New York, તા. 10
જસ્ટિન બીબર, મેડોના, શકીરા અને બીટીએસ જેવાં વૈશ્વિક સ્ટાર્સ વર્લ્ડ કપના હાફટાઇમ શોમાં પોતાની પ્રસ્તુતિ આપશે. ફીફાએ સત્તાવાર રીતે આ અંગેની જાહેરાત કરી દીધી છે. `કોલ્ડપ્લે’ ના ક્રિસ માર્ટિન દ્વારા તૈયાર કરવામાં આવેલો આ 11 મિનિટનો હાફટાઇમ કાર્યક્રમ 19 જુલાઈના રોજ ફાઇનલ મુકાબલા દરમિયાન ન્યૂયૉર્ક ખાતે આયોજિત કરવામાં આવશે.
આ શો `ફીફા ગ્લોબલ સિટીઝન એજ્યુકેશન ફંડ’ ને સમર્થન આપશે, જે બાળકોને શિક્ષણ અને ફૂટબોલ સુધી પહોંચાડવા માટે 10 કરોડ અમેરિકી ડૉલર એટલે કે 9.5 અબજ રૂપિયાથી વધુનું ભંડોળ એકત્ર કરી રહ્યું છે.
જસ્ટિન બીબરે એક નિવેદનમાં જણાવ્યું કે, ફીફા વર્લ્ડ કપ જે રીતે આખી દુનિયાને એકસાથે જોડે છે, તેવું અન્ય કોઈ આયોજન કરી શકતું નથી. હું આ હાફટાઇમ શોનો હિસ્સો બનીને ખૂબ આભારી છું અને એ જાણીને મને વધુ ખુશી થઈ રહી છે કે આનાથી વિશ્વભરનાં બાળકો સુધી શિક્ષણની પહોંચ વધારવામાં મદદ મળી રહી છે.
દર્શકોનો બન્યો નવો રેકોર્ડ
`ફોક્સ નેટવર્ક’ ના જણાવ્યાં અનુસાર, વર્લ્ડ કપના રાઉન્ડ ઓફ-16 માં ઇંગ્લેન્ડ અને મેક્સિકો વચ્ચે રમાયેલો મુકાબલો અમેરિકી ટીમ વિના રમાયેલી એવી વર્લ્ડ કપ મેચ બની ગઈ છે, જેને અમેરિકામાં અંગ્રેજી પ્રસારણના માધ્યમથી સૌથી વધુ દર્શકોએ નિહાળી હોય.
નેટવર્કે માહિતી આપી કે રવિવારની રાત્રે મેક્સિકો સિટીમાં સરેરાશ 2.17 કરોડથી વધુ દર્શકોએ આ પ્રસારણ જોયું હતું. આ સાથે જ આ મેચે 2022 આર્જેન્ટિના અને ફ્રાન્સ વચ્ચે રમાયેલા ફાઇનલનો રેકોર્ડ તોડી નાખ્યો છે, જેને 1.67 કરોડ દર્શકોએ જોયો હતો.
