જો આમિરને સુપર હિરો ફિલ્મની સ્ક્રિપ્ટ ગમશે તો તેઓ ૨૦૨૬માં શૂટિંગ શરૂ કરી શકે છે
Mumbai, તા.૧૮
આમિર ખાન કોઈ ફિલ્મ પર કામ કરે અને તે સફળ ન જાય તેવું ભાગ્યે જ બને છે. હાલ આમિર તેની ‘સિતારેં ઝમીં પર’ની ૨૦૨૫માં રિલીઝ કરવાની તૈયારી કરી રહ્યો છે. જ્યારે આવનારા અમુક વર્ષ સુધી તેની એક પછી એક ફિલ્મનું કામ ગોઠવાયેલું રહે તે માટે તે કેટલાંક ફિલ્મ મેકર્સ સાથે ચર્ચા વિચારણા પણ કરી રહ્યો છે. તાજેતરમાં જ અહેવાલ હતા કે આમિર તેના ‘અંદાઝ અપના અપના’ના ડિરેક્ટર રાજકુમાર સંતોષી સાથે કોમેડી ફિલ્મ ‘ચાર દિન કી ઝિંદગી’માટે વાતચીત કરી રહ્યો છે. હવે એવી માહિતી મળી છે કે તે ડિરેક્ટર લોકેશ કનગરાજ સાથે એક મોટી ફિલ્મની ચર્ચામાં છે. આમિરખાનની નજીકના સૂત્રો અનુસાર આમિર અને કનગરાજ એક સુપરહિરો ફિલ્મ અંગે ચર્ચા વિચારણા કરી રહ્યા છે. તેણે જણાવ્યું,“છેલ્લાં કેટલાંક મહિનામાં લોકેશ અને આમિર ઘણી વખત મળ્યા છે અને કેટલાક આઇડિયા પર ચર્ચા કરી છે. બંનેને સુપરહિરો ફિલ્મ કરવાનો વિચાર સૌથી ગમ્યો છે અને લોકેશ હવે તેના લેખકોની ટીમ સાથે મળીને તે અંગે સ્ટોરી તૈયાર કરશે. પછી તેઓ આમિરને પહેલો ડ્રાફ્ટ પીચ કરશે.” સૂત્રએ આગળ જણાવ્યું,“હાલ આમિર સિતારેં ઝમીન પર માટે વ્યસ્ત છે, તેના પછી તે રાજકુમાર સંતોષી, ઝોયા અખ્તર કે અવિનાશ અરુણ સાથે કામ શરૂ કરશે. જ્યારે લોકેશ હાલ કૂલીમાં વ્યસ્ત છે, પછી તે ૨૦૨૫માં કૈથી ૨નું કામ શરૂ કરશે. જો આમિરને સુપર હિરો ફિલ્મની સ્ક્રિપ્ટ ગમશે તો તેઓ ૨૦૨૬માં શૂટિંગ શરૂ કરી શકે છે. સાથે આમિર લોકેશની કૂલીમાં કેમિઓ પણ કરવાનો છે. સુપર હિરો ફિલ્મની ચર્ચા દરમિયાન તેઓ આ રોલ માટે સહમત થયા હતા. રજનીકાંતની આ ફિલ્મમાં લોકોશે આમિર માટે એક અનોખો રોલ લખ્યો છે, જેમાં આમિર બિલકુલ નવા અવતારમાં જોવા મળશે.”આ સિવાય આમિર અલ્લુ અરવિંદ સાથે ‘ગજની ૨’ અંગે પણ ચર્ચા કરી રહ્યો છે. તેઓ બંને માને છે કે તેમના વિષયમાં આ ફ્રેન્ચાઇઝીને આગળ વધારવાની ક્ષમતા છે. સૂત્રના જણાવ્યા અનુસાર,“તેણે અલ્લુ અરવિંદ, મધુ મન્ટેના અને સમગ્ર ટીમને પૂછ્યું છે કે તેઓ એક ગજની ૨ને અનુકૂળ સ્ક્રીપ્ટ સાથે આવે. પછી તેઓ આમિરને આ સ્ક્રિપ્ચ પીચ કરશે. લોકેશની જેમ આમિર ગજની ૨ સ્ક્રિપ્ટની પણ રાહ જોઈ રહ્યો છે.”
