હવે રોબોટ તમને કપડાં પહેરાવે તે માત્ર એક કલ્પના નહીં પરંતુ વાસ્તવિકતા બની રહી છે. સાઉથ કોરિયાની ’કાઈસ્ટ’ (KAIST- કોરિયા એડવાન્સ્ડ ઈન્સ્ટિટ્યૂટ ઓફ સાયન્સ એન્ડ ટેકનોલોજી) અને સ્ટેનફોર્ડ યુનિવર્સિટીનાં સંશોધકોએ એક એવી અનોખી ટેકનોલોજી વિકસાવી છે, જેની મદદથી વ્યક્તિ હાથનો ઉપયોગ કર્યા વગર પણ કપડાં પહેરી શકે છે.
આ ટેકનોલોજીમાં કપડાંની અંદર હવાનાં દબાણથી ચાલતી નરમ અને સ્થિતિસ્થાપક ’વાઈન્સ’ (વેલ/દોરી જેવી રચના) ફીટ કરવામાં આવી છે. જેવી રીતે વેલ અથવા આઈવીનો છોડ કોઈ પણ દીવાલ કે માળખા પર ઘસડાઈને ઉપર ચડે છે, બિલકુલ તેવી જ રીતે આ રોબોટિક વાઈન્સ માત્ર 10 સેકન્ડમાં કપડાંને શરીર પર સરળતાથી સરકાવીને પહેરાવી દે છે. ખાસ વાત એ છે કે, જો વ્યક્તિ એક જગ્યાએ સ્થિર ઊભી ન રહે તો પણ આ સિસ્ટમ યોગ્ય રીતે કામ કરે છે.
કાઈસ્ટના પ્રોફેસર રિયુ જી-હ્વાને જણાવ્યું હતું કે, “આ પ્રણાલી તેની આસપાસનાં વાતાવરણ અને શરીરનાં આકાર મુજબ પોતાની જાતે ઢળી જાય છે. સપાટી ભલે લપસણી હોય, ચીકણી હોય કે ઢાળવાળી હોય, તે કોઈ પણ પરિસ્થિતિમાં કપડાં પહેરાવવાનું કામ સફળતાપૂર્વક કરી શકે છે.”આ ટેકનોલોજીનો સૌથી મોટો ઉપયોગ ઈમરજન્સી સેવાઓ, દિવ્યાંગ વ્યક્તિઓ તેમજ શારીરિક રીતે અશક્ત કે વૃદ્ધ લોકોને સ્વાવલંબી બનાવવા અને તેમની દૈનિક મદદ કરવા માટે થઈ શકશે.
