Mumbai,તા.29
આસામ રાજ્ય હાલમાં તાજેતરના વર્ષોના સૌથી ભયાનક પૂર સંકટનો સામનો કરી રહ્યું છે, જેના કારણે લાખો લોકો પ્રભાવિત થયા છે. આ કપરા સમયમાં બોલિવૂડના સુપરસ્ટાર સલમાન ખાને માનવતાનું ઉત્કૃષ્ટ ઉદાહરણ પૂરું પાડતા પૂર પીડિતોની વહારે આવવાનો નિર્ણય કર્યો છે. અભિનેતા હાલમાં મુંબઈમાં ડાયરેક્ટર વંશી પેડિપલ્લીની આગામી અનટાઇટલ્ડ ફિલ્મનું શૂટિંગ કરી રહ્યા છે, તેમ છતાં તેઓ મુંબઈથી જ સતત આસામની સ્થિતિ પર નજર રાખી રહ્યા છે. સલમાન ખાને પોતાની ચેરિટેબલ સંસ્થા ‘Being Human’ અને આસામ સ્થિત તેમના સત્તાવાર ફેન ક્લબ સાથે મળીને પૂરગ્રસ્ત વિસ્તારોમાં તાત્કાલિક રાહત સામગ્રી પહોંચાડવા માટે એક મોટા પાયા પર રિલીફ ડ્રાઇવ શરૂ કરી છે.સલમાન ખાનની સૂચનાથી આ આખી રાહત પ્રક્રિયાને તબક્કાવાર રીતે અમલમાં મૂકવામાં આવી રહી છે. રિપોર્ટ્સ અનુસાર, આ અભિયાનના પ્રથમ તબક્કામાં પૂરથી સૌથી વધુ પ્રભાવિત થયેલા શિવસાગર વિસ્તાર પર ધ્યાન કેન્દ્રિત કરવામાં આવ્યું છે. ગુવાહાટીથી પૂરગ્રસ્ત વિસ્તારોમાં રાહત સામગ્રીનું પરિવહન કરવામાં આવી રહ્યું છે. સલમાન ખાન ફેન ક્લબ આસામના સ્થાનિક સ્વયંસેવકો ઓન-ગ્રાઉન્ડ જઈને ખૂબ જ સક્રિયતાથી લોકો સુધી સીધી મદદ પહોંચાડી રહ્યા છે.
પૂરના કારણે અનેક વિસ્તારોમાં રાંધવાની વ્યવસ્થા ન હોવાથી, પ્રથમ તબક્કામાં ખાસ ‘રેડી-ટુ-ઇટ’ ફૂડ પેકેટ્સ વહેંચવામાં આવી રહ્યા છે. આ ફૂડ પેકેટમાં બિસ્કિટ, ગોળ, પૌઆ, મમરા, બ્રેડ, ચીઝ અને જામ જેવી ખાદ્ય સામગ્રીનો સમાવેશ કરાયો છે. સલમાન ખાનની પ્રાથમિકતા એ સુનિશ્ચિત કરવાની છે કે પૂરથી ઘેરાયેલા દરેક પરિવાર પાસે ઓછામાં ઓછા 3 દિવસ ચાલે એટલું ભોજન ઉપલબ્ધ રહે. ખાદ્યપદાર્થો ઉપરાંત, પૂરના પાણીથી ફેલાતા રોગોને રોકવા માટે પીવાનું શુદ્ધ પાણી, વોટર પ્યુરિફિકેશન ટેબ્લેટ્સ, મચ્છરોથી બચવા માટે મોસ્કિટો કોઈલ્સ અને મહિલાઓ માટે સેનિટરી પેડ્સ પણ મોટા પાયે વિતરણ કરવામાં આવી રહ્યા છે.
આ રિલીફ ડ્રાઈવ માત્ર તાત્કાલિક ભોજન પૂરું પાડવા પૂરતી સીમિત નથી, પરંતુ સલમાને લાંબા ગાળાના આયોજન સાથેની મદદ તૈયાર કરી છે. આગામી સપ્તાહથી શરૂ થનારા બીજા તબક્કામાં અસરગ્રસ્ત પરિવારોને સંપૂર્ણ રાશન કીટ અને જરૂરી તબીબી દવાઓ પૂરી પાડવામાં આવશે. આ સાથે જ, પૂરના પાણી ઓસર્યા બાદ અંતિમ તબક્કામાં, ભારે પૂરને કારણે ક્ષતિગ્રસ્ત થયેલી સ્થાનિક શાળાઓ અને હૉસ્પિટલોના પુનઃનિર્માણ માટે પણ ‘Being Human’ સંસ્થા આર્થિક અને માળખાકીય સહયોગ આપશે, જેથી સ્થાનિક સમુદાયો ફરીથી બેઠા થઈ શકે. સલમાન ખાનના આ પગલા બાદ બોલિવૂડની અન્ય હસ્તીઓ જેમ કે ભૂમિ પેડનેકર વગેરે પણ અલગ-અલગ ફાઉન્ડેશન દ્વારા આસામની મદદ માટે આગળ આવી રહી છે.
