Ahmedabad,તા.૩
દિવાળી તહેવાર નજીક આવતાં જ સુરત અને અમદાવાદથી સૌરાષ્ટ્ર તરફ જતા મુસાફરોના ખિસ્સા પર ભારે બોજ આવ્યો છે. વતનમાં પરિવાર સાથે તહેવાર ઉજવવા જતા લોકો પાસેથી Private Travels સંચાલકો સામાન્ય દિવસો કરતાં ત્રણ ગણું ભાડું વસૂલી રહ્યા હોવાની ફરિયાદો ઊઠી છે.
સામાન્ય દિવસોમાં અમદાવાદથી રાજકોટ જતી સ્લીપર બસનું ભાડું ૪૦૦થી ૫૦૦ રૂપિયા હોય છે. દિવાળી નજીક આવતાં તે વધીને ૧૦૦૦થી ૧૫૦૦ રૂપિયા સુધી પહોંચી ગયું છે. સંચાલકો જણાવે છે કે બુકિંગ વધશે તેમ ભાડું ૨૦૦૦ રૂપિયા કે તેથી વધુ થઈ શકે છે. ભાડું આટલું વધ્યા છતાં મોટાભાગની બસો ફુલ છે, કારણ કે વતન જવા માટે લોકો વધુ રકમ ચૂકવવા મજબૂર છે.
અમદાવાદમાં નોકરી, ધંધા અને અભ્યાસ અર્થે આવેલા લાખો લોકો રહે છે. બીજા તહેવારો તેઓ શહેરમાં ઊજવે છે, પણ દિવાળી પરિવાર સાથે વતનમાં ઊજવવાનો રિવાજ છે. આ ધસારાનો લાભ લઈને ભાડાં વધારી દેવાયાં હોવાનું મુસાફરોનું કહેવું છે
ખાનગી બસનું ભાડું સરકારી વિકલ્પો કરતાં ઘણું વધારે છે. અમદાવાદથી રાજકોટનાં ભાડાંની સરખામણી આ મુજબ છેઃ
ખાનગી ટ્રાવેલ્સઃ ૧૦૦૦થી ૧૨૦૦ રૂપિયા કે તેથી વધુ
વંદે ભારત ચેર કારઃ ૮૧૦ રૂપિયા
વંદે ભારત એક્ઝિક્યુટિવ ચેર કારઃ ૧૫૦૫ રૂપિયા
એસટી વોલ્વો બસઃ ૫૬૨ રૂપિયા
એસટી સ્લીપર બસઃ ૩૩૨ રૂપિયા
સુરતથી સૌરાષ્ટ્ર જતા લોકોની મુશ્કેલી વધુ મોટી છે. અહીંથી સૌરાષ્ટ્રના કોઈપણ જિલ્લામાં જવા માટે ૧૫૦૦ રૂપિયા ભાડું નક્કી કરી દેવાયું છે. ડબલ સોફા માટે ૩૦૦૦ રૂપિયા કે તેથી વધુ ચૂકવવા પડે છે. રત્નકલાકારો અને સામાન્ય વર્ગના પરિવારોનું બજેટ તેના કારણે ખોરવાઈ ગયું છે. ચાર સભ્યોનો પરિવાર વતન જઈને પાછો આવે તો માત્ર ભાડા પાછળ જ ૧૦થી ૧૨ હજાર રૂપિયાનો ખર્ચ થાય તેમ છે.
સુરત અને અમદાવાદની કેટલીક ખાનગી ટ્રાવેલ્સઓફિસોમાં ગ્રાહક બનીને પૂછપરછ કરતાં ભાડાવધારાની હકીકત સામે આવી. ત્યાંના સ્ટાફે સીટો ઓછી હોવાનું કારણ આપીને સામાન્ય કરતાં બમણાથી વધુ ભાડું જણાવ્યું. સંચાલકોએ આ વાત ખુલ્લેઆમ સ્વીકારીઃદિવાળીમાં સૌરાષ્ટ્રના તમામ રૂટ પર આવા જ ઊંચા ભાવ રહેશે.
૪ અને ૫ નવેમ્બરથી દિવાળી વેકેશન શરૂ થતાં જ સિંગલ સીટ કે સોફાનું ભાડું ૧૫૦૦ રૂપિયા થઈ જશે.ભાડું લાભ પાંચમ પછી જ સામાન્ય થશે.રિટર્ન મુસાફરીમાં પણ આ જ રીતે ઊંચું ભાડું વસૂલાય છે. ક્યાંક તહેવારના દિવસો માટે ૨૮૦૦થી ૩૦૦૦ રૂપિયા સુધીનાં ભાડાં બોલાઈ રહ્યાં છે.આ વસૂલાત સામે અગાઉ પૂર્વ ધારાસભ્ય ધીરુ ગજેરા અને ડાયમંડ વર્કર યુનિયને સવાલો ઉઠાવ્યા હતા. તેમણે તંત્ર પાસે કડક કાર્યવાહીની માંગણી પણ કરી હતી. જોકે કોઈ નક્કર પગલાં ન લેવાતાં ટ્રાવેલ્સ સંચાલકો બેખોફ બનીને મનસ્વી ભાડું વસૂલી રહ્યા હોવાનો આક્ષેપ છે. દિવાળી વેકેશન શરૂ થવાની તૈયારી છે, ત્યારે મુસાફરો ઊંચા ભાડાથી બચવા ટ્રેન અથવા એસટી બસના વિકલ્પ પણ ચકાસી શકે છે. તંત્ર ખાનગી બસોના ભાડા પર અંકુશ લાવશે કે નહીં, તેના પર સૌની નજર છે.
