કેનેડા નોકરી અપાવવાના બહાને ખાતાં ખોલાવડાવી ઠગાઈ આચરી
પોલીસ મથકે સિદ્ધપુર અને વલસાડના ત્રણ શખ્સો સામે ગુનો નોંધાયો : પોલીસે આરોપીઓને પકડવા તજવીજ હાથધરી
Mehsana, તા.૨૪
કેનેડાના વર્ક પરમિટ અને નોકરી અપાવવાના બહાને મહેસાણાના એક પરિવાર સાથે વિશ્વાસઘાત કરી બેંક ખાતામાંથી રૂ.૪.૯૯ લાખ ઉપાડી લેવાના કિસ્સામાં મહેસાણા તાલુકા પોલીસ મથકે સિદ્ધપુર અને વલસાડના ત્રણ શખ્સો સામે ગુનો નોંધાયો છે.મહેસાણાના રાધનપુર રોડ પર મધુરમ હોમ્સમાં રહેતાં સીમાબેન અજીતસિંહ યાદવ હાલમાં ખાનગી શાળામાં નોકરી કરે છે. હાલ ચોથા સ્ટેજના કેન્સરથી પીડિત તેમના પતિને અગાઉ નવેમ્બર ૨૦૨૩ દરમિયાન કેનેડા નોકરી માટે જવું હોવાથી, પરિચિત રાજુભાઈ મણીલાલ પંચાલ (રહે. રામજીપુરા, સિદ્ધપુર) અને તેમના સંબંધી સચિનભાઈ હસમુખભાઈ પંચાલ (રહે. કહોડા, તા.ઊંઝા)એ કેનેડા જવા માટે બેંક ખાતામાં ઓછામાં ઓછા ચાર લાખ રૂપિયા હોવા જરૂરી હોવાનું કહ્યું હતું.
આરોપીઓએ પ્રોસેસના નામે સીમાબેનના પતિનું ઊંઝા એક્સિસ બેંકમાં ખાતું ખોલાવી, તેની સાથે લિંક કરેલું નવું સિમકાર્ડ, કસ્ટમર આઈડી અને એટીએમ કાર્ડ સિક્યોરિટી પેટે પોતાની પાસે રાખી લીધું હતું. ત્યારબાદ મહેસાણા એક્સિસ બેંકમાં દંપતીનું જોઇન્ટ ખાતું ખોલાવી તેમાં કુલ રૂ.૪,૯૯,૫૦૦ જમા કરાવડાવ્યા હતા. તા.૨૬-૦૧-૨૪ના રોજ ઊંઝા એક્સિસ બેંકના કસ્ટમર આઈડી મારફતે મહેસાણાના ખાતાનો મોબાઇલ નંબર બદલી, નેટબેંકિંગ શરૂ કરીને રૂ.૪,૯૯,૯૫૬ પિયુષકુમાર મહેશભાઈ પટેલ (રહે.રબડી, તા.વાપી, જિ.વલસાડ)ના એચડીએફસી બેંક ખાતામાં ટ્રાન્સફર કરી લીધા હતા. ખાતામાંથી રકમ કપાઈ જવાનો મેસેજ આવતાં જ મહિલાએ સાયબર ક્રાઈમ હેલ્પલાઈન ૧૯૩૦ પર ફરિયાદ નોંધાવી હતી. સાયબર સેલની ત્વરિત કાર્યવાહીથી પિયુષ પટેલના ખાતામાં રૂ.૧,૭૪,૦૯૨ હોલ્ડ થઈ ગયા હતા, જે કોર્ટ મારફતે તેણીને પરત મળ્યા હતા. જો કે, બાકીના રૂ.૩,૨૫,૮૬૪ હજુ પરત ન મળતાં સીમાબેને રાજુભાઈ, સચિનભાઈ અને પિયુષકુમાર સામે ફરિયાદ નોંધાવતાં પોલીસે ઠગાઈનો ગુનો નોંધી વધુ તપાસ હાથ ધરી છે.
