ફિલ્મ ૧૧ સપ્ટેમ્બર ૨૦૨૬ના સિનેમાઘરોમાં રિલીઝ થશે : ફિલ્મમાં સૈફ અલી ખાન મુખ્ય પાત્રમાં હશે
Mumbai, તા.૭
ફિલ્મ ઇન્ડસ્ટ્રીમાં અમુક કલાકાર એવા છે જેમણે ફક્ત દર્શકોને જ મનોરંજન નથી આપ્યું, તેની સાથે તે તેમના જીવનનો ભાગ પણ બની ગયા હતા. સામાન્ય માણસ સામાન્ય દેખાતા પાત્રો સાથે જોડાવાનું પસંદ કરે છે. ‘શોલે’ ફિલ્મમાં જેલરનું પ્રખ્યાત પાત્ર ભજવનારા દિગ્ગ્જ કલાકાર અસરાની પણ એવા જ હતા. તેમણે મોટા ભાગના ચરિત્ર પાત્રો ભજવ્યા અને તે પાત્રોમાં પોતાના હ્યુમર દ્વારા તેને જીવંત કરીને જતા રહ્યા. જો કોઈ વ્યક્તિ ક્યારેક ખાલી સમયમાં ઉદાસ કે એકલું અનુભવે છે તો આજે પણ અસરાનીના સીન્સ તેના ચહેરા પર સ્મિત લાવી દે છે અને કોઈને પણ હસવા માટે મજબુર કરી શકે છે. આ એક દમદાર કલાકારની નિશાની છે. અસરાની પણ મહાન કલાકાર રહ્યા છે, પરંતુ તેઓ આ દુનિયામાંથી વિદાય લઇ ચુક્યા છે. અભિનેતાના મૃત્યુ બાદ તેમની અંતિમ ફિલ્મ ‘હેવાન’ જલ્દીથી સિનેમાઘરોમાં આવશે. અસરાની સાથે અક્ષય કુમારે ઘણી ફિલ્મો કરી છે. આ વર્ષે બંને ‘ભૂત બંગલા’ ફિલ્મમાં જોવા મળ્યા હતા, જે સારી ચાલી હતી. અસરાની, અક્ષય કુમાર અને પ્રિયદર્શનીની ‘તીગડી’એ કમાલ કરી હતી. અસરાનીના જીવનની અંતિમ ફિલ્મમાં પણ આ ત્રણેય સામેલ છે. એવામાં હવે અક્ષય કુમારે મહાન અભિનેતાને યાદ કર્યા અને ‘હેવાન’ની રિલીઝ પહેલા તેમની એક કલીપ પણ શેર કરી છે. ક્લિપમાં અસરાની અને શારિબ હાશ્મીનું પાત્ર એકબીજા સાથે વાત કરતું નજરે પડે છે. બંને વચ્ચેના કોમિક સંવાદો ફેન્સને પણ ખુબ પસંદ આવી રહ્યા છે. આ સાથે તેઓ આના પર પોતાની પ્રતિક્રિયાઓ પણ આપી રહ્યા છે. નાની કલીપની કોમિક તો છે જ પરંતુ સાથે જ આને જોઈને ચાહકો અસરાનીને લઈને ભાવુક પણ દેખાયા હતા. અક્ષય કુમારે આ વીડિયો શેર કરતા કેપ્શનમાં લખ્યું, ‘અમને આશ્ચર્ય છે કે અમને આ લેજન્ડ સાથે કામ કરવાની તક મળી અને તેમના જીવનના અંતિમ શોટને લાઈવ રેકોર્ડ થતા જોવાની તક પણ મળી. અસરાનીજી તમે ખૂબ યાદ આવશો. તમારા જેવું અન્ય કોઈ ન હોઈ શકે.’‘હેવાન’ની વાત કરીએ તો તે એક એક્શન-ક્રાઇમ-થ્રિલર ફિલ્મ છે. આ ફિલ્મમાં સૈફ અલી ખાન મુખ્ય પાત્રમાં જોવા મળશે. અક્ષય કુમાર મુખ્ય વિલનની ભૂમિકામાં છે. ફિલ્મનું નિર્દેશન પ્રિયદર્શનએ કર્યું છે. અસરાનીની વાત કરીએ તો ગયા વર્ષે ૮૪ વર્ષની ઉંમરમાં તેમનું નિધન થયું હતું. અસરાની અને અક્ષય કુમારની જોડીએ પણ ધૂમ મચાવી દીધી હતી. બંને કલાકારોએ સાથે ‘હેરાફેરી’, ‘આવારા પાગલ દીવાના’, ‘ગરમ મસાલા’, ‘દીવાને હુએ પાગલ’, ‘ભાગમભાગ’, ‘વેલકમ‘, ‘ભૂલભૂલૈયા’, ‘ભૂત બંગલા’ અને ‘ખાટ્ટા મીઠા’ જેવી ફિલ્મોમાં સાથે કામ કર્યું છે. ‘હેવાન’ની વાત કરીએ તો આ ફિલ્મ ૧૧ સપ્ટેમ્બર ૨૦૨૬ના સિનેમાઘરોમાં રિલીઝ થશે.
