેંકી મૈસુર સાથે ગંભીર ચર્ચા કરતા કેદ કર્યા.
જોકે તેમની વાતચીતની સાચી માહિતી જાણવા મળી નથી, સોશિયલ મીડિયા પર ચાહકો અંદાજ લગાવી રહ્યા છે કે ટીમની નબળી શરૂઆત અને ટોસ પછી ટીમમાં કરાયેલા ફેરફારોને લઈને શાહરૂખ ચિંતિત છે.
