માલિક માટે બૂકિંગનો સ્લોટ મેળવવા AIએ વેઇટિંગ લિસ્ટમાં પ્રથમ સ્થાને રહેલાનું બૂકિંગ જ રદ કરી દીધુ
Sydney, તા.૧૨
ઓસ્ટ્રેલિયામાં એઆઈ (આર્ટિફિશિયલ ઇન્ટેલિજન્સ)નો ચોંકાવનારો મામલો સામે આવ્યો છે. આ કિસ્સામાં એઆઈ રીતસરનું દોઢડાહ્યુ થતાં તેને આપવામાં આવેલી સૂચનાનું પાલન કરવા માટે બધા નિયમોને ચાતરી ગયું હતું. તેના પરિણામે આ આખી ઘટના એઆઈ દ્વારા કોઈ વેબસાઇટ પર થયેલી સાઇબર હુમલાની પ્રારંભિક ઘટનાની એક ઘટના મનાય છે.આ વાત ઓસ્ટ્રેલિયાની ટેક કંપની એઆઈ અફિંડાના એઆઈ હેડ એન્ડ્રયુ બર્ડ સાથે જોડાયેલી છે. તેને એક લોકપ્રિય જિમ ક્લાસમાં જગ્યા જોઇતી હતી, પરંતુ ક્લાસ બહુ ઝડપથી ભરાઈ જતો હતો. તેના કારણે તેમણે પોતાના વ્યક્તિગત એઆઈ આસિસ્ટન્ટને આ કામ સોંપી દીધું. આ એઆઈ આસિસ્ટન્ટ ક્લાઉડ પર ચાલતું હતું.એઆઈએ બૂકિંગ સિસ્ટમ જોઈ અને જોયું કે વેબસાઇટના કેટલાક પ્રતિબંધો ફક્ત સામે દેખાતા હિસ્સામાં જ હતા. તેની પાછળની બાજુની સિસ્ટમમાં આવું કોઈ ચકાસણીનું સ્તર ન હતું. તેનો ફાયદો ઉઠાવીને એવો ક્લાસ બૂક કરી દીધો જે સામાન્ય રીતે તે આટલો વહેલા બૂક કરી શક્યા ન હોત.તેના પછી જ સાચો ખેલ શરુ થયો. એઆઈએ જોયું કે તેના માલિક વેઇટિંગ લિસ્ટમાં ચોથા નંબરે છે. તેમણે એઆઈને પૂછ્યું કે શું તે તેને આ લિસ્ટમાં ઉપર લાવી શકે છે. એઆઈએ સિસ્ટમનો ટેસ્ટ કરવાનો શરૂ કર્યો. આ દરમિયાન તેને ખબર પડી કે બીજા લોકોની બુકિંગ રદ કરવા માટે ઉપયોગમાં લેવાતા હિસ્સામાં જરુરી પરમિશનની ચકાસણી યોગ્ય રીતે થતી ન હતી. તેના પછી એઆઈએ વેઇટિંગ લિસ્ટમાં પહેલા નંબર પર હાજર વ્યક્તિની બુકિંગ રદ કરી દીધી. તેથી બર્ડ ચોથા નંબરથી ત્રીજા નંબર પર આવી ગયા. અહેવાલ મુજબ બર્ડે એઆઈને કોઈ ત્રીજી વ્યક્તિનું બૂકિંગ રદ કરવાનો સીધો આદેશ આપ્યો ન હતો. આમ છતાં એઆઈએ એવો રસ્તો પસંદ કર્યો જેનાથી તેને સોંપવામાં આવેલું કામ પૂરું કરી શકાય, પરંતુ આમા બીજી કોઈ વ્યક્તિને નુકસાન થઈ ગયું. બર્ડને જ્યારે ખબર પડી કે એઆઈએ બીજાનું બૂકિંગ રદ કર્યુ છે ત્યારે તેણે એઆઈને તેનું બૂકિંગ પાછું જેમ હતુ તેમ કરવા કહ્યુ. પરંતુ અહીં બીજી તકલીફ સામે આવી. એઆઈ એજન્ટ્સ તેણે જેનું નામ બૂકિંગમાંથી કાઢી નાખ્યું હતું તે પરત ન લાવી શક્યુ, કેમકે જે ખામી બૂકિંગ કેન્સલેશન સિસ્ટમમાં હતી તે ફરીથી બૂકિંગ કરવાની સિસ્ટમમાં ન હતી.આશ્ચર્યની વાત એ હતી કે એઆઈ પોતે જ બતાવતું હતું કે તેણે શું કર્યુ. એઆઈએ તેના પગલાં છૂપાવવાનો પ્રયત્ન પણ ન કર્યો. કેટલાક અહેવાલમાં આ ઘટનાને એઆઈ તરફથી કરાયેલો પ્રથમ સાઇબર હુમલો ગણાવાયો છે, પરંતુ આને કંઇ જટિલ કે એડવાન્સ હેકિંગ ન કહી શકાય. વાસ્તવિક તકલીફ જિમ બૂકિંગ સિસ્ટમની ખામીની હતી. એઆઈએ આ ખામી ઓળખી તેનો ઉપયોગ કર્યો. પહેલા કોઈ વેબસાઇટની નબળાઈનો ફાયદો ઉઠાવવા વ્યક્તિએ તે સિસ્ટમ સમજવી પડતી હતી, યોગ્ય પદ્ધતિ શોધવી પડતી હતી અને પછી પોતે કાર્યવાહી કરવી પડતી હતી. હવે એઆઈ એજન્ટ પોતે જ આવા કામ કરવા સમર્થ બની રહ્યા છે.
