Mumbai,તા.05
10 વખતનો WWE વર્લ્ડ ચેમ્પિયન અને કોમ્બેટ સ્પોર્ટ્સનો સૌથી મોટા સ્ટારમાં સામેલ બ્રોક લેસનરે પ્રોફેશનલ રેસલિંગથી સત્તાવાર રીતે સંન્યાસની જાહેરાત કરી દીધી છે. 49 વર્ષીય લેસનરે ‘The Pat McAfee Show’માં પોતાના રિટાયરમેન્ટનું એલાન કરતા કહ્યું કે, ‘મારી સફર હવે માત્ર WWE (વર્લ્ડ રેસલિંગ એન્ટરટેઈનમેન્ટ)માં જ નહીં, પરંતુ તમામ પ્રકારની સ્પર્ધાત્મક ફાઈટિંગથી ખતમ થઈ ગઈ છે.’લેસનરે જણાવ્યું કે, ગત શનિવારે સમરસ્લેમમાં રમાયેલી મારી મેચ મારા કરિયરની છેલ્લી મેચ હતી. તેણે સ્વીકાર્યું કે રેસલમેનિયા દરમિયાન જ મને સમજાઈ ગયું હતું કે, મારો સમય પૂરો થઈ ચૂક્યો છે. તે મેચમાં ઓબા ફેમી સામે હાર્યા બાદ તેણે રિંગમાં પોતાના બૂટ અને ગ્લોવ્સ ઉતારી દીધા હતા. જો કે, WWEની અપીલ અને પોતાની અંદર બચેલી ઊર્જાને કારણે તેણે એક અંતિમ ‘હેલ ઈન અ સેલ’ મેચ રમવાનો નિર્ણય કર્યો.લેસનરે કહ્યું કે, આજે હું દુનિયાને જણાવવા માંગુ છું કે હું રિટાયર થઈ ચૂક્યો છું. શનિવારનો દિવસ મારા માટે ખૂબ જ ભાવુક દિવસ હતો. જ્યારે ઓબા ફેમીએ રેસલમેનિયામાં મને સ્લેમ કર્યો, ત્યારે મેં વિચાર્યું કે હું હવે આ ન કરી શકું. પરંતુ બિઝનેસે ફરી બોલાવ્યો અને મારી અંદર થોડી હિંમત બાકી હતી. હવે શનિવાર બાદ સ્ક્વેયર્ડ સર્કલમાં બ્રોક લેસનર માટે બધું ખતમ થઈ ગયું છે.
બ્રોક લેસનરનું કરિયર રમતગમતના ઈતિહાસના સૌથી અનોખા સફરમાં ગણાય છે. સાઉથ ડકોટાના ખેડૂત પરિવારમાંથી આવતા લેસનરે સૌપ્રથમ કોલેજ રેસલિંગમાં પોતાની ઓળખ બનાવી હતી. મિનેસોટા યુનિવર્સિટી તરફથી રમતા તેઓ બે વાર ઓલ-અમેરિકન બન્યા, બે વાર બિગ ટેન ચેમ્પિયન રહ્યા અને વર્ષ 2000માં NCAA ડિવિઝન-1 (NCAA Division-I) નેશનલ રેસલિંગ ચેમ્પિયનશિપ પણ પોતાના નામે કરી હતી.લેજ રેસલિંગમાં સફળતા મેળવ્યા બાદ તેમણે WWE તરફ પ્રયાણ કર્યું અને માત્ર બીજા જ વર્ષે એટલે કે 2002માં ડ્વેન ‘ધ રોક’ જૉનસનને હરાવીને પોતાનો પહેલો WWE વર્લ્ડ ટાઈટલ જીતી લીધો. પોતાના ખતરનાક F-5 ફિનિશિંગ મુવના દમ પર લેસનરે WWEમાં કુલ 10 વર્લ્ડ ચેમ્પિયનશિપ જીતી અને ‘ધ બીસ્ટ ઈનકાર્નેટ’ના નામથી વિશ્વભરમાં જાણીતા થયા.તેના નામે બે રોયલ રમ્બલ (2003 અને 2022), કિંગ ઓફ ધ રિંગ (2002) અને મની ઇન ધ બેન્ક લેડર મેચ (2019) જીતવાનો રેકોર્ડ પણ નોંધાયેલો છે. વર્ષ 2014માં તેણે રેસલમેનિયામાં ધ અંડરટેકરની 21-0ની ઐતિહાસિક જીતની સ્ટ્રીક તોડીને પ્રો રેસલિંગના ઈતિહાસની સૌથી યાદગાર ક્ષણોમાંથી એકને જન્મ આપ્યો હતો.2004માં લેસનરે WWE છોડીને અમેરિકન ફૂટબોલમાં કરિયર બનાવવાનો પ્રયાસ કર્યો. તેણે NFL (નેશનલ ફૂટબોલ લીગ)ની મિનેસોટા વાઈકિંગ્સ ટીમ સાથે પ્રી-સીઝન મુકાબલા રમ્યા, પરંતુ અંતિમ ટીમમાં સ્થાન ન બનાવી શક્યા.
ત્યારબાદ 2007માં તેણે મિક્સ્ડ માર્શલ આર્ટ્સ (MMA) માં પ્રવેશ કર્યો. પોતાની ચોથી જ મેચમાં રેન્ડી કૉઉચરને હરાવીને 2008માં UFC (અલ્ટિમેટ ફાઇટીંગ ચેમ્પિયનશિપ) હેવીવેઇટ ચેમ્પિયન બન્યો. તેણે 2015માં MMAમાંથી સંન્યાસ લીધો, પરંતુ 2016માં UFC 200માં માર્ક હન્ટ (Mark Hunt) સામે છેલ્લી વખત ઓક્ટાગનમાં ઉતર્યો. જો કે, તે મેચ પહેલા પ્રતિબંધિત પદાર્થના સેવનમાં પોઝિટિવ આવ્યા બાદ નેવાડા સ્ટેટ એથ્લેટિક કમિશન દ્વારા તેને સસ્પેન્ડ કરી દેવામાં આવ્યો હતો. ત્યારબાદ તેણે ફરી ક્યારેય MMA મેચ નથી લડી.લેસનર પોતાના વિદાય સંદેશમાં ભાવુક નજર આવ્યો. તેણે કહ્યું કે, ‘હું દક્ષિણ ડકોટાનો એક સામાન્ય ખેડૂત હતો, જેને મોટા સપના હતા. આજે 49 વર્ષની ઉંમરે જ્યારે હું પાછળ ફરીને જોઉં છું, ત્યારે હું ભગવાન અને તે બધા લોકોનો આભાર માનું છું જેમણે મને સાથ આપ્યો. હું બાળકોને કહેવા માંગુ છું કે, સોશિયલ મીડિયા પર માત્ર સફળતા જ દેખાય છે, પરંતુ તેની પાછળની મહેનત નહીં. જો તમે સખત મહેનત કરતા રહેશો અને તમારા લક્ષ્ય પર ફોકશ રાખશો, તો તમને ચોક્કસપણે સારા પરિણામો મળશે.’
બ્રોક લેસનરના રિટાયરમેન્ટની સાથે જ WWE અને કોમ્બેટ સ્પોર્ટ્સના એક એવા યુગનો અંત આવ્યો છે, જેણે પ્રો રેસલિંગ, MMA અને ખેલ જગતમાં આવા ઘણા રેકોર્ડ બનાવ્યા જે આવનારા વર્ષો સુધી યાદ કરવામાં આવશે.
