૧૦ હજાર કરોડ રૂપિયા કે તેથી વધુનું રોકાણ કરનાર ઉદ્યોગોને કસ્ટમાઇઝ્ડ પ્રોત્સાહન આપવામાં આવશે
સરકાર દ્વારા ઈઝ ઓફ ડુઈંગ બિઝનેસ ૨.૦ ઉપર પણ ખાસ ભાર મૂકવામાં આવ્યો છે
Gandhinagar,તા.૧૫
મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીએ ગુજરાતની નવી ઔદ્યોગિક નીતિ જાહેર કરી દીધી છે. રાજ્ય સરકાર દ્વારા જાહેર કરાયેલી નવી ઔદ્યોગિક નીતિ ૧ જૂન ૨૦૨૬થી અમલમાં આવશે અને આગામી પાંચ વર્ષ સુધી અમલમાં રહેશે. રાજ્યને વૈશ્વિક સ્તરે સ્પર્ધાત્મક, નવીનતા આધારિત અને ટકાઉ ઔદ્યોગિક શક્તિ તરીકે વિકસાવવાના ઉદ્દેશ સાથે આ નીતિ તૈયાર કરવામાં આવી છે.મહાત્મા મંદિર ખાતે આયોજિત કાર્યક્રમમાં મુખ્યમંત્રી ભૂપેન્દ્ર પટેલે આ નીતિનું વિધિવત લોન્ચિંગ કર્યું હતું. રાજ્ય સરકારના જણાવ્યા મુજબ આ નીતિ માત્ર રોકાણ આકર્ષવા પૂરતી સીમિત નહીં રહે, પરંતુ ગુજરાતને વૈશ્વિક સ્તરે સ્પર્ધાત્મક, ટેકનોલોજી આધારિત અને ભવિષ્યલક્ષી ઔદ્યોગિક હબ તરીકે વિકસાવવાનો રોડમેપ સાબિત થશે.
નવી ઔદ્યોગિક નીતિ આગામી પાંચ વર્ષ માટે રાજ્યના ઔદ્યોગિક વિકાસની દિશા નક્કી કરશે. ખાસ કરીને આગામી વાઇબ્રન્ટ ગુજરાત સમિટ-૨૦૨૭ને ધ્યાનમાં રાખીને તૈયાર કરાયેલી આ નીતિ દ્વારા મોટા પાયે રોકાણ, રોજગારી સર્જન અને આધુનિક ટેકનોલોજી આધારિત ઉદ્યોગોને પ્રોત્સાહન આપવાનો પ્રયાસ કરવામાં આવ્યો છે.
આ નીતિનું સૌથી મહત્વનું પાસું એ છે કે ગુજરાત હવે પરંપરાગત ઉત્પાદન આધારિત અર્થતંત્રથી આગળ વધી સેમિકન્ડક્ટર, આર્ટિફિશિયલ ઇન્ટેલિજન્સ, ગ્લોબલ કેપેબિલિટી સેન્ટર્સ, ડિજિટલ સર્વિસિસ, ડેટા સેન્ટર્સ અને ડિફેન્સ મેન્યુફેક્ચરિંગ જેવા ઉચ્ચ મૂલ્યવર્ધિત ક્ષેત્રોમાં પોતાનું નેતૃત્વ સ્થાપિત કરવા પર ભાર મૂકી રહ્યું છે. રાજ્ય સરકારનો દાવો છે કે આ ક્ષેત્રોમાં રોકાણ માટે અનુકૂળ વાતાવરણ ઊભું કરીને ગુજરાતને વૈશ્વિક સપ્લાય ચેઇનનો મહત્વનો ભાગ બનાવવામાં આવશે.
