New Delhi,, તા. 6
કેન્દ્ર સરકારે દેશની સૌથી મોટી વીમા કંપની LICમાં પોતાનો 6.5 ટકાનો હિસ્સો વેચીને અંદાજે રૂા.31,500 કરોડ એકત્ર કર્યા છે. આ વિશાળ સ્ટેક સેલ પાછળ સરકારે અભૂતપૂર્વ ગુપ્તતા જાળવી હતી.
આ સોદા માટે સલાહકાર તરીકે રોકાયેલા ચાર મોટા ઈન્વેસ્ટમેન્ટ બેંકર્સને પણ ટ્રાન્ઝેક્શન શરૂ થવાનાં ગણતરીનાં કલાકો પહેલાં જ આ અંગે જાણ કરવામાં આવી હતી. દિલ્હી સ્થિત ‘દીપમ’ કાર્યાલયમાં એક બેંકરને કોઈ કારણ આપ્યાં વગર અચાનક બોલાવીને છેલ્લી ઘડીએ સ્ટોક એક્સચેન્જ ફાઈલિંગ તૈયાર કરવા જણાવાયું હતું.
સરકારે આ સમયરેખા અત્યંત ગુપ્ત એટલાં માટે રાખી હતી જેથી શેરબજારના ટ્રેડર્સને અગાઉથી જાણ ન થાય. જો ટ્રેડર્સને મોટા પ્રમાણમાં શેર બજારમાં આવવાની માહિતી પહેલાથી મળી ગઈ હોત, તો તેઓ સટ્ટાખોરી કરીને કે શોર્ટ પોઝિશન બનાવીને ઓફર પહેલાં જ LICના શેરના ભાવ તોડી શક્યાં હોત.
સરકારે બજારની ધારણાથી વિપરીત જઈને ત્રિમાસિક પરિણામો જાહેર થાય તે પહેલાં જ સરપ્રાઈઝ આપીને આ ઓફર રજૂ કરી દીધી હતી. રસપ્રદ વાત એ પણ છે કે સલાહકાર બેંકોએ આ સોદા માટે સરકાર પાસેથી કોઈ ફી લીધી નથી, કારણ કે આટલા મોટા સરકારી મેન્ડેટથી બજારમાં તેમની પ્રતિષ્ઠા અને ‘લીગ ટેબલ’ રેન્કિંગ મજબૂત થાય છે.
સરકારે શરૂઆતમાં માત્ર 2.5 ટકાનો હિસ્સો વેચવાની યોજના બનાવી હતી, પરંતુ સંસ્થાકીય રોકાણકારો તરફથી 3.32 ગણું જબરદસ્ત સબ્સ્ક્રિપ્શન મળતાં, સરકારે વધારાનાં 4 ટકાનો વિકલ્પ વાપરીને કુલ 6.5 ટકાનો હિસ્સો વેચવાનો સફળ નિર્ણય લીધો હતો.
મે 2022ના આઈપીઓ પછી LICમાં સરકારનો આ પહેલો હિસ્સો વેચવાનો પ્રયાસ હતો. આ સફળ વેચાણને કારણે હવે LICમાં જાહેર શેરહોલિં્ડગ વધીને 10 ટકા થઈ ગયું છે, જેથી મે 2027ની ડેડલાઈન પહેલાં જ સેબીના લઘુત્તમ પબ્લિક શેરહોલિં્ડગના નિયમનું પાલન પણ થઈ ગયું છે.
