Dhaka,તા.૧૯
બાંગ્લાદેશની વચગાળાની સરકારે દેશમાં કાયદો અને વ્યવસ્થા સુધારવા અને વિધ્વંસક ગતિવિધિઓને રોકવા માટે સેનાને બે મહિના માટે દંડાત્મક સત્તાઓ સોંપી છે. પબ્લિક એડમિનિસ્ટ્રેશન મંત્રાલયે સરકારના નિર્ણય પર એક નોટિફિકેશન બહાર પાડીને કહ્યું કે, તે તાત્કાલિક અસરથી અમલમાં આવશે.
આ સત્તા સેનાના કમિશન્ડ અધિકારીઓને આપવામાં આવશે. ફોજદારી કાર્યવાહી સંહિતાની કલમ ૧૭, જે આર્મી અધિકારીઓને વિશેષ કાર્યકારી મેજિસ્ટ્રેટનો દરજ્જો આપે છે, તે કહે છે કે આ અધિકારીઓ જિલ્લા મેજિસ્ટ્રેટ અથવા ડેપ્યુટી કમિશનરને ગૌણ હશે. બીડી ન્યૂઝ અનુસાર, ધરપકડ કરવાની અને ગેરકાયદેસર રેલીઓને વિખેરવાની સત્તા સેનાના કમિશન્ડ અધિકારીઓને સોંપવામાં આવી છે. વચગાળાની સરકારના સલાહકારે જણાવ્યું હતું કે અધિકારીઓ સ્વ-બચાવમાં અને આત્યંતિક સંજોગોમાં ગોળીબાર કરી શકે છે. કાનૂની સલાહકાર આસિફ નઝરુલે કહ્યું કે આ નિર્ણય સમયની જરૂરિયાત છે.
