Srinagar,તા.૨૮
પીડીપીએ ૫ ઓગસ્ટે કલમ ૩૭૦ અને ૩૫એ પુનઃસ્થાપિત કરવા અને કાશ્મીર મુદ્દાના શાંતિપૂર્ણ ઉકેલની માંગણી સાથે જમ્મુ અને કાશ્મીરના જિલ્લા મુખ્યાલયો પર શાંતિપૂર્ણ વિરોધ પ્રદર્શનોની જાહેરાત કરી છે.
પીડીપી ચીફ અને જમ્મુ અને કાશ્મીરના ભૂતપૂર્વ મુખ્યમંત્રી મહેબૂબા મુફ્તીએ મંગળવારે શ્રીનગરમાં પાર્ટીના મુખ્યાલયમાં પાર્ટીના ૨૭મા સ્થાપના દિવસ નિમિત્તે આયોજિત પ્રેસ કોન્ફરન્સમાં આ જાહેરાત કરી હતી. તેમણે કહ્યું હતું કે પાર્ટીના કાર્યકરો પોતપોતાના જિલ્લાઓમાં શાંતિપૂર્ણ વિરોધ પ્રદર્શન કરશે.
મહેબૂબા મુફ્તીએ જણાવ્યું હતું કે તેમનો પક્ષ કલમ ૩૭૦ અને ૩૫એને પુનઃસ્થાપિત કરવા અને કાશ્મીર મુદ્દાના શાંતિપૂર્ણ ઉકેલ માટે અવાજ ઉઠાવતો રહેશે. તેમણે દિલ્હીમાં જંતર મંતર ખાતે પોતાના નિવેદન બદલ પણ દુઃખ વ્યક્ત કર્યું હતું. તેમણે કહ્યું હતું કે જો તેમના નિવેદનથી કોઈને દુઃખ થયું હોય તો તેઓ માફી માંગે છે.
મહેબૂબા મુફ્તી ૨૩ જુલાઈના રોજ પરીક્ષાની ગેરરીતિઓ સામે ચાલી રહેલા વિરોધ પ્રદર્શનને સમર્થન આપવા માટે દિલ્હીના જંતર મંતર પહોંચ્યા હતા. આ દરમિયાન, તેમણે પ્રદર્શનકારીઓ સામે પોલીસ કાર્યવાહીનો વિરોધ કર્યો હતો. મુખ્યમંત્રી ઓમર અબ્દુલ્લા અને અન્ય નેતાઓ દ્વારા તેમના નિવેદનની ટીકા કરવામાં આવી હતી. વિવાદ બાદ, પીડીપીએ આરોપ લગાવ્યો હતો કે નેશનલ કોન્ફરન્સ (એનસી) મહેબૂબા મુફ્તીના નિવેદનને વિકૃત રીતે રજૂ કરી રહી છે.
