Gondal. તા.4
ગોંડલમાં એટીએમ મશીનમાં રૂપીયા ઉપાડવાની મદદના બહાને ફ્રોડ આચરતાં શખ્સો બેફામ બન્યા છે ત્યારે નગરપાલિકાના મહિલા કર્મીને એટીએમમાંથી તમને રૂપીયા ઉપાડવા મદદ કરું કહી ગઠિયાએ કાર્ડ બદલાવી નાંખી 40 હજાર ઉપાડી લેતાં ગોંડલ પોલીસે ગુનો નોંધી આરોપીની શોધખોળ આદરી હતી.
બનાવ અંગે ગોંડલમાં બાપા સીતારામ ચોકની બાજુમાં મોહન પાર્કમાં રહેતાં રશીલાબેન કાંતીભાઇ રૈયાણી (ઉ.વ.57) એ નોંધાવેલ ફરીયાદમાં જણાવ્યું હતું કે, તેઓ ગોંડલ નગરપાલીકામા નોકરી કરે છે. ગઇ તા. 25 ના રોજ સવારના આશરે સાડા દશેક વાગ્યે તેઓને એસબીઆઇ બેંકમા એકાઉન્ટ હોય જેનુ એ.ટી.એમ.કાર્ડ લઇ પૈસા ઉપડવા માટે કડીયા લાઇનમાં આવેલ એસબીઆઈ બેંકના એ.ટી.એમ.માં ગયેલ ત્યારે ત્યાં એ.ટી.એમ.માં દશેક માણસો હતા.
થોડીવારમાં મારો વારો આવી જતા તેઓ એ.ટી.એમ કાર્ડ મશીનમા નાખી પૈસા ઉપડવા માટે ટ્રાય કરતી હતી, પરંતુ પૈસા ઉપડતા ના હોય જેથી પાછળથી એક અજાણ્યો માણસ પાસે આવેલ અને કહેલ કે, લાવો તમા એ.ટી.એમ. કાર્ડ હુ તમને તમારા પૈસા ઉપાડી દઉં, જેથી તેને એ.ટી.એમ.કાર્ડ આપેલ અને તેણે બે-ત્રણ વાર ટ્રાય કરેલ પછી કહેલ કે, તમારા મોબાઇલમાં ઓટીપી પાસવર્ડ આવેલ હશે તે આપો.
જેથી તેને ઓટીપી આપેલ બાદ તે અજાણ્યા માણસે બે-ત્રણ વાર પૈસા ઉપાડવાની ટ્રાય કરેલ બાદ કહેલ કે, આ લ્યો તમાર એ.ટી.એમ. કાર્ડ અને તમારા એકાઉન્ટમાંથી પૈસા ઉપડતા નથી તમે બેંકમાં જઈ પુછી લો.
જેથી તેઓ બેંકમા ગયેલ અને એ.ટી.એમ. કાર્ડ બતાવતા જાણવા મળેલ કે, આ એ.ટી.એમ. કાર્ડ તેમનું નથી, તેઓનું એ.ટી.એમ. કાર્ડ કોઈ અજાણ્યો માણસ બદલાવીને લઇ ગયેલ છે, ત્યારે તેમના મોબાઇલમાં એકાઉન્ટમાંથી પૈસા ઉપડેલ હોય તેના મેસેજ આવવા લાગેલ હતાં. તેમના ખાતામાંથી રૂ.40 હજાર ઉપડી ગયેલ હતા. બનાવ અંગેની ફરીયાદ પરથી ગોંડલ સીટી પોલીસે ગુનો નોંધી અજાણ્યા શખ્સને પકડવા ચક્રો ગતિમાન કર્યા છે.
