Ahmedabad,તા,18
દર વર્ષે 18 ઓગસ્ટના રોજ ‘વર્લ્ડ બ્રેસ્ટ કેન્સર રીસર્ચ ડે’ તરીકે ઉજવવામાં આવે છે. આ નિમિત્તે સામે આવેલા આંકડા ચિંતાજનક સ્થિતિ દર્શાવે છે. અમદાવાદની સિવિલ હોસ્પિટલમાં છેલ્લા 10 વર્ષમાં બ્રેસ્ટ કેન્સરના 17,682થી વધુ કેસો નોંધાઈ ચૂક્યા છે. આ પૈકી સૌથી વધુ 32% કેસ 41થી 50 વર્ષની વયજૂથની મહિલાઓમાં જોવા મળ્યા છે. વધુ ચિંતાજનક બાબત એ છે કે છેલ્લા બે વર્ષમાં જ બ્રેસ્ટ કેન્સરના કેસોમાં 11.50%નો વધારો નોંધાયો છે.ગ્લોબોકેનના અહેવાલ મુજબ સમગ્ર વિશ્વમાં દર વર્ષે કેન્સરના અંદાજે 1.99 કરોડથી વધુ નવા કેસ નોંધાય છે, જેની સામે ભારતમાં વાર્ષિક અંદાજે 14.13 લાખ નવા કેસ સામે આવે છે. રાષ્ટ્રીય કેન્સર રજિસ્ટ્રી પ્રોગ્રામના અંદાજ મુજબ ગુજરાતમાં વર્ષ 2024 સુધીમાં કેન્સરના કુલ કેસોની સંખ્યા વધીને 77,205 સુધી પહોંચી હતી. ગુજરાતમાં મહિલાઓમાં થતા તમામ પ્રકારના કેન્સરમાં સ્તન કેન્સર 31.20% સાથે મોખરે છે. અમદાવાદના ‘પોપ્યુલેશન બેઝ્ડ કેન્સર રજિસ્ટ્રી’ના ડેટા મુજબ 0થી 74 વર્ષની વયજૂથ ધરાવતી દર 12માંથી 1 મહિલાને કેન્સર થવાનું જોખમ રહેલું છે.’ધી ગુજરાત કેન્સર એન્ડ રિસર્ચ ઈન્સ્ટિટ્યુટ’ના અહેવાલ અનુસાર, વર્ષ 2025માં સ્તન કેન્સરના 1541 નવા કેસો નોંધાયા હતા. જેમાં 41થી 50 વર્ષની વયજૂથના 469 કેસ અને 51થી 60 વર્ષની વયજૂથની મહિલાઓના 436 કેસ સામે આવ્યા છે. વર્ષ 2025 દરમિયાન સિવિલ હોસ્પિટલ ખાતે નોંધાયેલા કુલ 26,812 કેન્સરના દર્દીઓમાંથી 17,665 દર્દીઓ ગુજરાતના હતા, જ્યારે 9147 દર્દીઓ મધ્યપ્રદેશ, રાજસ્થાન અને ઉત્તર પ્રદેશ જેવા દેશના અન્ય રાજ્યોમાંથી સારવાર અર્થે આવ્યા હતા.
બ્રેસ્ટ કેન્સરના મુખ્ય લક્ષણોમાં સ્તનમાં નવી ગાંઠ કે કઠણપણું આવવું, સ્તનના કદ કે આકારમાં અચાનક બદલાવ થવો, બગલમાં ગાંઠ કે સોજો આવવો, ચામડી જાડી થવી અને સ્તન આસપાસ સતત દુખાવો થવો સામેલ છે.
તબીબોના મતે 40 વર્ષથી વધુ વયની મહિલાઓએ નિયમિતપણે બ્રેસ્ટ કેન્સરનું સ્ક્રિનિંગ કરાવવું જોઈએ. જો કોઈ નવી ગાંઠ કે અસામાન્ય ફેરફાર જણાય તો તુરંત ડોક્ટરની સલાહ લેવી જરૂરી છે. ગાંઠમાં દુખાવો ન થતો હોય તો પણ તપાસ કરાવવી હિતાવહ છે, કારણ કે વહેલું નિદાન એ જ કેન્સર સામેની લડાઈમાં સૌથી મોટું શસ્ત્ર છે.
