Pakistan,તા.૨
પહેલગામમાં થયેલા આતંકવાદી હુમલા બાદ ભારત અને પાકિસ્તાન વચ્ચે તણાવ ચરમસીમાએ પહોંચી ગયો છે. દિલ્હીમાં વડા પ્રધાન નરેન્દ્ર મોદીની સતત બેઠકોથી પાકિસ્તાન ખૂબ જ ડરી ગયું છે. ભારત તરફથી સંભવિત હુમલાના ડરથી, પાકિસ્તાન હવાઈ હુમલા અથવા અન્ય કટોકટીની સ્થિતિમાં તેના નાગરિકોને ચેતવણી આપવા માટે સાયરન સિસ્ટમ્સ સ્થાપિત કરી રહ્યું છે.
નવીનતમ માહિતી અનુસાર, ખૈબર પખ્તુનખ્વા પ્રાંતના ૨૯ જિલ્લાઓમાં આધુનિક ઇલેક્ટ્રિક સાયરન સિસ્ટમ સ્થાપિત થવા જઈ રહી છે. આ સમાચાર લખાઈ રહ્યા છે ત્યારે, ખૈબર પખ્તુનખ્વાના બાજૌરમાં ૧,૧૨૨ ઇમારતોમાં સાયરન સિસ્ટમ લગાવવામાં આવી છે. આ ઉપરાંત, અન્ય સ્થળોએ પણ સાયરન સિસ્ટમ લગાવવામાં આવી રહી છે.
હકીકતમાં, ખૈબર પખ્તુનખ્વા પ્રાંતની સરકારે નિયંત્રણ રેખા (ર્ન્ંઝ્ર) પર વધતા તણાવને ધ્યાનમાં રાખીને નાગરિકોને સંભવિત જોખમોથી બચાવવા માટે ૨૯ જિલ્લાઓમાં આધુનિક ઇલેક્ટ્રિક સાયરન સિસ્ટમ્સ સ્થાપિત કરવાની પહેલ કરી છે. નાગરિક સંરક્ષણ નિયામકના સત્તાવાર નિર્દેશ અનુસાર, ડેપ્યુટી કમિશનરો અને નાગરિક સંરક્ષણ અધિકારીઓને તાત્કાલિક સાયરન લગાવવા અને પ્રગતિ અહેવાલ રજૂ કરવાનો આદેશ આપવામાં આવ્યો છે. સાયરનનો હેતુ હવાઈ હુમલાના કિસ્સામાં જનતાને સમયસર ચેતવણી આપવાનો છે, જેનાથી નાગરિકો સુરક્ષિત સ્થળોએ જઈ શકે.
એબોટાબાદ અને મરદાન જેવા મુખ્ય શહેરી કેન્દ્રોમાં વસ્તી વધુ હોવાથી ઓછામાં ઓછા ચાર સાયરન લગાવવાનો નિર્દેશ આપવામાં આવ્યો છે. તાત્કાલિક તૈનાત કરવા માટે ૫૦ થી વધુ આધુનિક ઇલેક્ટ્રિક સાયરન પહેલાથી જ જિલ્લા વહીવટીતંત્રને પહોંચાડવામાં આવ્યા છે. સત્તાવાર પત્રમાં ભાર મૂકવામાં આવ્યો છે કે હાલની પરિસ્થિતિને કારણે સાયરન લગાવવા જરૂરી બની ગયા છે.
એવું કહેવામાં આવી રહ્યું છે કે પેશાવર, સ્વાત, ડેરા ઇસ્માઇલ ખાન, બન્નુ, મલાકંદ, ચારસદ્દા, કોહાટ, નૌશેરા, દક્ષિણ વઝીરિસ્તાન, બાજૌર, ખૈબર અને ઓરકઝાઈ જેવા જિલ્લાઓ, શહેરો અને નગરોમાં વ્યૂહાત્મક રીતે સાયરન લગાવવામાં આવશે. અધિકારીઓએ જણાવ્યું હતું કે આ સિસ્ટમ કોઈપણ જોખમના કિસ્સામાં સમયસર ચેતવણીઓ આપીને જીવન બચાવવામાં મહત્વપૂર્ણ ભૂમિકા ભજવશે. તમને જણાવી દઈએ કે પહેલગામ આતંકવાદી હુમલા બાદ પીએમ મોદીએ કાર્યવાહી માટે સંપૂર્ણ છૂટ આપી દીધી છે.
