New Delhi તા.30
મધ્ય પૂર્વના યુધ્ધમાં સીઝફાયર વચ્ચે પણ કોઇ સમાધાન શક્ય બનતું નથી જ્યારે અમેરિકાએ મહિનાઓ સુધી હોર્મુઝ સ્ટ્રેટ પર ઘેરબંધી ચાલુ રાખીને ઇરાનને આર્થિક પતનના માર્ગે ધકેલવાનો વ્યૂહ અપનાવ્યાના સંકેતોથી ક્રૂડતેલના ભાવ સળગ્યા છે અને 120 ડોલરને આંબી ગયા હતા. બીજી તરફ વૈશ્વિક ઘટનાક્રમો વચ્ચે ડોલર સામે ભારતીય રૂપિયો 95ના સ્તરને વટાવી 95.14 થયો હતો. ભારતીય અર્થતંત્રને બેવડો ફટકો પડવાના ભણકારા છે.
સંયુક્ત આરબ અમીરાત ઓપેક સંગઠનમાંથી નીકળી ગયાના આઘાત પ્રત્યાઘાત શમે તે પૂર્વે ઇરાન સામેના યુધ્ધમાં હવે અમેરિકાએ આર્થિક ઘેરાબંધી વધુ કડક બનાવવાનું વલણ અપનાવ્યું છે.
ઇરાનને આર્થિક રીતે ખત્મ કરવા હોર્મુઝ સ્ટ્રેટમાં લાંબો વખત મહિલાઓ સુધી નાકાબંધી રાખવાના વ્યૂહની ચર્ચા કર્યાના રીપોર્ટથી દુનિયાભરમાં આઘાત સર્જાયો હતો. આ કદમ માત્ર ઇરાનને જ નહીં પરંતુ સમગ્ર વિશ્વને ઝટકો મારે તેમ છે. કારણ કે દુનિયાનું 20 ટકા દરિયાઇ પરિવહન આ માર્ગે છે અને તે લાંબો વખત બંધ રહેવાના સંજોગોમાં પેટ્રોલીયમથી માંડીને અનેકવિધ સંકટ સર્જાઇ શકે છે.
આ ઘટનાક્રમને પગલે વિશ્વસ્તરે ક્રૂડતેલના ભાવ સળગ્યા હતા. બ્રેન્ટક્રૂડ 120 ડોલરે પહોંચ્યું હતું. જ્યારે ડબલ્યૂટીઆઇ ક્રૂડ 107.09 ડોલર સાંપડ્યું હતું. 2022 પછી ક્રૂડનો સર્વોચ્ચ ભાવ જોવા મળ્યો હતો.
દરમિયાન કરન્સી માર્કેટમાં પણ આજે અમેરિકન ડોલર સામે ભારતીય રૂપિયાનો ધબડકો થયો હતો. ડોલર સામે રૂપિયો 95નું લેવલ ક્રોસ કરી ગયો હતો. 58 પૈસાના ઘટાડાથી 95.14 થયો હતો. સળંગ ત્રીજા દિવસે ધોવાણ હતું. રીઝર્વ બેંકે તાજેતરમાં કરન્સી વ્યવહારો સંબંધી નિયમો હળવા કરતા દબાણ સર્જાયું હતું.
શેરબજારમાં 1000 પોઇન્ટનો કડાકો
ક્રેડતૂલની તેજી તથા રૂપિયાના દોવાણના બેવડા માર તથા વૈશ્વિક ઘટનાક્રમોનો પ્રત્યાઘાત હેઠળ શેરબજારમાં આજે ફરી મંદીનું મોજુ ફરી વળ્યું હતું. ગભરાટભરી આક્રમક વેચવાલીના દબાણ હેઠળ મોટાભાગના શેરો ગબડ્યા હતા.
મુંબઇ શેરબજારનો સેન્સેક્સ 1019 પોઇન્ટના કડાકાથી 76465 હતો તે ઉંચામાં 77014 તથા નીચામાં 76340 હતો. નિફટી 322 પોઇન્ટ ગગડીને 23851 હતો. બેંક નિફટીમાં 812 તથા મીડકેપ નિફટીમાં 930 પોઇન્ટનો કડાકો હતો.
