Jasdan. તા.14
પતિ સાથેના વિશ્વાસઘાત બાદ મહિલાઓને પ્રેમમાં દગો જ મળે છે. ત્યારે વિંછીયા પંથકમાં પરિણીતાને પ્રેમજાળમાં ફસાવી બહેનપણીના પતિએ અવારનવાર દુષ્કર્મ આચર્યનો બનાવ સામે આવતાં ચકચાર મચી ગઈ હતી. જે અંગે વિંછીયા પોલીસ મથકમાં દુષ્કર્મ, એટ્રોસિટી, ધમકી સહિતની કલમ હેઠળ ગુનો નોંધાયો હતો અને આરોપીની શોધખોળ આદરી હતી.
પોલીસ સુત્રોમાંથી મળતી વિગત મુજબ, વિંછીયા પંથકમાં આવેલ એક ગામમાં રહેતી 31 વર્ષીય પરણીતાએ નોંધાવેલ ફરિયાદમાં આરોપી તરીકે હર્ષદ ભોળા તાવીયા નામના શખ્સનું નામ આપતા વિંછીયા પોલીસે દુષ્કર્મ, એટ્રોસિટી એક્ટ સહિતની આકરી કલમો હેઠળ ગુનો નોંધી તપાસ હાથ ધરી હતી.
વધુમાં ફરિયાદીએ જણાવ્યું હતું કે, તે તેના પતિ અને એક પુત્ર સાથે રહે છે. તેના જ ગામમાં તેની બહેનપણી પણ રહે છે અને બંને વચ્ચે સારી મિત્રતા હોવાથી અરસપરસ ઘરે આવવા જવાના વ્યવહાર હતા. જે સંબંધે ફરિયાદીની બહેનપણીનો પતિ પણ ફરિયાદીના ઘરે આવજા કરતો હતો. જે દરમિયાન આરોપીએ ફરિયાદીના મોબાઈલ નંબર મેળવી લીધેલ હતા.
જે બાદ મોબાઇલ પર મેસેજ અને વાતો કરી મિત્રતા કેળવી હતી અને આગળ જતા તે મિત્રતા પ્રેમ સંબંધમાં ફેરવાઈ હતી. જે બાદ આરોપીએ પ્રેમ જાળમાં ફસાવી ફરિયાદી સાથે મૈત્રી કરાર પણ કરી લીધેલ હતા. જે બાદ આરોપી ફરિયાદી મહિલાને અવારનવાર તેના ઘરે બોલાવી બળજબરીથી શરીર સંબંધ બાંધતો હતો
ત્યારબાદ ઘર સિવાય અન્ય અલગ અલગ જગ્યાએ પણ ફરિયાદીને લઈ જઈ દુષ્કર્મ આચરેલ હતું. જે દરમિયાન મહિલાએ તેનો વિરોધ કરી અને સંબંધ તોડવા પ્રયાસ કરતા આરોપીએ ધમકી આપી હતી કે જો તું મારી સાથે સંબંધ તોડી નાખીશ તો મૈત્રી કરાર અંગે તારા પતિને બધી જાણ કરી દઈશ, તેમજ જો તું મારી સાથે સંબંધ નહીં રાખે તો તારા પુત્રને જાનથી મારી નાખીશ.
જે આરોપીની ધમકીથી આખરે કંટાળી મહિલાએ તેના પતિને બનાવતી અંગે જાણ કરતાં તુરંત જ તેઓ પોલીસના શરણે દોડી ગયા હતા અને પોલીસે તુરંત જ આરોપી વિરૂધ્ધ ગુનો નોંધી તેને પકડવા તજવીજ આદરી છે.
