Gandhinagar,તા.૨૭
વડાપ્રધાન નરેન્દ્ર મોદીના ’સહકારથી સમૃદ્ધિ’ ના વિઝનને પરિવહન અને મોબીલિટી ક્ષેત્રે વિસ્તારવાની દિશામાં આ એક અત્યંત મહત્વપૂર્ણ પગલું છે. ભારત ટેક્સી સહકારિતાના સિદ્ધાંતો પર આધારિત એક ડિજિટલ મોડલ છે, જે ’સારથી જ માલિક’ ની વિભાવનાને સાકાર કરે છે. આ મોડલ હેઠળ ડ્રાઇવર માત્ર એક સેવા પ્રદાતા નથી, પરંતુ પ્લેટફોર્મના ભાગીદાર અને માલિક પણ છે. આનાથી તેમને આર્થિક સશક્તિકરણ, સામાજિક સુરક્ષા અને માલિકીનો લાભ મળે છે.
ગુજરાતના ૧૪ પ્રમુખ શહેરોમાં શરૂઆત થશે જેમાં અમદાવાદ, સુરત,વડોદરા,રાજકોટ,જામનગર,ભાવનગર,જૂનાગઢ,દ્વારકા,સોમનાથ,વલસાડ આણંદ,નડિયાદ,મહેસાણા,અમરેલી છે
આગામી એક મહિનાની અંદર સમગ્ર ગુજરાત રાજ્યમાં આ સેવાઓ ઉપલબ્ધ કરાવવાનું લક્ષ્ય નિર્ધારિત કરવામાં આવ્યું છે. ઉલ્લેખનીય છે કે, ગુજરાતમાં ભારત ટેક્સીનું સોફ્ટ-લોન્ચિંગ ડિસેમ્બર ૨૦૨૫ માં કરવામાં આવ્યું હતું.
ભારત ટેક્સીની વિશેષતાઓ અને લાભો જોઇએ તો
ઝીરો-કમિશન મોડલઃ પ્લેટફોર્મ ઝીરો કમિશન મોડલ પર કામ કરે છે, જેથી કમાણીનો મહત્તમ લાભ સીધો ડ્રાઇવરોને જ મળે છે.
સામાજિક સુરક્ષાઃ ડ્રાઇવરોને વીમો, લોન, પેન્શન અને વિવિધ સરકારી યોજનાઓનો લાભ પૂરો પાડવામાં આવે છે.
નોંધણીઃ આ સંસ્થા ૬ જૂન ૨૦૨૫ ના રોજ સ્થપાઈ હતી અને ’મલ્ટી-સ્ટેટ કોઓપરેટિવ સોસાયટી એક્ટ, ૨૦૦૨’ હેઠળ નોંધાયેલી છે.
ગ્રાહકો (મુસાફરો) માટે..
સર્જ-ફ્રી પ્રાઇસિંગઃ ગ્રાહકોને માંગ વધવા પર ભાડામાં થતા અચાનક વધારા (સર્જ પ્રાઇસિંગ) થી મુક્તિ મળશે.
સુરક્ષિત મુસાફરીઃ ગુજરાત પોલીસના સીધા સહયોગથી ગ્રાહકો માટે સુરક્ષિત અને ભરોસાપાત્ર યાત્રા સુનિશ્ચિત કરવામાં આવી છે.
વિવિધ વિકલ્પોઃ મુસાફરો પોતાની સુવિધા મુજબ બાઇક, ઓટો અને કેબ સહિતના પરિવહન વિકલ્પોની પસંદગી કરી શકે છે.
દેશમાં સહકારિતા આંદોલનમાં અગ્રણી ભૂમિકા ભજવતા ગુજરાતે ભારત ટેક્સીના વિસ્તરણમાં નોંધપાત્ર પ્રગતિ કરી છે. સમગ્ર દેશમાં અત્યાર સુધીમાં કુલ ૭ લાખ સારથીઓ આ પ્લેટફોર્મ સાથે જોડાયા છે, જેમાંથી માત્ર ગુજરાતના જ ૧.૫ લાખથી વધુ સારથીઓ છે. સમગ્ર ભારતમાં અત્યાર સુધીમાં ૩૭ લાખથી વધુ ગ્રાહકોએ ભારત ટેક્સી સેવાનો લાભ ઉઠાવ્યો છે.
