New Delhi તા,10
શ્રીલંકા સામેની આગામી ટેસ્ટ શ્રેણી પહેલાં જ ભારતીય ક્રિકેટ ટીમ માટે ચિંતાજનક સમાચાર સામે આવ્યા છે. ટીમમાં એક પછી એક મુખ્ય ખેલાડીઓ ઈજાગ્રસ્ત થઈ રહ્યાં છે, જેના કારણે એવું લાગી રહ્યું છે કે ટીમ ઈન્ડિયામાં `ઈન્જરી ઈમરજન્સી’ સર્જાઈ છે. મીડિયા રિપોર્ટ્સ મુજબ, જસપ્રીત બુમરાહ અને હાર્દિક પંડ્યા સહિત લગભગ 13 જેટલા ખેલાડીઓ વિવિધ ઈજાઓ સામે ઝઝૂમી રહ્યાં છે.
શ્રીલંકા વિરૂદ્ધ 15 ઓગસ્ટથી ગોલ ખાતે પ્રથમ ટેસ્ટ મેચ રમાવાની છે. તે પહેલાં રમાયેલી પ્રેકિ્ટસ મેચમાં ભારતીય બેટરોએ ઉત્તમોત્તમ દેખાવ કર્યો હતો – જેમાં દેવદત્ત પડિક્કલની શાનદાર સદી, કેપ્ટન કે.એલ. રાહુલના 40 રન અને રવિન્દ્ર જાડેજાના 63 રનની મદદથી ભારતે પ્રથમ દાવમાં 6 વિકેટે 357 રન બનાવ્યા હતા.
પરંતુ કેપ્ટન શુભમન ગિલ અને સાંઈ સુદર્શન સહિતના ખેલાડીઓની ઈજાએ ટીમની ચિંતા વધારી દીધી છે. વર્લ્ડ ટેસ્ટ ચેમ્પિયનશિપ (WTC) ફાઇનલની રેસમાં બનેલા રહેવા માટે ભારતને આગામી 9 માંથી ઓછામાં ઓછી 7 ટેસ્ટ જીતવી જરૂરી છે.
સેન્ટર ઓફ એક્સેલન્સ પર વધતું દબાણ અને વિવાદ
બેંગલુરુ સ્થિત ‘સ્પોર્ટ્સ સાયન્સ ટીમ’ પર હાલ ખેલાડીઓની ઈજાના કારણે કામનું ભારે દબાણ છે. વર્ષ 2025 ની શરૂઆતમાં નિતિન પટેલના રાજીનામા બાદથી આ વિભાગના હેડનું પદ ખાલી પડ્યું છે. આ સિવાય એવા પણ અહેવાલો સામે આવ્યા છે કે સિલેક્શન કમિટી અને CoE વચ્ચે ખેલાડીઓની ફિટનેસ અને વાપસીની ટાઇમલાઇનને લઈને મતભેદો છે.
કેટલાક ખેલાડીઓને ફિટનેસના તમામ ધોરણો પૂરા કર્યા વગર જ રિલિઝ કરી દેવામાં આવ્યા હોવાની ચર્ચા પણ ચાલી રહી છે. હાલમાં જ સાઈ સુદર્શન અને બુમરાહને ફિટનેસના આધારે ટીમમાં પસંદ કરાયા હતા, પરંતુ બાદમાં મેડિકલ ટીમે ભવિષ્યને ધ્યાનમાં રાખીને વધુ સાવચેતી રાખવાનો નિર્ણય લીધો હતો.
BCCI સેક્રેટરી એક્શનમાં : વી.વી.એસ. લક્ષ્મણ સાથે ઈમરજન્સી મીટિંગ
ખેલાડીઓની સતત વધી રહેલી ઈજાઓની ગંભીરતાને ધ્યાનમાં રાખીને BCCIના સેક્રેટરી દેવજીત સાઇકિયા બેંગલુ સ્થિત ‘સેન્ટર ઓફ એક્સેલન્સ’ પહોંચી રહ્યા છે. તેઓ ત્યાં ક્રિકેટ હેડ વી.વી.એસ. લક્ષ્મણ સાથે ખાસ બેઠક કરશે અને ખેલાડીઓના રિહેબ તથા ઈજામાંથી બહાર આવવાની પ્રક્રિયાની સમીક્ષા કરશે. આ બેઠકમાં મુખ્ય કોચ ગૌતમ ગંભીર અને ચીફ સિલેક્ટર અજિત અગરકર પણ ઓનલાઇન જોડાય તેવી શક્યતા છે.
ઈજાગ્રસ્ત ખેલાડીઓની યાદી અને તેમની ઈજાઓ
ઈજાના કારણે હાલ બેંગલુના ‘સેન્ટર ઓફ એક્સેલન્સ’ (CoE) માં સારવાર લઈ રહેલા ખેલાડીઓની વિગત આ મુજબ છેઃ
► જસપ્રીત બુમરાહઃ ઘૂંટણમાં સોજો
► સાંઈ સુદર્શનઃ ડાબા પગના અંગૂઠામાં ઈજા
► હર્ષિત રાણાઃ હેમસ્ટ્રિંગની સમસ્યા
► નીતિશ કુમાર રેડ્ડીઃ હેમસ્ટ્રિંગ અને ક્વાડ્રિસેપ્સની ઈજા
► વોશિંગ્ટન સુંદરઃ ક્વાડ્રિસેપ્સની ઈજા
► આકાશ દીપઃ પીઠના નીચલા ભાગમાં સ્ટ્રેસ ફ્રેક્ચર (બંગાળની રણજી સેમિફાઇનલ હાર્યા પછીથી જ બહાર છે)
► વ્હાઇટ બોલ સ્પેશિયાલિસ્ટઃ હાર્દિક પંડ્યા, વણ ચક્રવર્તી અને પ્રિન્સ યાદવ પણ રિહેબ હેઠળ છે.
