Nigeria,તા.૩૦
ઉત્તરી નાઈજીરિયામાં નાઈજર નદીમાં બોટ પલટી જવાથી અત્યાર સુધીમાં ૨૭ લોકોના મોત થયા છે, જ્યારે ઓછામાં ઓછા ૧૦૦ લોકો ગુમ થયાના અહેવાલ છે. અધિકારીઓએ આ અકસ્માતની માહિતી આપી છે. બોટ શા માટે ડૂબી ગઈ તે અંગે હજુ સુધી કોઈ માહિતી પ્રાપ્ત થઈ નથી. રાહત અને બચાવ કાર્ય ચાલુ છે.
નેશનલ ઇનલેન્ડ વોટરવેઝ ઓથોરિટીના પ્રવક્તા મકામા સુલેમાને જણાવ્યું હતું કે બોટ મુખ્યત્વે મધ્ય કોગી રાજ્યના મીસા સમુદાયના વેપારીઓને લઈ જતી હતી, જેઓ પડોશી રાજ્ય નાઈજર રાજ્યમાં સાપ્તાહિક બજારમાં મુસાફરી કરી રહ્યા હતા. સુલેમાને કહ્યું કે બચાવ કાર્ય હજુ ચાલુ છે, પરંતુ મૃતકોનો ચોક્કસ આંકડો જાણી શકાયો નથી. તેમણે કહ્યું કે કોઈપણ મુસાફરોએ લાઈફ જેકેટ પહેર્યા ન હતા, જેના કારણે મૃત્યુનું જોખમ નોંધપાત્ર રીતે વધી ગયું હતું.
એક સ્થાનિક ટીવી ચેનલે સાક્ષીઓને ટાંકીને જણાવ્યું હતું કે ઘટનાસ્થળે ઓછામાં ઓછા ૨૭ લોકોના મોતની પુષ્ટિ થઈ હતી, જ્યારે સ્થાનિક ડાઇવર્સ અન્ય લોકોને બચાવવાનો પ્રયાસ કરી રહ્યા હતા. જણાવવામાં આવી રહ્યું છે કે બોટમાં મોટાભાગે મહિલાઓ સવાર હતી. બોટમાં ૨૦૦થી વધુ મુસાફરો સવાર હતા. પશ્ચિમ આફ્રિકાના દેશમાં બોટ પલટી જવાના અકસ્માતો અવારનવાર બનતા રહે છે. ઓવરલોડિંગ, પ્રતિકૂળ હવામાન પરિસ્થિતિઓ અને ઓપરેશનલ ભૂલો જેવા પરિબળો સામાન્ય રીતે આ ઘટનાઓ માટે જવાબદાર છે.
