પરંપરાગત જિમ સેશન પર જ આધાર રાખવાને બદલે તાપસી પોતાનાં રૂટિનમાં વિવિધ પ્રકારની પ્રવૃત્તિઓનો સમાવેશ કરે છે
Mumbai, તા.૧૨
તાપસી પન્નુએ અનેક વખત એક્ટિવ લાઇફ સ્ટાઇલ જાળવવાની સાથે પોતાને ગમતું ભોજન માણવાના મહત્વ વિશે વાત કરી છે. તેનાં માટે ફિટનેસનો અર્થ દરરોજ એક જ પ્રકારની કડક કસરતના રૂટિનનું પાલન કરવું નથી, પરંતુ એવી વિવિધ શારીરિક પ્રવૃત્તિઓ છે, જે તેનો ઉત્સાહ જાળવી રાખે અને જીવનમાં સંતુલન જાળવવામાં મદદ કરે.ભોજન અને કસરત પ્રત્યેના પોતાનાં અભિગમ વિશે તાપસીએ ખાસ વાતચીતમાં જણાવ્યું, “મને ભોજન કરવું ખૂબ ગમે છે. મેં એક વાત સમજી છે કે જો તમે કેલરી કેટલી છે અને ભોજન કર્યા પછી કેટલું વજન વધી શકે છે તેની વધુ ચિંતા કર્યા વિના તમને ગમતું ભોજન માણવા માંગતા હો, તો તમારે તમારું વર્કઆઉટ છોડવું ન જોઈએ.”પરંપરાગત જિમ સેશન પર જ આધાર રાખવાને બદલે તાપસી પોતાનાં રૂટિનમાં વિવિધ પ્રકારની પ્રવૃત્તિઓનો સમાવેશ કરે છે, જેથી ફિટનેસ એકધારી ન બની જાય. તાપસીએ જણાવ્યું કે સ્પોટ્ર્સ તેની ફિટનેસ રૂટિનનો અગત્યનો ભાગ છે અને સ્ક્વોશ તેની પસંદગીની પ્રવૃત્તિઓમાંની એક છે. આ ઉપરાંત તે જિમ વર્કઆઉટ્સ અને એરિયલ યોગા પણ કરે છે, જે તેને અલગ પ્રકારની શારીરિક ક્ષમતા આપે છે.તાપસીએ વધુમાં કહ્યું, “હું અઠવાડિયામાં ઓછામાં ઓછા બે વખત સ્પોટ્ર્સ રમું છું, ખાસ કરીને સ્ક્વોશ. હું જિમ પણ જાઉં છું અને એરિયલ યોગા પણ કરું છું. જેઓ આ વિશે જાણતા ન હોય તેમના માટે એરિયલ યોગા છત પરથી લટકાવવામાં આવેલા કપડાના હેમોકની મદદથી કરવામાં આવે છે. આ બે-ત્રણ રીતો છે જેના દ્વારા હું મારી જાતને ફિટ રાખું છું, કારણ કે દરરોજ જિમ જવું થોડા સમય પછી કંટાળાજનક બની શકે છે. ફિટ રહેવાની મારી સૌથી મોટી પ્રેરણા સરળ છે – મને ગમતું ભોજન હું ખાઈ શકું એ માટે ફિટ રહેવું છે.”
