Washington,તા.૭
અમેરિકાના ૪૭માં રાષ્ટ્રપતિ તરીકે ડોનાલ્ડ ટ્રમ્પના શપથ ગ્રહણ સમારોહમાં ભારતીયો પાસે ગર્વ કરવાનું બીજું મોટું કારણ હશે. આ વર્ષની ચૂંટણીમાં એક તરફ ભારતીય અમેરિકનોનું વર્ચસ્વ જોવા મળ્યું તો બીજી તરફ ’ઢોલ’ના રૂપમાં ભારતીય સંસ્કૃતિની ગુંજ પણ અમેરિકામાં સંભળાશે. હકીકતમાં, ૨૦ જાન્યુઆરીએ ટ્રમ્પના શપથ ગ્રહણ સમારોહ પછી કેપિટોલ હિલથી વ્હાઇટ હાઉસ સુધીની જાજરમાન પરેડમાં ભાગ લેવા માટે ભારતીય અમેરિકન ઢોલ બેન્ડને આમંત્રણ આપવામાં આવ્યું છે. યુ.એસ.માં નાના, પરંતુ ખૂબ જ પ્રભાવશાળી ભારતીય અમેરિકન સમુદાય માટે આ એક અન્ય સીમાચિહ્નરૂપ છે.
એક અખબારી યાદીમાં જણાવવામાં આવ્યું છે કે શિવમ ઢોલ તાશા પાઠકનું બેન્ડ આ વિશેષ કાર્યક્રમમાં વિશ્વને તેના વાઇબ્રન્ટ બીટ્સ અને શક્તિશાળી લય સાથે ભારતની સમૃદ્ધ સંગીત પરંપરાઓની ઝલક આપશે. જેમાં કહેવાયું છે કે વોશિંગ્ટન ડીસીમાં યોજાનાર આ વિશેષ કાર્યક્રમમાં ઢોલ બેન્ડની વિશેષ રજૂઆત વિશ્વભરના લાખો લોકો નિહાળશે. અખબારી યાદી અનુસાર, ભારતીય અમેરિકન સમુદાય માટે આ માત્ર એક સીમાચિહ્નરૂપ નથી, પણ એક નિર્ણાયક ક્ષણ પણ છે. અમેરિકામાં ભારતીય મૂળના લોકો સતત પોતાની છાપ બનાવી રહ્યા છે અને એક શક્તિશાળી સમૂહ તરીકે ઉભરી રહ્યા છે.
અમેરિકામાં આટલા મોટા પાયે અને આટલા ભવ્ય સ્ટેજ પર પહેલીવાર ઢોલ બેન્ડ પરફોર્મ કરશે. પ્રેસ રીલીઝ નોંધે છે કે બેન્ડને આપવામાં આવેલ આમંત્રણ એ વિશ્વભરમાં ભારતીય સંસ્કૃતિની વધતી જતી ઓળખ અને યુએસ અને ભારત વચ્ચેના સાંસ્કૃતિક સંબંધોને વધુ ગાઢ બનાવવાની ઉજવણી છે. તમને જણાવી દઈએ કે આ બેન્ડ અગાઉ ધાર્મિક તહેવારો સિવાય પણ ઘણા પ્રકારના કાર્યક્રમોમાં પરફોર્મ કરી ચૂક્યું છે અને ઢોલ તાશ સાથે વૈશ્વિક પ્રેક્ષકોને રજૂ કર્યું છે. આમાં હાઉડી મોદી કાર્યક્રમ, દ્ગમ્છ અને એનએચએલ હાફટાઇમ શો અને આઇસીસી ટી-૨૦ વર્લ્ડ કપ ઓપનિંગ સેરેમનીનો સમાવેશ થાય છે. જોકે, ૨૦ જાન્યુઆરીએ ટ્રમ્પના શપથ ગ્રહણ સમારોહમાં બેન્ડ નવી ઊંચાઈઓ પર પહોંચશે.
