Junagadh તા.20
જુનાગઢ ગીરનાર પર્વતની લીલી પરિક્રમા માટે ગઈકાલે ગુરૂવાર સાંજ સુધીમાં લાખો યાત્રાળુઓ ભવનાથ તળેટીમાં આવી પહોંચ્યા હતા અને સાંજે પરિક્રમાના પ્રવેશદ્વાર ઈટવા અને રૂપાયતન ગેઈટ પાસે ઉમટી પડતા વન તંત્ર અને વહીવટી તંત્રની મુશ્કેલીમાં વધારો થયો હતો.
ગત સાંજે રાત્રે પ્રવેશ નહીં મળતા યાત્રાળુઓએ ચુલા પેટાવી ભોજનની મોજ માણી હતી. આખરે આજે શુક્રવારે સવારે છ કલાકે ઈટવા ગેઈટથી ભાવિકોએ પરિક્રમા પ્રવેશ માટે અનુમતિ મળતા જ સવારના 6થી 10 કલાક સુધીમાં બે લાખ લોકો (ભાવિકો)એ યાત્રાના નિર્ધારીત રૂટ મુજબ પ્રયાણ કરતા લીલી પરિક્રમાનો પ્રારંભ થયો છે.
લીલી પરિક્રમા વિધીવત રીતે આજે શુક્રવારે મધરાતે બાર કલાકે સંતો, મહંતો, સાધુઓ, વહીવટી તંત્રના અધિકારીઓ, પદાધિકારીઓની હાજરીમાં પ્રારંભ થાય તે પૂર્વે જ આજે વહેલી સવારથી યાત્રાનો પ્રારંભ કરવાની તંત્રને ફરજ પડી હોવાનું માનવામાં આવી રહ્યું છે.
ગત વર્ષોની માફક આ વર્ષે પણ યાત્રાળુઓના પ્રથમ દિવસના ધસારાને ધ્યાને લેતા આ વર્ષે અંદાજે 4 લાખથી વધુ ભાવિકો ઉમટે તેવી શકયતા છે. 36 કિ.મી.ની પાવનકારી કઠીન લીલી પરિક્રમાના ચાર પડાવ જીણા બાવાની મઢી, માળવેલા, બોરદેવી સહિતના સ્થળોએ અન્નક્ષેત્રમાં ભકિત, ભોજન, ભજનનો ત્રિવેણી સંગમ જોવા મળી રહ્યો છે.
યાત્રા રૂટ પર વહીવટી તંત્ર દ્વારા પાણી, આરોગ્ય, સુરક્ષા સહિતની વ્યવસ્થા ગોઠવી દેવામાં આવી છે. ભોજન માટે વિવિધ સંસ્થાઓના અન્નક્ષેત્રો શરૂ થયા છે, વિશ્રામ માટે પણ ચાર પડાવ પર વ્યવસ્થા ગોઠવવામાં આવી છે. વન વિભાગ અને પોલીસ દ્વારા સીસીટીવી કેમેરા સાથે જરૂરી બંદોબસ્ત ગોઠવી દેવાયો છે.
ગિરનાર લીલી પરિક્રમા દરમિયાન લાખો ભાવિકોને આરોગ્યલક્ષી તકલીફના સમયે તાત્કાલિક અને સમયસર સારવાર મળી રહે તે માટે જિલ્લા આરોગ્ય તંત્ર દ્વારા વ્યાપક આયોજન કરવામાં આવ્યું છે. પરિક્રમાના સમગ્ર રૂટ સહિત ભવનાથ વિસ્તારમાં ચોવીસ કલાક અવિરત તબીબી સેવાઓ ઉપલબ્ધ રહે તે માટે આરોગ્ય શાખા, જિલ્લા પંચાયત, મહાનગરપાલિકાની આરોગ્ય શાખા અને સિવિલ હોસ્પિટલના સંકલનથી કુલ 35 મેડિકલ ટીમો તૈનાત કરવામાં આવશે.
આ અંગે મુખ્ય જિલ્લા આરોગ્ય અધિકારી ડો. મનોજ સુતરિયાએ જણાવ્યું હતું કે, પરિક્રમાના રૂટ પર 10 કામચલાઉ દવાખાનાં શરૂ કરવામાં આવશે. જેમાં મેડિકલ ઓફિસર સહિતનો જરૂરી સ્ટાફ ઉપલબ્ધ રહેશે અને ભાવિકોને તમામ પ્રકારની પ્રાથમિક સારવાર પૂરી પાડવામાં આવશે.
આ ઉપરાંત 6 આયુષ મેડિકલ ઓફિસરની ટીમો તથા ચાલુ વર્ષે વધારાની 19 પેરામેડિકલ ટીમો પણ આરોગ્ય સેવાઓમાં જોડાશે. આમ, કુલ 35 મેડિકલ ટીમો દ્વારા અંદાજે 223 તબીબી અને પેરામેડિકલ સ્ટાફના સહયોગથી ભાવિકોને આરોગ્ય સેવાઓ પૂરી પાડવામાં આવશે.
પરિક્રમા દરમિયાન કોઈ ભાવિકને વધુ સારવારની જરૂરિયાત ઊભી થાય તો તાત્કાલિક નજીકના દવાખાને અથવા જરૂર જણાય તો સિવિલ હોસ્પિટલમાં ખસેડી શકાય તે માટે 11 ઍમ્બ્યુલન્સ ઉપરાંત 108ની 4 ઍમ્બ્યુલન્સ પણ ચોવીસ કલાક ઉપલબ્ધ રહેશે.
ગિરનાર ગિરીવરની ગોદમાં કારતક સુદ-11થી કારતક સુદ-15 (પૂર્ણિમા) સુધી ગિરનારની લીલી પરિક્રમા યોજાનાર છે. આ પરિક્રમામાં મોટી સંખ્યામાં શ્રધ્ધાળુઓ સાથે રાજય-દેશમાંથી લાખોની સંખ્યામાં શ્રધ્ધાળુઓ અને સાધુ સંતો અને લાખોની સંખ્યામાં શ્રધ્ધાળુઓએ પાવનકારી લીલી પરિક્રમાનો પ્રારંભ કરતા જંગલ ભજન, ભકિત, ભોજન ત્રિવેણી સંગમથી ગુંજી ઉઠયું છે. આજે પણ લાખોની સંખ્યામાં ભાવિકો ઉમટશે.

