Britain ,તા.૨
બ્રિટિશ વડા પ્રધાન કીર સ્ટાર્મરે રવિવારે કહ્યું હતું કે બ્રિટન અને ફ્રાન્સ યુક્રેન સાથે શાંતિ કરાર પર કામ કરશે અને પછી યુએસ રાષ્ટ્રપતિ ડોનાલ્ડ ટ્રમ્પ સાથે તેની ચર્ચા કરશે. શુક્રવારે વ્હાઇટ હાઉસ ખાતે યોજાયેલી બેઠકમાં ગરમાગરમ ચર્ચા બાદ તેમણે તેને યોગ્ય દિશામાં એક પગલું ગણાવ્યું.
સ્ટાર્મરે કહ્યું કે તેઓ અને ફ્રાન્સના રાષ્ટ્રપતિ ઇમેન્યુઅલ મેક્રોન યુનાઇટેડ સ્ટેટ્સ અને રશિયા વચ્ચેની વાટાઘાટોથી અલગ વાટાઘાટો શરૂ કરવા સંમત થયા છે. તેમણે કહ્યું, અમે સંમત થયા છીએ કે બ્રિટન, ફ્રાન્સ યુક્રેન સાથે યુદ્ધ અટકાવવા માટે એક યોજના પર કામ કરશે અને પછી અમે અમેરિકા સાથે આ યોજના પર ચર્ચા કરીશું. સ્ટાર્મરે કહ્યું કે બ્રિટન અને ફ્રાન્સ આ યોજનામાં મોખરે છે અને તેથી રાષ્ટ્રપતિ મેક્રોન અને હું આ યોજના પર કામ કરીશું અને પછી અમેરિકા સાથે તેની ચર્ચા કરીશું.
વ્હાઇટ હાઉસ ખાતે ટ્રમ્પ અને યુક્રેનના રાષ્ટ્રપતિ વોલોડીમીર ઝેલેન્સકી વચ્ચે થયેલી ઉગ્ર બોલાચાલીનો જવાબ આપવા માટે યુરોપિયન નેતાઓ એક થઈ રહ્યા છે. આ બેઠકમાં, યુએસ પ્રમુખ ટ્રમ્પ અને ઉપરાષ્ટ્રપતિ જેડી વાન્સે લાઈવ કેમેરા પર ઝેલેન્સકીને ઠપકો આપ્યો.
પીએમ સ્ટાર્મરે ડાઉનિંગ ખાતે ઝેલેન્સકીનું સ્વાગત કર્યું અને પછી મેક્રોન અને ટ્રમ્પ બંનેને યુક્રેન સાથે એકતા દર્શાવવા અને વોશિંગ્ટન અને કિવ વચ્ચેના તણાવપૂર્ણ સંબંધોને સુધારવા માટે ફોન કર્યો. ઝેલેન્સકી આજે સેન્ડરિંગહામ ખાતે રાજા ચાર્લ્સને મળશે, જ્યારે સ્ટારમર લંડનમાં યુરોપિયન નેતાઓ સાથે સંરક્ષણ સમિટનું આયોજન કરશે. આ સમિટમાં ફ્રાન્સ, જર્મની, ડેનમાર્ક, ઇટાલી, નેધરલેન્ડ, નોર્વે, પોલેન્ડ, સ્પેન, કેનેડા, ફિનલેન્ડ, સ્વીડન, ચેક રિપબ્લિક અને રોમાનિયાના નેતાઓ પણ હાજરી આપશે. તુર્કીના વિદેશ મંત્રી, નાટો સેક્રેટરી જનરલ અને યુરોપિયન કમિશન અને યુરોપિયન કાઉન્સિલના પ્રમુખો પણ હાજરી આપશે.
દરમિયાન, ચાન્સેલર રશેલ રીવ્સ ૨.૩ બિલિયન યુરો લોન સોદા પર હસ્તાક્ષર કરશે જેથી કિવ વધુ શસ્ત્રો ખરીદી શકે, જે રશિયન સંપત્તિઓ પર લાદવામાં આવેલા પ્રતિબંધોમાંથી નફાનો ઉપયોગ કરીને ચૂકવવામાં આવશે.
ઝેલેન્સકી અને ટ્રમ્પ વચ્ચેની મુલાકાતમાં થયેલી ચર્ચા અંગે સ્ટાર્મરે કહ્યું, મને અસ્વસ્થતા અનુભવાઈ રહી હતી. કોઈ આ જોવા માંગતું નથી. પરંતુ મહત્વની વાત એ છે કે તેનો પ્રતિભાવ કેવી રીતે આપવો. સ્ટાર્મરે કહ્યું કે ફ્રાન્કો-બ્રિટિશ શાંતિ યોજનામાં એક કે બે અન્ય દેશોનો સમાવેશ થઈ શકે છે.
અગાઉ, બ્રિટનની મુલાકાતે આવેલા યુક્રેનિયન રાષ્ટ્રપતિને બ્રિટિશ વડા પ્રધાન કીર સ્ટાર્મરે ગળે લગાવ્યા હતા અને કહ્યું હતું કે તેમને દેશનો અતૂટ ટેકો છે. શનિવારે જ્યારે ઝેલેન્સકી બ્રિટિશ વડા પ્રધાનના કાર્યાલય ’૧૦ ડાઉનિંગ સ્ટ્રીટ’ પહોંચ્યા, ત્યારે બહાર એકઠા થયેલા લોકો તેમના સમર્થનમાં સૂત્રોચ્ચાર કરી રહ્યા હતા. સ્ટોર્મરે યુક્રેનિયન રાષ્ટ્રપતિને ગળે લગાવ્યા અને તેમને અંદર લઈ ગયા. લંડનમાં યુરોપિયન નેતાઓની બેઠકની પૂર્વસંધ્યાએ બંને નેતાઓ મળ્યા હતા. આ બેઠકમાં, જો અમેરિકા યુક્રેનમાંથી ટેકો પાછો ખેંચી લે તો યુરોપિયન દેશો યુક્રેન અને પોતાનું રક્ષણ કેવી રીતે કરી શકે છે તેની ચર્ચા કરવામાં આવશે. “અને જેમ તમે બહાર રસ્તા પર નારાઓ સાંભળ્યા, તેમ તમને આખા બ્રિટનમાં સમર્થન મળ્યું,” સ્ટાર્મરે યુદ્ધગ્રસ્ત દેશના નેતાને કહ્યું. તેમણે કહ્યું, “અમે તમારી સાથે, યુક્રેન સાથે ઉભા છીએ, ભલે તે (યુદ્ધ) ગમે તેટલો સમય લે.” ઝેલેન્સકીએ તેમનો અને બ્રિટનના લોકોના સમર્થન અને મિત્રતા બદલ આભાર માન્યો
