વરસાદી પાણીના ભરાવા અને નિકાલ, ડ્રેનેજ વ્યવસ્થા અને તાત્કાલિક કામગીરી અંગે સ્થળ પર જ સમીક્ષા
Rajkot, તા.૨૫
Rajkot શહેરમાં ચાલુ વરસાદી પરિસ્થિતિને ધ્યાનમાં રાખીને તા.૨૪-૦૭-૨૦૨૬ના રોજ મ્યુનિસિપલ કમિશનરશ્રી તુષાર સુમેરાએ શહેરના ત્રણેય ઝોનની રૂબરૂ ફિલ્ડ મુલાકાત કરી હતી. શહેરના વિવિધ વિસ્તારોમાં વરસાદી પાણી ભરાવા અને નિકાલની સ્થિતિ, ડ્રેનેજ વ્યવસ્થા, વરસાદી પાણીના નિકાલની કામગીરી તેમજ નાગરિકોને પડતી મુશ્કેલીઓ અંગે સ્થળ પર જ વિગતવાર સમીક્ષા કરવામાં આવી હતી.
મ્યુનિસિપલ કમિશનરશ્રી સાથે સંબંધિત ઝોનના ડેપ્યુટી મ્યુનિસિપલ કમિશનરશ્રીઓ, સિટી એન્જિનિયર અધિકારીઓ, સોલિડ વેસ્ટ મેનેજમેન્ટ વિભાગ, ડ્રેનેજ વિભાગ તથા અન્ય સંબંધિત શાખાઓના અધિકારીઓ અને કર્મચારીઓ પણ હાજર રહ્યા હતા.
મુલાકાત દરમિયાન શહેરના મુખ્ય માર્ગો, જંકશનો, વરસાદી પાણીના નિકાલ માટેના સ્ક્રીન ચેમ્બર, સ્ટોર્મ વોટર ડ્રેનેજ લાઇન તેમજ સંવેદનશીલ વિસ્તારોની સ્થળ પર જ તપાસ કરવામાં આવી હતી. જ્યાં વરસાદી પાણી ભરાવાની સ્થિતિ જોવા મળી ત્યાં પાણીના ઝડપી નિકાલ માટે જરૂરી મશીનરી, પમ્પિંગ વ્યવસ્થા અને માનવબળ તાત્કાલિક કાર્યરત કરવા અધિકારીઓને સૂચના આપવામાં આવી હતી.
મ્યુનિસિપલ કમિશનરશ્રીએ વિવિધ સ્થળોએ હાજર અધિકારીઓ પાસેથી છેલ્લા કેટલાક કલાકોમાં પ્રાપ્ત થયેલી ફરિયાદો, કંટ્રોલ રૂમમાં નોંધાયેલા કોલ, વરસાદી પાણીના નિકાલની કામગીરી, વૃક્ષ પડવાની ઘટનાઓ તેમજ અન્ય વરસાદ સંબંધિત કામગીરી અંગે વિગતવાર માહિતી મેળવી હતી. જ્યાં જરૂરિયાત જણાઈ ત્યાં વધારાની ટીમો અને સાધનો તૈનાત રાખવા પણ સૂચના આપવામાં આવી હતી.
તેમણે ભારપૂર્વક જણાવ્યું હતું કે વરસાદ દરમિયાન કોઈપણ પ્રકારની પરિસ્થિતિમાં તાત્કાલિક પ્રતિસાદ મળે તે માટે તમામ વિભાગો વચ્ચે સતત સંકલન જાળવવું જરૂરી છે. દરેક ઝોનમાં અધિકારીઓ અને કર્મચારીઓ ફિલ્ડમાં સક્રિય રહીને કામગીરી કરે તેમજ નાગરિકોની ફરિયાદોનો ઝડપી નિકાલ કરે તે માટે સૂચના આપવામાં આવી હતી. આ ઉપરાંત સ્ક્રીન ચેમ્બરની સફાઈ, વરસાદી પાણીના પ્રવાહમાં અવરોધરૂપ કચરો અને અન્ય અવરોધો દૂર કરવાની કામગીરી સતત ચાલુ રાખવા સૂચના આપવામાં આવી હતી.
મ્યુનિસિપલ કમિશનરશ્રીએ ડ્રેનેજ વિભાગ, સોલિડ વેસ્ટ મેનેજમેન્ટ તથા અન્ય સંબંધિત શાખાઓને ૨૪ કલાક સ્ટેન્ડબાય સ્થિતિમાં રહી કામગીરી કરવા જણાવ્યું હતું. સાથે જ તમામ ઝોનના કંટ્રોલ રૂમ સતત કાર્યરત રાખી નાગરિકો તરફથી મળતી ફરિયાદોનો તાત્કાલિક નિકાલ કરવામાં આવે તે માટે પણ સૂચના આપવામાં આવી હતી.