એમએસએમઈ ક્ષેત્રને પણ નવી નીતિમાં વિશેષ સ્થાન આપવામાં આવ્યું છે. નાના અને મધ્યમ ઉદ્યોગો માટે ટેકનોલોજી અપગ્રેડેશન, ગુણવત્તા પ્રમાણપત્રો, નવીનતા અને નિકાસ ક્ષમતામાં વધારો કરવા માટે વિશેષ સહાયની જોગવાઈ કરવામાં આવી છે. આ ઉપરાંત સેવા ક્ષેત્ર માટે પણ પ્રથમ વખત વિશિષ્ટ પ્રોત્સાહન આપવામાં આવ્યું છે, જેમાં આઈટી, ડિઝાઇનિંગ, કન્સલ્ટિંગ અને ડિજિટલ સેવાઓ જેવા ક્ષેત્રોને આવરી લેવામાં આવ્યા છે.
નવી નીતિમાં અલ્ટ્રા મેગા પ્રોજેક્ટ્સ માટે વિશેષ પેકેજ જાહેર કરવામાં આવ્યું છે. ૧૦ હજાર કરોડ રૂપિયા કે તેથી વધુનું રોકાણ કરનાર ઉદ્યોગોને કસ્ટમાઇઝ્ડ પ્રોત્સાહન આપવામાં આવશે. સાથે જ રોકાણકારોને ઝડપથી પ્રોજેક્ટ શરૂ કરી શકાય તે માટે પ્લગ-એન્ડ-પ્લે ઇન્ફ્રાસ્ટ્રક્ચરની વ્યવસ્થા ઉભી કરવામાં આવશે, જેમાં જમીન, વીજળી, પાણી અને અન્ય જરૂરી સુવિધાઓ પહેલેથી ઉપલબ્ધ રહેશે.
ડ્રોન મેન્યુફેક્ચરિંગ, રોબોટિક્સ, એરોસ્પેસ, ડિફેન્સ, સર્ક્યુલર ઇકોનોમી અને રિસાયક્લિંગ ઉદ્યોગોને પણ વ્યૂહાત્મક ક્ષેત્ર તરીકે ઓળખીને વિશેષ પ્રોત્સાહન આપવામાં આવ્યું છે. બીજી તરફ ગ્રીન ઇન્ડસ્ટ્રી, વોટર રીયુઝ, વેસ્ટ મેનેજમેન્ટ અને એનર્જી એફિશિયન્સી પ્રોજેક્ટ્સને પ્રાથમિકતા આપીને પર્યાવરણલક્ષી વિકાસને પણ નીતિનો મહત્વનો આધાર બનાવવામાં આવ્યો છે.
સરકાર દ્વારા ઈઝ ઓફ ડુઈંગ બિઝનેસ ૨.૦ પર પણ ખાસ ભાર મૂકવામાં આવ્યો છે. સિંગલ વિન્ડો સિસ્ટમને વધુ મજબૂત બનાવવાની સાથે ઓનલાઈન મંજૂરી, સેલ્ફ સર્ટિફિકેશન અને ઝડપી ક્લિયરન્સ જેવી વ્યવસ્થાઓ દ્વારા રોકાણકારો માટેની પ્રક્રિયાઓ વધુ સરળ બનાવવાનો પ્રયાસ કરવામાં આવ્યો છે.
મહિલા કર્મચારીઓ અને શ્રમિકો માટે રહેણાંક સુવિધા વિકસાવવા રાજ્ય સરકારે વર્કિંગ વુમન હોસ્ટેલ અને લેબર હોસ્ટેલ માટે વિશેષ સહાયની જાહેરાત કરી છે. આવા પ્રોજેક્ટ્સમાં રૂ. ૪૦ કરોડ સુધીના બાંધકામ ખર્ચના ૮૦ ટકા સુધી સહાય ઉપલબ્ધ થશે. ઉદ્યોગો દ્વારા સ્થાપિત લેબર હોસ્ટેલ માટે રૂ. ૪૦ કરોડ સુધીના ખર્ચ અથવા કુલ ખર્ચના ૪૦ ટકા સુધી સહાય આપવામાં આવશે. ખાનગી ઔદ્યોગિક પાર્કમાં મહિલા હોસ્ટેલ અથવા લેબર હોસ્ટેલ માટે પણ રૂ. ૪૦ કરોડ સુધીના ખર્ચના ૪૦ ટકા સુધીની સહાય આપવામાં આવશે.
