Jamnagar,તા.૧૮
ગુજરાતમાં ચાંદીપુરા વાયરસને લઈને ચિંતા વચ્ચે હવે જામનગરમાંથી પણ ત્રણ શંકાસ્પદ કેસ સામે આવ્યા છે. શહેરના બે દર્દી ઉપરાંત દ્વારકાથી એક દર્દીને જામનગરની જીજી હોસ્પિટલમાં ખસેડવામાં આવ્યો છે. ત્રણેય દર્દીઓની હાલત ગંભીર હોવાનું જણાવવામાં આવ્યું છે. ઘટનાને પગલે આરોગ્ય વિભાગમાં દોડધામ મચી ગઈ છે અને સંભવિત રોગચાળો ફેલાતો અટકાવવા માટે તંત્ર દ્વારા સર્વેલન્સ અને સાવચેતીના પગલાં વધુ કડક કરવામાં આવ્યા છે. એકસાથે ત્રણ કેસ સામે આવતા આરોગ્ય વિભાગે તાત્કાલિક કાર્યવાહી શરૂ કરી છે.
અધિકારીઓના જણાવ્યા મુજબ ત્રણેય દર્દીઓની સ્થિતિ ગંભીર હોવાથી તેમને જીજી હોસ્પિટલના વિશેષ વોર્ડમાં દાખલ કરવામાં આવ્યા છે. નિષ્ણાત ડૉક્ટરોની ટીમ સતત સારવાર આપી રહી છે અને દર્દીઓની સ્થિતિ પર નજીકથી નજર રાખવામાં આવી રહી છે. જામનગરની જીજી હોસ્પિટલમાં દર્દીઓ માટે વિશેષ સારવારની વ્યવસ્થા કરવામાં આવી છે. જરૂરી મેડિકલ તપાસ, લેબોરેટરી સેમ્પલિંગ અને અન્ય સારવાર પ્રક્રિયા ઝડપથી હાથ ધરવામાં આવી રહી છે. આરોગ્ય વિભાગ દ્વારા દર્દીઓના સંપર્કમાં આવેલા લોકો પર પણ નજર રાખવામાં આવી રહી છે.
આરોગ્ય વિભાગે સંભવિત ચેપને રોકવા માટે અસરગ્રસ્ત વિસ્તારોમાં સર્વેલન્સ વધાર્યું છે. આરોગ્ય ટીમો દ્વારા લોકોને જાગૃત કરવામાં આવી રહ્યા છે અને જરૂરી હોય ત્યાં ફોગિંગ, સ્વચ્છતા અભિયાન તેમજ જીવાત નિયંત્રણની કામગીરી પણ હાથ ધરવામાં આવી રહી છે. આરોગ્ય વિભાગે લોકોને અપીલ કરી છે કે જો બાળકો કે અન્ય કોઈ વ્યક્તિમાં તાવ, ઉલ્ટી, આંચકી આવવી, બેભાન થવું અથવા મગજ સંબંધિત ગંભીર લક્ષણો જોવા મળે તો વિલંબ કર્યા વગર નજીકના આરોગ્ય કેન્દ્ર અથવા હોસ્પિટલમાં સારવાર માટે પહોંચવું જોઈએ. સમયસર સારવાર ગંભીર પરિસ્થિતિ ટાળવામાં મદદરૂપ બની શકે છે.
