Gandhinagar,તા.૨૧
ગાંધીનગર જિલ્લાના ચિલોડા સર્કલ વિસ્તારમાંથી પોલીસે ગેરકાયદે રીતે વેચાણ અર્થે લવાયેલી 1 કરોડથી વધુની કિંમતની 1 કિલો 20 ગ્રામ વ્હેલ માછલીની ઉલ્ટી (એમ્બરગ્રીસ) જપ્ત કરી છે. આ મામલે પોલીસે 1 શખસની ધરપકડ કરીને કાયદેસરની કાર્યવાહી હાથ ધરી છે.પોલીસને ખાનગી બાતમીદાર દ્વારા ચોક્કસ બાતમી મળી હતી કે, 1 શખસ વ્હેલ માછલીની ઉલ્ટી(એમ્બરગ્રીસ)નો જથ્થો લઈને ચિલોડાથી શિહોલી તરફના રોડ પર ગ્રાહકની શોધમાં ફરી રહ્યો છે. બાતમીના આધારે બાતમીદારને જ ગ્રાહક બનાવીને તે શખસને ચિલોડા સર્કલ પાસે અમદાવાદ તરફ જતાં સર્વિસ રોડ પર બોલાવવામાં આવ્યો હતો. જ્યારે તે શખશ ત્યાં પહોંચ્યો ત્યારે તેના ખભા પર 1 કાળા કલરનો થેલો હતો. પોલીસે તેને રોકીને તેની પૂછપરછ કરી અને થેલાની તલાશી લીધી હતી. થેલામાંથી 1 પીળા કલરની પ્લાસ્ટિકની પારદર્શક કોથળી મળી આવી હતી, જેમાં અનિયમિત આકારના સફેદ અને ક્રીમ રંગના નાના-મોટા ટુકડાઓ મળી આવ્યા હતા.
પકડાયેલા શખસે પોતાનું નામ એજાદઅહેમદ નિસારઅહેમદ કુરેશી (ઉં.વ.30, રહે. વાવોલ ગાંધીનગર, મૂળ-પાટણ) હોવાનું જણાવ્યું હતું. આ પદાર્થ અંગે તેની પાસે ફોરેસ્ટ વિભાગની કોઈ પરવાનગી કે આધારભૂત કાગળો ન હતા.પોલીસે આ શંકાસ્પદ પદાર્થનું પરિક્ષણ કરવા માટે FSL અધિકારીને ચિલોડા પોલીસ સ્ટેશન બોલાવ્યા હતા. FSL અધિકારીએ 1 નાના ટુકડાને અગ્નિથી ઓગાળીને અને 1 અન્ય ટુકડાને પાણી ભરેલી ડોલમાં નાખીને તપાસ કરી હતી, જ્યાં તે પાણી પર તરવા લાગ્યો હતો. 1 ટુકડાના 2 ભાગ કરતા અંદરનો ભાગ પીળા રંગનો જોવા મળ્યો હતો. ડિજિટલ વજનકાંટા પર વજન કરતા તે 1 કિલો 20 ગ્રામ હોવાનું જણાયું હતું, જેની અંદાજિત કિંમત 1 કરોડ 20 હજાર રૂપિયા થાય છે. પોલીસે આ મામલે આરોપી વિરુદ્ધ જાણવાજોગ દાખલ કરી આગળની તપાસ હાથ ધરી છે.
