New Delhi, તા.28
દેશમાં નશાનો કારોબાર ચિંતાજનક છે હીરોઇન, અફીણ-ગાંજો વગેરે મોટા પ્રમાણમાં પકડાઇ છે. દરિયાઇ માર્ગની સાથોસાથ વિમાન માર્ગે પણ દાણચોરી થતી હોય તેમ ડ્રગ્સ પકડવાના અનેક કિસ્સા બન્યા છે.
છેલ્લા વર્ષોમાં ગુજરાતમાંથી હજારો કરોડના કેફી પદાર્થો પકડાયા છે. જ્યારે કેન્દ્ર સરકારે હવે ડ્રગ્સ દાણચોરી તથા તેની સિન્ડીકેટને ખત્મ કરવા માટે `ઓપરેશન વાઇપ’ તૈયાર કર્યું છે. `નક્સલ્યુક્ત ભારત’ના ધોરણે જ તે હાથ ધરાશે.
કેન્દ્રીય ગૃહ મંત્રાલયના સૂત્રોએ કહ્યું કે, નશાયુક્ત ભારત અભિયાનના ભાગરૂપે નાર્કોટીક્સ કંટ્રોલ બ્યુરોની સાથોસાથ દેશની કેન્દ્રીય તથા રાજ્યોની એજન્સીઓ સંક્લન સાધીને વિદેશમાંથી ઘુસાડાતા ડ્રગ્સ પર ખાસ દેખરેખ રાખશે. ઉપરાંત ડ્રગ સિન્ડીકેટને નિશાન પર લેશે એટલું જ નહીં દેશમાં લોકલ લેવલે ડીલીવરી કરતા કેરીયર-એજન્ટો પર પણ લગામ કસવામાં આવશે.
સૂત્રોએ કહ્યું કે, એજન્સીઓ દ્વારા ડાર્કનેટ, ક્રિપ્ટો કરન્સીની સાથોસાથ એનક્રિપ્ટેડ, ડીજીટલ પ્લેટફોર્મ પર પણ નજર રાખવામાં આવી રહી છે. કેફી દ્રવ્યોની દાણચોરી સિન્ડીકેટ પર નજર રાખવા રાજ્યોને પણ આદેશ આપવામાં આવ્યા છે.
નાર્કોટીક્સ કંટ્રોલ બ્યુરો દ્વારા ઓનલાઇન પ્લેટફોર્મ મારફત થતી ડ્રગ્ઝની તસ્કરી રોકવા માટે ઓપરેશન વાઇપ શરૂ કર્યું છે તેના ભાગરૂપે સરફેશ વેબ પર વોચ રાખવામાં આવી રહી છે.
કેન્દ્રીય ગૃહમંત્રી અમીત શાહે તાજેતરની એક પોસ્ટમાં કહ્યું હતું કે ડ્રગ્ઝ દાણચોરીનો દરેક માર્ગ બંધ કરી દેવા માટે સરકાર તમામ તાકાત કામે લગાડશે. સૂત્રોએ એમ જણાવ્યું હતું કે, કેન્દ્ર સરકાર દ્વારા રાજ્યોને ટોપ-10 ડ્રગ્સ સિન્ડીકેટનું લીસ્ટ આપવા માટે કહેવામાં આવ્યું છે અને તેના પર ફોક્સ વધારવા માટે સૂચના આપવામાં આવી છે.
આંતરરાષ્ટ્રીય ડ્રગ્સ સિન્ડીકેટના સ્થાનિક સંપર્કો પર વોચ રાખવા, સાઇબર સર્વેલન્સ તથા ડેટા એનાલીસીસ, કોલ ડીટેઇલ તથા નાણાંકીય વ્યવહારો પર વોચ રાખવા ઉપરાંત બાતમીદારોનું નેટવર્ક ઉભું કરવાની સાથોસાથ અંડરકવર ઓપરેશન હાથ ધરવા કહેવામાં આવ્યું છે.
કેન્દ્રીય એજન્સીઓના રીપોર્ટ પ્રમાણે ભારતમાં ડ્રગ્સ દાણચોરીના મુખ્ય ત્રણ રૂટ છે જેનો ઉપયોગ કરીને આંતરરાષ્ટ્રીય ડ્રગ્ઝ માફીયાઓ લોકલ સિન્ડીકેટને માલ મોકલાવે છે. સૌથી મોટા ડેથ ક્રિસેંટ નેટવર્ક અંતર્ગત અફઘાનિસ્તાન-પાકિસ્તાનથી ભારતમાં હેરોઇન ઘુસાડાય છે. ગુજરાત, રાજસ્થાન, પંજાબ અને કાશ્મીરમાં દરિયા ઉપરાંત ડ્રોન-ડ્રોપથી દાણચોરી થાય છે.
આ સિવાય ડેથ ડ્રાપએંગલ રૂટમાં મ્યાંમાર, લાઓસ તથા થાઇલેન્ડ મારફત સિન્થેટીક ડ્રગ્સ ભારતના પૂર્વોત્તર રાજ્યોમાં જંગલ માર્ગે ઘુસાડાય છે. આ ઉપરાંત મેક્સીકો-ચીન નેટવર્કમાં ભારત ટ્રાન્ઝીટ સ્પોટ છે.
હિન્દ મહાસાગર મારફત સિન્થેટીક કેમીક્લ ભારતમાં ઘુસાડાય છે. આ તમામ માર્ગો પર હવે ખાસ ઓપરેશન હાથ ધરાશે. આફ્રિકી સિન્ડીકેટ દિલ્હી, મુંબઇ, બેંગ્લોર જેવા મોટા શહેરોના હાઇપ્રોફાઇલ લોકોને નિશાન બનાવે છે તેના પર પણ તવાઇ બોલાવાશે.
નાર્કોટીક્સ બ્યુરોએ 2025માં 1980 કરોડના નશીલા દ્રવ્યો જપ્ત કર્યા હતા
વર્ષ 2025માં નાર્કોટીક્સ કંટ્રોલ બ્યુરો દ્વારા 1980 કરોડની કિંમતના 1.33 લાખ કિલો કેફી દ્રવ્યો જપ્ત કરવામાં આવ્યા હતા. જ્યારે 3889 કરોડની કિંમતનું 77000 કિલો ડ્રગ્સનો નાશ કરવામાં આવ્યો હતો.
