ઇડરના પાનોલ ગામે આવેલા એક કૂવામાં બુધવારે એક યુવાન અચાનક પડી જતાં તેનું મોત નિપજ્યું
Himatnagar, તા.૨૪
હિંમતનગર તાલુકાના ગામડી ગામના બે યુવાનો જાદરના મેળામાં ફરવા માટે બાઇક લઇને ઘરેથી નીકળ્યા હતા. આ દરમિયાન અચાનક બાઇક પરનો કાબૂ ગુમાવી દેતાં બાઇક હાઇવે પર આવેલા ગરનાળા સાથે અથડાતાં યુવાન પાણીમાં પડ્યો હતો. તેની પાછળ અન્ય બાઇક પર આવી રહેલો મિત્ર પોતાના મિત્રને બચાવવા માટે ગરનાળામાં ભરાયેલા પાણીમાં પડ્યો હતો. જોકે, કમનસીબે બંનેના મોત નીપજ્યાં હતા.
ગામડી ગામના અજયસિંહ પરમાર (ઉ.વ.૩૨) અને ભરતસિંહ પરમાર (ઉ.વ.૨૫) પોતાના ઘરેથી બાઇક લઇને મંગળવારે રાત્રિના સુમારે અલગ અલગ બાઇક પર જાદરના મેળામાં જવા માટે ઘરેથી નીકળ્યા હતા. દરમિયાન અજયસિંહ પરમારનું બાઇક ગરનાળાની દીવાલ સાથે અથડાઇ હતી. જેથી અજયસિંહ રોડની વચ્ચે આવેલા ગરનાળાના પાણીમાં ખાબક્યો હતો. બીજી તરફ અજયસિંહ પરમારના બાઇકની પાછળ બીજુ બાઇક લઇને આવેલા ભરતસિંહ પરમારે દૃશ્ય જોઇને પોતાના મિત્રને બચાવવા માટે ગરનાળામાં કૂદ્યો હતો. જોકે ગરનાળાના પાણીમાં ડૂબી જવાથી બંને યુવાનોના મોત નીપજ્યા હતા.
આ અંગેની જાણ થતાં લોકોના ટોળાં ઘટનાસ્થળે દોડી આવ્યા હતા અને હિંમતનગર ફાયરબ્રિગેડને જાણ કરતાં બંને યુવાનોના મૃતદેહને બહાર કાઢવામાં આવ્યા હતા. આ અંગે હિંમતનગર એ ડિવિઝન પોલીસે ગુનો નોંધી વધુ તપાસ હાથ ધરી છે.આ અંગે કાંકણોલ ગામના ઉપસરપંચ બિરેન પટેલે જણાવ્યું હતું કે, ગરનાળા નીચે મોટો ખાડો હોવાથી પાણી ભરાઇ રહે છે. જેથી તંત્ર દ્વારા તેનો નિકાલ ન કરાતાં મચ્છરોનો ઉપદ્રવ વધી ગયો છે. આ ખાડામાં પડેલા બે નિર્દોષ યુવકોના મોત નીપજ્યા છે. ઇડરના પાનોલ ગામે આવેલા એક કૂવામાં બુધવારે એક યુવાન અચાનક પડી જતાં તેનું મોત નિપજ્યું હતુ. જે અંગે ગામના તલાટીએ ઇડર ફાયરબ્રિગેડ તથા એમ્બ્યુલન્સને બોલાવી મૃતકના મૃતદેહને બહાર કઢાવ્યો હતો. આ અંગે પોલીસ સુત્રોમાંથી મળતી માહિતી અનુસાર, પાનોલ ગામમાં રહેતા રાવળ બળવંતભાઇ કાળાભાઇ (ઉ.વ.૪૫) ગમે તે કારણસર બુધવારે ગામમાં આવેલા કૂવામાં પડી ગયા હતા. જે અંગે ગામના તલાટી ચેતનાબેન પટેલને ખબર પડતાં તેણીએ તરત જ ૧૦૮ એમ્બ્યુલન્સ અને ઇડર ફાયરબ્રિગેડની ટીમને જાણ કરીને બોલાવી હતી. ત્યારબાદ ફાયરના જવાનોએ ઘટનાસ્થળે પહોંચી મૃતક બળવંત રાવળના મૃતદેહને બહાર કાઢ્યો હતો. ત્યારબાદ ઇડર પોલીસને જાણ થતા પોલીસે વધુ તપાસના ચક્રો ગતિમાન કર્યા હતા.
