New Delhi તા.11
ક્રિકેટ વર્લ્ડ કપ 2027 માટે અફઘાનિસ્તાન ક્રિકેટ ટીમે ડાયરેક્ટ એન્ટ્રી કરી છે. અફઘાનિસ્તાનની ટીમ સતત ચોથી વખત આઈસીસી મેન્સ ક્રિકેટ વર્લ્ડ કપમાં જોવા મળશે. 2015, 2019 અને 2023 ની ટૂર્નામેન્ટ અફઘાનિસ્તાન ટીમ રમી ચૂકી છે, જ્યારે 2027 માટે પણ અફઘાની ટીમે ક્વોલિફાય કરી લીધું છે.
અફઘાનિસ્તાને જેવી ત્રીજી વનડે ઇન્ટરનેશનલ મેચમાં આયર્લેન્ડને હરાવ્યું, તે સાથે જ આગામી વર્ષે સાઉથ આફ્રિકા, ઝિમ્બાબ્વે અને નામિબિયામાં યોજાનારા વર્લ્ડ કપ માટે પોતાનું સ્થાન નિશ્ચિત કરી લીધું.
વર્લ્ડ કપ 2027 માટે સીધા ક્વોલિફાય કરનારી ટીમોમાં અફઘાનિસ્તાન 10મી ટીમ
અફઘાનિસ્તાન પહેલાં 9 ટીમોએ આ મેગા ઇવેન્ટ માટે ડાયરેક્ટ એન્ટ્રી મેળવી લીધી છે, જેમાં સાઉથ આફ્રિકા અને ઝિમ્બાબ્વેએ યજમાન તરીકે, જ્યારે બાકીની ટીમોએ રેન્કિંગના આધારે 2027ના વર્લ્ડ કપમાં એન્ટ્રી કરી છે.
યજમાન સાઉથ આફ્રિકા અને ઝિમ્બાબ્વે સિવાય વર્તમાન ચેમ્પિયન ઓસ્ટ્રેલિયા, 2023નો ફાઇનલ હારનારી ભારતીય ટીમ, પાકિસ્તાન, ઇંગ્લેન્ડ, ન્યુઝીલેન્ડ, બાંગ્લાદેશ અને શ્રીલંકા બાદ હવે અફઘાનિસ્તાનની ટીમનું નામ પણ ક્વોલિફાય કરનારી ટીમોની યાદીમાં જોડાઈ ગયું છે.
ક્વોલિફાયર્સ દ્વારા મળશે હવે એન્ટ્રી
આયર્લેન્ડ સહિત ઘણી ટીમો પાસે હજુ પણ વર્લ્ડ કપ 2027માં એન્ટ્રી મેળવવાની તક છે, કારણ કે જેમને સીધી એન્ટ્રી નથી મળી, તેમને ક્વોલિફાયર્સ દ્વારા વર્લ્ડ કપ રમવાની તક મળશે. આમાં વેસ્ટઇન્ડીઝની ટીમ પણ સામેલ છે, જે બે વારની ચેમ્પિયન ટીમ હોવા છતાં વર્લ્ડ કપમાં ડાયરેક્ટ એન્ટ્રી મેળવી શકી નથી.
સ્કોટલેન્ડ અને નેધરલેન્ડ્સને પણ સીધી એન્ટ્રી મળી શકી નથી. આવતા વર્ષે ફેબ્રુઆરીની આસપાસ ક્વોલિફાઇંગ ટૂર્નામેન્ટ યોજાશે, જેના દ્વારા બાકીની ટીમોને જગ્યા મળવાની આશા રહેશે. જોકે, 11મા નંબરની ટીમને ફાયદો થશે, જ્યારે 12, 13 અને 14મા નંબરની ટીમને ઘણી મુશ્કેલીઓનો સામનો કરવો પડશે.
14 ટીમો સાથે યોજાશે ટૂર્નામેન્ટ
ઇન્ટરનેશનલ ક્રિકેટ કાઉન્સિલ એટલે કે ICCએ પહેલાથી જ એ વાતની જાહેરાત કરી દીધી છે કે ICC મેન્સ ક્રિકેટ વર્લ્ડ કપ 2027માં 14 ટીમો ભાગ લેશે. 2023ના વર્લ્ડ કપમાં 10 ટીમોએ ભાગ લીધો હતો. જોકે, ICCએ ફોર્મેટમાં પણ ફેરફાર કર્યો છે.
પહેલા 14 ટીમોને 7-7 ટીમોવાળા બે ગ્રુપમાં વહેંચવામાં આવનાર હતી, પરંતુ હવે ‘સુપર 12’ ઉમેરવામાં આવ્યું છે, જે રાઉન્ડ 2 છે. પહેલાં રાઉન્ડમાં માત્ર ત્રણ ટીમો હશે, જેમની વચ્ચે એક સુપર સિરીઝ યોજાશે અને તેમાંથી એક ટીમને આગળ જવાની તક મળશે, જ્યારે 2-2 મેચો બાદ બે ટીમો બહાર થઈ જશે.
