Indonesia,તા.23
ઇન્ડોનેશિયાના પ્રખ્યાત પ્રવાસન સ્થળ બાલીમાં એક ભારતીય પરિવારની હરકતને કારણે આંતરરાષ્ટ્રીય સ્તરે ભારતીય પ્રવાસીઓની છબી ખરડાઈ છે. બાલીની એક પ્રખ્યાત હોટલમાંથી ચેક-આઉટ કરતી વખતે આ પ્રવાસીઓ હોટલની મિલકત જેવી કે ડોરમેટ (પગલૂછણિયા), રસોડાના વાસણો, હેર ડ્રાયર અને અન્ય એસેસરીઝ ચોરી કરતા પકડાયા હતા.
બાલીમાં હોટલના કર્મચારીઓ ભારતીય પ્રવાસીઓના એક જૂથના સામાનમાંથી ચોરાયેલી વસ્તુઓ કાઢી રહ્યા હોવાનો એક વીડિયો સોશિયલ મીડિયા પર વાયરલ થયો છે. આ ઘટના 19 એપ્રિલના રોજ પાયંગન જિલ્લાના કેલુસા ગામમાં આવેલા અસ્વરા રિસોર્ટ ઉબુદમાં બની હતી.
તપાસ દરમિયાન ભાંડો ફૂટ્યો
ઘટના ત્યારે પ્રકાશમાં આવી જ્યારે હોટલના સ્ટાફને શંકા ગઈ અને તેમણે પ્રવાસીઓને રોકીને તેમની બેગની તપાસ કરવાનું નક્કી કર્યું. શરૂઆતમાં પરિવારે વિરોધ કર્યો હતો અને સ્ટાફ સાથે દલીલો કરી હતી, પરંતુ જ્યારે સ્ટાફે મક્કમ રહીને સામાન ખોલાવ્યો ત્યારે બેગમાંથી હોટલની માલિકીની અનેક વસ્તુઓ મળી આવી હતી. આ સમગ્ર ઘટનાનો વીડિયો સોશિયલ મીડિયા પર જોરદાર વાયરલ થઈ રહ્યો છે.
પૈસા આપવાની તૈયારી બતાવી પણ સ્ટાફ મક્કમ રહ્યો
વીડિયોમાં જોઈ શકાય છે કે જ્યારે ચોરી પકડાઈ ગઈ, ત્યારે પ્રવાસીઓ માફી માંગવા લાગ્યા હતા અને વસ્તુઓના બદલામાં પૈસા ચૂકવવાની તૈયારી બતાવી હતી. જોકે, હોટલ સ્ટાફ અત્યંત નારાજ દેખાતો હતો. સ્ટાફના સભ્યએ વીડિયોમાં એમ કહેતા સાંભળી શકાય છે કે, “તમારી પાસે ઘણા પૈસા હશે, પણ આ સન્માનની વાત છે. તમે આ રીતે હોટલનો સામાન ન લઈ જઈ શકો.”
સોશિયલ મીડિયા પર આકરી પ્રતિક્રિયા
આ વીડિયો વાયરલ થયા બાદ ભારતીય નેટીઝન્સે આ પરિવારની આકરી ટીકા કરી છે. લોકોનું કહેવું છે કે આવા કેટલાક લોકોના કારણે વિદેશમાં સમગ્ર ભારતીય સમુદાયને શરમજનક સ્થિતિમાં મુકાવું પડે છે. પ્રવાસન નિષ્ણાતોએ પણ પ્રવાસીઓને વિદેશમાં ભારતીય સંસ્કૃતિ અને મર્યાદા જાળવી રાખવા અપીલ કરી છે.
