New Delhi,તા.18
વધુ એક વખત વિદેશ મુલાકાતે પહોંચેલા વિપક્ષના નેતા રાહુલ ગાંધીએ અમેરિકાના કોલંબીયા યુનિવર્સિટીમાં ભારતના અર્થતંત્રની ચુંટણીપંચ દ્વારા યોજવામાં આવેલી મતદાર યાદી ગહન પુન: નિરીક્ષણ પ્રક્રિયા સહિતના મુદે સવાલો ઉઠાવી મોદી સરકાર તથા ચુંટણીપંચને ઘેરવા કોશીશ કરી હતી તથા 2024ની લોકસભા ચૂંટણીની કાયદેસરતા સામે પણ પ્રશ્ર્ન ઉઠાવ્યા હતા.
શ્રી ગાંધી બે દિવસના અમેરિકા પ્રવાસે છે. તમામે ગઈકાલે ન્યુયોર્કમાં કોલંબીયા યુનિ.માં વિદ્યાર્થીઓ તથા ફેકલ્ટીને સંબોધન કરતા ભારતના અર્થતંત્ર સામે ગંભીર પ્રશ્ર્ન ઉઠાવ્યા હતા. તેઓએ જણાવ્યું કે એ બહુ સ્પષ્ટ વાત છે કે ભારતીય અર્થતંત્ર એક આર્થિક સંકટની તરફ આગળ વધી રહ્યું છે. આ વાસ્તવિકતા છે. તેઓએ કહ્યું કે તમો આ સંકટને નજર અંદાજ કરી શકો, મિડીયા કરી શકે છે પણ ભારતમાં બેરોજગારી સૌથી મોટી સમસ્યા છે. ભારતમાં શિક્ષા વ્યવસ્થા પણ મોટી સમસ્યા છે.
રાહુલ ગાંધીએ ચુંટણીપંચ દ્વારા જે મતદાર યાદી સુધારણાની મહાકવાયત કરવામાં આવી તેની સામે પણ પ્રશ્ર્ન ઉઠાવ્યા હતા. તેઓએ કહ્યું કે આ પ્રક્રિયામાં અંદાજ કરતા પણ વધુ ખર્ચ થયા છે તેનો હિસાબ સાર્વજનિક કરવો જોઈએ અને એ પણ બતાવવું જોઈએ કે આ રકમ કયાંથી આવી હતી! તેઓએ ચુંટણી પ્રક્રિયામાં પણ ગેરરીતિનો આરોપ લગાવતા કહ્યું કે ચુંટણીમાં મત અને પરિણામના આંકડાઓ અમારી પાસે છે અને તેના આધારે અનેક સવાલો પણ છે. અમારી પાસે તેના પુરાવા છે. રાહુલ ગાંધીએ જણાવ્યું કે જો 13 કરોડ મતદારોના નામ કપાતા હોય તો 2024ની ચુંટણી કઈ રીતે કાનૂની હોઈ શકે છે.
તેઓએ દેશના મધ્યમવર્ગમાંથી આવતા કુટુંબોના પ્રશ્નો ઉઠાવ્યા જેમાં શિક્ષણ મેળવ્યા પછી તેમના ભવિષ્ય અંગે ચિંતાઓ છે. તેઓ હતાશ થઈ રહ્યા છે. તેઓ સામે કોઈ સુરક્ષિત ભવિષ્ય નજરે પડતુ નથી. વાદળી ટીશર્ટમાં નજરે પડેલા રાહુલ ગાંધી કોલંબીયા બાદ શિકાગો યુનિ. જશે અને ત્યાં સંબોધન કરશે. રાહુલ ગાંધી અહી યુનિ. કેમ્પસ પહોંચતા વિદ્યાર્થીઓ તેમની સાથે સેલ્ફી લેવા ધસારો કર્યો હતો.કોલંબીયા: વિપક્ષના નેતા રાહુલ ગાંધી આજે અહી યુનિ. કેમ્પસ ખાતે પ્રવચન આપવા પહોંચ્યા તો એક તરફ વિદ્યાર્થીઓએ તેમની સાથે સેલ્ફી લેવા માટે પહોંચ્યા હતા અને રાહુલ ગાંધી સાથે હાથ મિલાવ્યા હતા તો બીજી તરફ ખાલીસ્તાની ઉગ્રવાદીઓએ રાહુલ ગાંધી સામે દેખાવો કર્યા હતા. અહીના કટ્ટરવાદી શીખ ફેડરેશન ઓફ જસ્ટીસના ટેકેદારોએ રાહુલ ગાંધીની કાર સામે પ્રદર્શન કર્યુ હતું તથા તિરંગાનું પણ અપમાન કર્યુ હતું. જો કે પોલીસે તુર્તજ તેમને હટાવ્યા હતા.

