Ahmedabad,તા.05
કડી-વિસાવદરની પેટાચૂંટણી વખતે જ ગુજરાત કોંગ્રેસમાં આંતરિક કકળાટ શરૂ થયો છે. ધારાસભ્ય મેવાણીએ પ્રદેશ નેતાગીરી સામે મોરચો માંડ્યો છે ત્યારે પ્રદેશ કોંગ્રેસના નેતાઓનું ભાજપ સાથે સેટિંગ છે તેવો આરોપ ઘડી પ્રવક્તા અમિત નાયકે કોંગ્રેસમાંથી રાજીનામું ધર્યુ છે.
મંગળવારે (3 જૂન) મધ્ય પ્રદેશમાં ખુદ રાહુલ ગાંધીએ ગુજરાત કોંગ્રેસના નેતાઓને ફટકાર લગાવતાં કહ્યું કે, ‘શહેર-જિલ્લાના માળખામાં સિનિયર નેતાઓના માનિતાઓને પદ આપી દેવાયુ છે. પ્રદેશ નેતાઓ હવે હાઈ-કમાન્ડના હિટલિસ્ટમાં છે ત્યારે બુધવારે (4 જૂવ) પ્રવક્તા અમિત નાયકે એવો આક્ષેપ કર્યો હતો કે, અમદાવાદ શહેર પ્રમુખ હિંમતસિંહ પટેલના પૂર્વ ગૃહમંત્રી પ્રદિપસિંહ જાડેજા સાથે રાજકીય સબંધ જગજાહેર છે. તેમના પર એવો પણ આક્ષેપ છે કે, ભાજપ સાથે ગોઠવણ હાવોના કારણે હિંમતસિંહને કમાન્ડોનું રક્ષણ અપાયુ છે. અમિત નાયકે ફેસબુક પર રાજીનામું મૂકી કોંગ્રેસના નેતા અને ભાજપના નેતાઓ સાથેની તસવીરો મૂકી છે. આ ઉપરાંત એવા સવાલ ઉઠાવ્યાં છે કે, શહેર પ્રમુખ હિંમતસિંહ પટેલ ભાજપના નેતા સાથે તેમના ખર્ચે પ્રવાસ કરી આવ્યાં છે અને ફાઈવ સ્ટારમાં મિજબાની માણી આવ્યાં છે ત્યારે કોંગ્રેસનું સંગઠન કેવી રીતે ટકશે? સામાન્ય કાર્યકર જીવના જોખમે, ધંધાના જોખમે, સામાજીક જોખમે પક્ષના વિચારધારા માટે ક્યાં સુધી લડશે? નેતાઓ તો ભાજપ સાથે ગોઠવાયેલાં છે. આ બાજુ, કોંગ્રેસના એક જૂથે અમિત નાયક પણ ભાજપના નેતાઓ સાથેની તસવીરો વાઈરલ કરી છે.