નવી નીતિ હેઠળ સ્ટાર્ટઅપ્સને પ્રોત્સાહન આપવા માટે વિવિધ સહાય યોજનાઓ જાહેર કરવામાં આવી છે. સામાન્ય સ્ટાર્ટઅપ્સને એક વર્ષ સુધી દર મહિને રૂ. ૨૫ હજારનું અલાઉન્સ આપવામાં આવશે, જ્યારે મહિલા ઉદ્યોગસાહસિકો દ્વારા સંચાલિત સ્ટાર્ટઅપ્સને દર મહિને રૂ. ૩૦ હજાર સુધીની સહાય મળશે. હાઈ ઈમ્પેક્ટ સ્ટાર્ટઅપ્સ માટે રૂ. ૩૦ લાખથી ૪૦ લાખ સુધીની આર્થિક સહાયની જોગવાઈ કરવામાં આવી છે. ઉપરાંત હાઈટેક, ફિનટેક અને ગ્રીન સ્ટાર્ટઅપ્સને વધારાના રૂ. ૧૦ લાખ સુધીનું પ્રોત્સાહન આપવામાં આવશે. ટર્મ લોન પર એક ટકાની વ્યાજ સબસિડી આપવાની પણ જાહેરાત કરવામાં આવી છે.
રાજ્ય સરકારના જણાવ્યા અનુસાર નવી નીતિનો મુખ્ય હેતુ ‘વિકસિત ગુજરાતથી વિકસિત ભારત-૨૦૪૭’ના લક્ષ્યને સાકાર કરવાનો છે. વેલ્યુ એડિશન, એડવાન્સ્ડ મેન્યુફેક્ચરિંગ અને ગ્લોબલ વેલ્યુ ચેઇન સાથે રાજ્યનું જોડાણ વધુ મજબૂત બનાવવા પર વિશેષ ભાર મૂકવામાં આવ્યો છે.
રાજ્યમાં નવા ઔદ્યોગિક પાર્ક અને આધુનિક ઈન્ફ્રાસ્ટ્રક્ચરનો વિકાસ કરવામાં આવશે. સાથે જ જીઆઈડીસી એસ્ટેટ્સના પુનર્જીવન અને લોજિસ્ટિક્સ નેટવર્કને વધુ મજબૂત બનાવવાની યોજના પણ અમલમાં મૂકવામાં આવશે. ઉદ્યોગોને માર્ગદર્શન અને સહાય પૂરી પાડવા માટે ઉદ્યોગ સહાય કેન્દ્રોની સ્થાપના કરવામાં આવશે, જેના દ્વારા રોકાણકારો, ઉદ્યોગો અને સરકાર વચ્ચે વધુ સરળ સંકલન સુનિશ્ચિત કરવામાં આવશે. સંશોધન અને વિકાસને પ્રોત્સાહન આપીને નવીનતા આધારિત વિકાસને વેગ આપવામાં આવશે તેમજ ઉદ્યોગો અને શૈક્ષણિક સંસ્થાઓ વચ્ચે સહયોગ વધારવા પર પણ ભાર મૂકવામાં આવ્યો છે.
ભવિષ્યલક્ષી કુશળ માનવબળ તૈયાર કરવા માટે રાજ્યમાં મજબૂત સ્કિલિંગ ઇકોસિસ્ટમ વિકસાવવામાં આવશે. નવી નીતિના પરિણામે સ્ટાર્ટઅપ અને એમએસએમઈ ક્ષેત્રને નવી તકો પ્રાપ્ત થશે તેમજ સેવા ક્ષેત્રના વિકાસ દ્વારા રાજ્યના જીડીપી અને નિકાસમાં વધારો કરવાનો લક્ષ્ય નક્કી કરવામાં આવ્યો છે. નવી ઔદ્યોગિક નીતિને ગુજરાતને વૈશ્વિક ઔદ્યોગિક હબ તરીકે વધુ મજબૂત બનાવવાની દિશામાં એક મહત્વપૂર્ણ પગલું માનવામાં આવી રહ્યું છે.
