(નયના દવે દ્વારા)
Jamnagar,તા.૧૧
જામનગર તાલુકાના મોટી ખાવડી ગામના આંબાવાડી વિસ્તારમાં જાહેરમાં તીનપત્તી રોન પોલીસ નામનો જુગાર રમાતો હોવાની બાતમીના આધારે મેઘપર (પડાણા) પોલીસે દરોડો પાડ્યો હતો. પોલીસે જુગાર રમતા પાંચ શખ્સોને ઝડપી પાડી તેમની પાસેથી તથા જુગારના સ્થળેથી કુલ રૂ.૧૨,૮૦૦ની રોકડ રકમ અને ગંજીપત્તાના પાના કબજે કર્યા હતા.
મેઘપર (પડાણા) પોલીસ સ્ટેશનના પોલીસ હેડ કોન્સ્ટેબલ લાખનસિંહ ગુલાબસિંહ જાડેજા તથા પોલીસ સ્ટાફ પેટ્રોલિંગમાં હતો ત્યારે મોટી ખાવડી રેલવે ફાટક પાસે બાતમી મળી હતી કે, આંબાવાડી વિસ્તારમાં પ્રકાશભાઈ કાનાભાઈ પરમારના ઘરની બહાર જાહેરમાં કેટલાક ઇસમો ગંજીપત્તાના પાનાથી તીનપત્તી રોન પોલીસ નામનો જુગાર રમી પૈસાની હારજીત કરી રહ્યા છે. જેથી પંચોને સાથે રાખી સ્થળથી દૂર રહી ખાતરી કર્યા બાદ સાંજે સાડા ચાર વાગ્યે દરોડો પાડવામાં આવ્યો હતો.
દરોડા દરમિયાન વિપુલભાઈ બોધાભાઈ રાઠોડ (૩૩), જયશ્રીબેન પ્રકાશભાઈ પરમાર (૩૬), જલુબેન કાનાભાઈ કરશનભાઈ પરમાર (૭૨), જ્યોત્સનાબેન મનસુખભાઈ મોહનભાઈ પરમાર (૫૫) અને મુક્તાબેન પરષોતમભાઈ કરશનભાઈ પરમાર (૬૦) ઝડપાઈ આવ્યા હતા. પોલીસે તેમની પાસેથી અલગ અલગ રકમ મળી કુલ રૂ.૧૧,૮૫૦ તથા જુગારના સ્થળેથી પટમાંથી રૂ.૯૫૦ મળી કુલ રૂ.૧૨,૮૦૦ની રોકડ રકમ કબજે કરી હતી. ઉપરાંત ગંજીપત્તાના પાના પણ કબજે કરવામાં આવ્યા હતા.આ મામલે જુગારધારા કલમ ૧૨ મુજબ ગુનો નોંધવામાં આવ્યો છે. પોલીસે આરોપી વિપુલભાઈ રાઠોડની ધરપકડ કરી હતી, જ્યારે જયશ્રીબેન પરમાર, જલુબેન પરમાર, જ્યોત્સનાબેન પરમાર અને મુક્તાબેન પરમારને ધોરણસરની નોટિસ આપવામાં આવી હતી.
