Mumbai, તા.૨૬
થોડા દિવસો પહેલા, મુંબઈ ઈન્ડિયન્સે ઈન્ડિયન પ્રીમિયર લીગની ૨૦મી સીઝન માટે તેમના કોચિંગ સ્ટાફમાં ફેરફાર અંગે એક મોટી જાહેરાત કરી હતી, જેમાં વેસ્ટ ઈન્ડિઝના ભૂતપૂર્વ ખેલાડી કિરોન પોલાર્ડને નવા મુખ્ય કોચ તરીકે નિયુક્ત કરવામાં આવ્યા હતા.આઇપીએલમાંથી નિવૃત્તિ લીધા પછી પણ પોલાર્ડ ઘણી અન્ય વિદેશી ટી ૨૦ લીગમાં રમવાનું ચાલુ રાખે છે. ૧૭ જાન્યુઆરીથી શરૂ થનારી ૨૦૨૭ એસએ ૨૦ સીઝનમાં, ચેન્નાઈ સુપર કિંગ્સની દક્ષિણ આફ્રિકાની પેટાકંપની, જોબર્ગ સુપર કિંગ્સ માટે રમવાનું હતું. પોલાર્ડે મુંબઈ ઇન્ડિયન્સના મુખ્ય કોચ બન્યા પછી હવે એક મહત્વપૂર્ણ નિર્ણય લીધો છે, જેમાં જોબર્ગ સુપર કિંગ્સ માટે ન રમવાનો નિર્ણય લેવામાં આવ્યો છે.
ઓક્ટોબરની શરૂઆતમાં યોજાયેલી ખેલાડીઓની હરાજીમાં જોબર્ગ સુપર કિંગ્સ દ્વારા કિરોન પોલાર્ડને ૮૭.૨ લાખ (આશરે ૧.૮ મિલિયન) માં હસ્તગત કરવામાં આવ્યો હતો, અને તે પીળી જર્સીમાં રમવાની વ્યાપક અપેક્ષા હતી. જોકે, ક્રિકબઝના અહેવાલ મુજબ, કિરોન પોલાર્ડે જોબર્ગ સુપર કિંગ્સ ટીમ મેનેજમેન્ટને જાણ કરી છે કે તે આગામી જીછ૨૦ સીઝન માટે ઉપલબ્ધ રહેશે નહીં. પોલાર્ડના નિર્ણયના સમાચાર સામે આવે તે પહેલાં, મુંબઈ ઇન્ડિયન્સના એક સૂત્રએ ક્રિકબઝને જણાવ્યું હતું કે તે સંપૂર્ણપણે પોલાર્ડ પર નિર્ભર છે. “અમે તેને કોઈ સૂચના આપી નથી.” જીછ૨૦ હરાજીમાં પોલાર્ડ માટે બોલી ન લગાવવાના નિર્ણય અંગે, મુંબઈ ઈન્ડિયન્સના એક સૂત્રએ જણાવ્યું હતું કે તે બધું હરાજીના ક્રમ પર આધારિત હતું.
આગામી એસએ ૨૦ સીઝનમાં જોબર્ગ સુપર કિંગ્સ માટે ન રમવાના કિરોન પોલાર્ડના નિર્ણય અંગે, સીએસકે અને તમામ સુપર કિંગ્સ ફ્રેન્ચાઇઝના સીઈઓ કાસી વિશ્વનાથને એક નિવેદનમાં પુષ્ટિ આપી હતી કે પોલાર્ડે તેમને જાણ કરી છે કે તે જોબર્ગ સુપર કિંગ્સ માટે રમી શકશે નહીં. “અમે હવે રિપ્લેસમેન્ટ શોધીશું,” તેમણે કહ્યું. એસએ ૨૦ ની પાંચમી સીઝન ૧૭ જાન્યુઆરી, ૨૦૨૭ ના રોજ શરૂ થશે, જેની અંતિમ મેચ ૨૧ ફેબ્રુઆરીએ યોજાશે.
