Ahmedabad, તા.૯
શહેરમાં ઓનલાઇન છેતરપિંડીના બનાવો સતત વધી રહ્યા છે. સાયબર ગઠિયાઓ નવી નવી મોડસ ઓપરેન્ડી અપનાવીને નિર્દોષ લોકોને નિશાન બનાવી રહ્યા છે. ત્યારે જ ઇન્સ્ટાગ્રામ પર આપવામાં આવેલી જાહેરાત મારફતે યુવકને ફસાવી તેના બેંક ખાતામાંથી ઓટીપી વિના જ રૂપિયા ઉપાડી લેવાયાનો ચોંકાવનારો બનાવ સામે આવ્યો છે. આ મામલે આનંદનગર પોલીસ સ્ટેશનમાં ફરિયાદ નોંધાતા પોલીસે વધુ તપાસ શરૂ કરી છેવાસણાના હરિહરાનંદ ફ્લેટમાં રહેતા જૈનિશ જોષી થોડા દિવસ પહેલા ઓફિસમાં ઇન્સ્ટાગ્રામ પર રીલ્સ જોઈ રહ્યા હતા. તે દરમિયાન એક કોસ્મેટિક કંપનીની આકર્ષક જાહેરાત તેમની નજરે ચડી હતી. પ્રોડક્ટ સારી લાગતા તેમણે જાહેરાતમાં આપેલી લિંક પર ક્લિક કર્યું હતું. લિંક પર ક્લિક કરતા જ તેમને ટેલિગ્રામ એપ્લિકેશન મારફતે મેસેજ મળ્યો હતો, જેમાં જણાવાયું હતું કે કંપનીની પ્રોડક્ટ મેળવવા માટે પ્રથમ રૂ. ૧૯૯ની રજિસ્ટ્રેશન ફી ચૂકવવી પડશે. ત્યારબાદ જૈનિશે મળેલા ક્યુઆર કોડ સ્કેન કરીને મેમ્બરશીપ ફી ભરતાં સાથે આશરે રૂ. ૧૫૦૦ની પ્રોડક્ટ માટે પણ પેમેન્ટ કર્યું હતું. બાદમાં કાયમી મેમ્બરશીપના નામે વધુ રકમ પણ ચૂકવવામાં આવી હતી. થોડા સમય બાદ જૈનિશના ધ્યાનમાં આવ્યું કે તેમના બેંક ખાતામાંથી ઓટીપી વિના ૮ હજારના ત્રણ અલગ અલગ ટ્રાન્જેક્શન થઈ ગયા હતા. છેતરપિંડીનો ભોગ બન્યાનો અહેસાસ થતાં તેમણે તરત જ આનંદનગર પોલીસનો સંપર્ક કર્યો હતો.આ બનાવ અંગે પોલીસે સાયબર એક્સપર્ટની મદદથી તપાસ શરૂ કરી છે. પ્રાથમિક તપાસમાં ટેલિગ્રામ ચેનલ મારફતે ક્યુઆર કોડ મોકલીને મેમ્બરશીપના નામે છેતરપિંડી કરવાનો નવો કાવતરાખોર મોડસ ઓપરેન્ડી સામે આવ્યો હોવાનું પોલીસ સૂત્રોએ જણાવ્યું છે. ઉલ્લેખનીય છે કે શહેરમાં દરરોજ આધેડો, યુવાનો અને મહિલાઓ સાઈબર ક્રાઇમનો ભોગ બની રહ્યા છે રોજના લાખો રૂપિયા ગુમાવી રહ્યા છે સાયબર ક્રાઇમ અને સાયબર માફિઆથી બચવા માટે લોકોમાં જાગૃતિ આવે તેના માટે તંત્ર દ્વારા સતત પ્રયાસ કરવામાં આવી રહ્યા છે તેમ છતાં સાયબર ગઠિયા લોકોને ઠગવામાં સફળ બની રહ્યા છે.
