મોરબીમાં મચ્છુ ૩ ડેમમાં ગઈકાલે ગણેશ વિસર્જન કરવા ગયેલા ચાર યુવાનો પાણીમાં ડૂબી ગયા હતા
Gandhinagar, તા.૨૬
ગુજરાતના વિવિધ વિસ્તારોમાં ધામધૂમથી ગણપતિ વિસર્જનનો પ્રસંગ ઉજવવામાં આવ્યો હતો. પરંતુ આ દરમિયાન પાણીમાં ડૂબી જવાના કારણે ૧૦ લોકોના મોત નિપજ્યા છે. સુરત, ધોળકા અને મોરબી જિલ્લામાં આ કરુણ ઘટનાઓ ઘટી છે. બીજી તરફ અમરેલી જિલ્લાના બાબરામાં આજે બપોરે ગણપતિ વિસર્જન કરવા ગયેલા લોકોને ચેકડેમમાંથી ચાર મૃતદેહો મળી આવતા ચકચાર મચી ગઈ છે. અલબત, આ ચારેય લોકો નાવા જતા ડૂબ્યા હોવાનું પ્રાથમિક અનુમાન છે.
કામરેજ તાલુકાના ધોરણ પારડી ગામે સાંજે તાપી નદીના કિનારે વિસર્જન અર્થે ગયેલી હોડી અચાનક પલટી મારી જતા ૫ લોકો પાણીમાં ગરકાવ થઈ ગયા હતા. જેમાં મેર રાજુભાઈ લાલાભાઈ (ઉં.વ.૨૧), શિયાળિયા દાનાભાઈ સુખાભાઈ (ઉં.વ.૨૬) અને સાદુલભાઈ ભુલાભાઈ મેર (ઉં.વ.૨૩) (ત્રણેય રહે.ગુરુકૃપા સોસાયટી, ખોલવડ, કામરેજ, જી.સુરત)ના ડૂબી જવાના કારણે મૃત્યુ નિપજ્યા છે. માંગરોળના લિડીયાત અને કુંવરદા ગામે તેમજ ઓલપાડ તાલુકાના દિહેણ ગામે પણ ગણપતિ વિસર્જન દરમિયાન ત્રણ વ્યક્તિઓ ડૂબી ગયા હોવાની ઘટનાઓ નોંધાઈ છે.બગોદરા-શિયાળ રોડ પર આવેલ થાળાવાળી પાણીની દીરમાં ગણપતિ વિસર્જન બાદ નાહવા પડેલા બે કિશોરો ડૂબવાની ઘટના સામે આવી છે.
બગોદરાના રહેવાસી મહાવીરસિંહ ગંભુભાઈ ચૌહાણ અને હર્ષરાજસિંહ વિજયસિંહ ચૌહાણ નામના કિશોરો શ્રીજીની પ્રતિમા પધરાવવા ગયા હતા. વિસર્જન કર્યા બાદ બંને કિશોરો પાણીમાં નાહવા પડતાં ઊંડા પાણીમાં જવાથી ડૂબવા લાગ્યા હતા.આ દરમિયાન મહાવીરસિંહ ચૌહાણને તરતાં આવડતું હોવાથી તેમનો આબાદ બચાવ થયો હતો, જ્યારે હર્ષરાજસિંહ ચૌહાણ ઊંડા પાણીમાં ગરકાવ થઈ જતાં ગુમ થયા હતા.મોરબીમાં મચ્છુ ૩ ડેમમાં ગઈકાલે ગણેશ વિસર્જન કરવા ગયેલા ચાર યુવાનો પાણીમાં ડૂબી ગયા હતા. મોરબી ફાયર ટીમને કોલ મળતા તુરંત રેસ્ક્યુ શરૂ કરી ૨ને બચાવી લીધા હતા. બીજા ૨ યુવાનોના મૃતદેહ આજે મળી આવ્યા છે. ગણેશ વિસર્જનના પર્વ પહેલાં જ બાબરા તાલુકાના મોટા દેવળિયા ગામે બનેલી હૃદયદ્રાવક ઘટનામાં મોટા દેવળિયા અને ધરાઈ દેવળિયા વચ્ચે દશામાના મંદિર પાછળ આવેલા ચેકડેમમાં નાહવા પડેલા કાકા-ભત્રીજા અને બે ભાણેજ સહિત ચાર યુવકોના ડૂબી જવાથી મોત નીપજતાં પરિવારમાં કરુણ કલ્પાંત મચી ગયો હતો. ગણપતિ વિસર્જન માટે આવેલા લોકોએ કાંઠે કપડા જોયા બાદ શંકા જતા ગ્રામજનોને જાણ કરી હતી. જેના પગલે આ ઘટના સામે આવી છે.
