નિતેશ તિવારીની રામાયણમાં રણબીર કપૂર, સાઈ પલ્લવી અને યશ રામ, સીતા અને રાવણના મુખ્ય રોલમાં છે
Mumbai, તા.૧
નિતેશ તિવારીની રામાયણમાં રણબીર કપૂર, સાઈ પલ્લવી અને યશ રામ, સીતા અને રાવણના મુખ્ય રોલમાં છે. આ રામાયણને હાલના સમયની સૌથી મોટી ફિલ્મ ગણાવાઈ રહી છે. ફિલ્મનું શૂટિંગ ઘણા સમયથી ચાલતું હતું પણ ફિલ્મના મેકર્સે હજુ સુધી ઓફિશિયલી કોઈ જ જાહેરાત કરી નથી. યશ આ ફિલ્મમાં કૉ-પ્રોડ્યુસર પણ છે, તેણે થોડા સમય પહેલાં જાહેર કર્યું હતું કે તે આ ફિલ્મમાં રાવણનો રોલ કરી રહ્યો છે. હવે આ ફિલ્મમાં કૌશલ્યાનો રોલ કરી રહેલી ઇન્દિરા ક્રિષ્નને કહ્યું હતું કે રવિ દુબે આ ફિલ્મમાં લક્ષ્મણનો રોલ કરી રહ્યો છે. એક યુટ્યુબ પોડકાસ્ટમાં ઇન્દિરાએ કહ્યું કે હવે આ રામાયણનું શૂટિંગ પૂરું થઈ ચૂક્યું છે અને તે આ ફિલ્મમાં રામની માતા કૌશલ્યાનો રોલ કરી રહી છે. આ પહેલાં તે ઘણી ટીવી સિરીયલમાં કામ કરી ચૂકી છે, તેથી તેણે કહ્યું કે હવે ટીવીના કલાકારોને પણ મોટી તકો મળી રહી છે. આ સંદર્ભે તેણે રવિ દુબેનો પણ ઉલ્લેખ કર્યો હતો. જેણે આ પહેલાં ટીવીમાં ‘જમાઇ રાજા’ અને ‘સાસ બિના સસુરાલ’ જેવી સિરીયલમાં કામ કર્યું છે. તે હવે આ ફિલ્મમાં લક્ષ્મણનો રોલ કરે છે.આ જ વાતમાં તેણે કહ્યું કે આ ફિલ્મમાં અરુણ ગોવિલ પણ છે, જે ટીવીમાં ભગવાન રામનો યાદગાર રોલ કરી ચૂક્યા છે. હવે તેઓ દશરથના પાત્રમાં જોવા મળશે. ઇન્દિરાએ કહ્યું,“તેઓ ખરેખર દશરથ જેવા લાગે છે. જેમ તેઓ એ જમાનામાં રામ જેવા લાગતા હતા. અમે લોકો શૂટ કરતાં હતાં ત્યારે તેઓ એ વખતના શૂટની વાતો કરતા હતા.”ઇન્દિરાએ રણબીરના પણ વખાણ કર્યા હતા. તેણે જણાવ્યું, “એ એક જોરદાર કલાકાર છે, પણ તે સામાન્ય લોકોને પણ પોતાનો લાગે છે. મેં તેને ક્યારેય કોઈ સાથે અસન્માનજનક રીતે વાત કરતા જોયો નથી. એણે મને જે પ્રકારે માન આપ્યું છે, એ રીતે મને ઇન્ડસ્ટ્રીમાં કોઈએ માન આપ્યું નથી. મને લાગે છે કે રણબીર જેટલી સુંદર રીતે કોઈ જ રામનો રોલ કરી શકે તેમ નથી. એ એક બહુપ્રતિભાશાળી એક્ટર છે. તે પોતાની જાતને જ ચેલેન્જ કર્યા કરે છે. એ પર્ફોર્મ કરતાં પહેલાં ઘણું વિચારે છે અને એકાગ્રતાથી કામ કરે છે. એ સીન માટે અને સાથી કલાકારો બધા સાથે મળીને કામ કરે છે.”તાજેતરના એક ઇન્ટરવ્યૂમાં યશે કહ્યું કે એ રાવણનો રોલ કરશે. તેણે કહ્યું, “આ બહુ આકર્ષક પાત્ર છે. મેં કોઈપણ કારણસર રાવણ બનવાનું પસંદ કર્યું નહોતું. રામાયણમાં તમે મને બીજો કોઈ રોલ કરવાનું કહ્યું હોત તો કદાચ હું ન કરત. મારા માટે એક કલાકાર તરીકે રાવણનો રોલ સૌથી વધુ ઉત્સાહપ્રેરક છે. કારણ કે મને એ પાત્રના ઘણા આવરણો છે અને એ એક ચોક્કસ પાત્રની ઘણી બારીકીઓ પણ છે. તેને ઘણી અલગ રીતે રજૂ કરવાની તક છે. મને આશા છે કે હું આ ફિલ્મમાં અલગ અભિગમ લાવી શકીશ.”
