Vatican City,તા.૨૦
કેથોલિક ચર્ચના ઇતિહાસમાં યુનાઇટેડ સ્ટેટ્સમાંથી ચૂંટાયેલા પ્રથમ પોપ પોપ લીઓ (ઉંમર ૬૯) એ શનિવારે એક ભવ્ય પ્રાર્થના સેવામાં વિશ્વમાં એકતા અને શાંતિ માટે કામ કરવાની પ્રતિજ્ઞા લીધી. સેન્ટ પીટર્સ સ્ક્વેરમાં આયોજિત સમારોહમાં તેમણે કહ્યું કે ચર્ચને “એકતાનું પ્રતીક” બનાવવું તેમની પ્રાથમિકતા છે.
“હું ઇચ્છું છું કે અમારી પહેલી મહાન ઇચ્છા એક સંયુક્ત ચર્ચ, એકતાનું પ્રતીક, સમાધાનકારી વિશ્વ માટે એક ઉદાહરણ બને,” પોપ લીઓએ હજારો વિશ્વાસુઓ, કાર્ડિનલ્સ, બિશપ અને પાદરીઓની હાજરીમાં કહ્યું. આ પ્રસંગે, તેમને પરંપરાગત ધાર્મિક વસ્ત્રો અને પોપ બનવાનું પ્રતીક કરતી પોન્ટીફિકલ વીંટી ભેટમાં આપવામાં આવી હતી. તેણે વીંટી તરફ આદરપૂર્વક જોયું અને પછી પ્રાર્થનામાં હાથ જોડી દીધા.
આ ઐતિહાસિક પ્રસંગે વેટિકનમાં કડક સુરક્ષા વ્યવસ્થા કરવામાં આવી હતી. સ્વર્ગસ્થ પોપ ફ્રાન્સિસને મળનારા છેલ્લા વિદેશી નેતાઓમાંના એક, યુએસ વાઇસ પ્રેસિડેન્ટ જેડી વાન્સે આર્જેન્ટિનાના પોન્ટિફના સમાધિસ્થળ પર શ્રદ્ધાંજલિ આપી અને શિકાગોમાં જન્મેલા પોપ લીઓ ઠૈંફ ના સન્માન માટે યુએસ પ્રતિનિધિમંડળનું નેતૃત્વ કર્યું. તેમની સાથે યુએસ સેક્રેટરી ઓફ સ્ટેટ માર્કો રુબિયો પણ હતા, જેઓ રશિયા-યુક્રેન શાંતિ વાટાઘાટો માટે રોમ પહોંચી ચૂક્યા છે.
આ કાર્યક્રમમાં વિશ્વભરના ધાર્મિક અને રાજકીય પ્રતિનિધિઓએ હાજરી આપી હતી. પેરુવિયન રાષ્ટ્રપતિ દિના બોલુઆર્ટે, યુક્રેનિયન રાષ્ટ્રપતિ વોલોડીમીર ઝેલેન્સકી, રશિયન સંસ્કૃતિ મંત્રી ઓલ્ગા લ્યુબિમોવા, ૩૬ અન્ય ખ્રિસ્તી ચર્ચના પ્રતિનિધિમંડળો, યહૂદી સમુદાયનું ૧૩ સભ્યોનું પ્રતિનિધિમંડળ, જેમાંથી અડધા રબ્બી હતા. આ ઉપરાંત બૌદ્ધ, મુસ્લિમ, હિન્દુ, શીખ, પારસી અને જૈન ધર્મના પ્રતિનિધિઓ પણ હાજર રહ્યા હતા.
