New Delhi તા, ૧૯
ભારતીય ક્રિકેટ ટીમે શ્રીલંકા સામેની બે ટેસ્ટ મેચોની શ્રેણીની પ્રથમ મેચમાં 165 રને શાનદાર વિજય મેળવીને 1-0ની સરસાઈ હાસિલ કરી લીધી છે. ગોલ ખાતે રમાયેલી આ ટેસ્ટ મેચના પાંચમાં અને અંતિમ દિવસે ભારતીય બોલરોએ યજમાન ટીમને બીજી ઇનિંગ્સમાં માત્ર 206 રનમાં ઓલઆઉટ કરી દીધી હતી. 372 રનનાં મુશ્કેલ લક્ષ્યાંકનો પીછો કરવા ઉતરેલી શ્રીલંકન ટીમ ભારતીય સ્પિન એટેક સામે ટકી શકી નહોતી.
આ જીતનો મુખ્ય હીરો ભારતનો યુવા ડાબોડી સ્પિનર માનવ સુથાર રહ્યો, જેણે પોતાની બીજી જ ટેસ્ટ મેચમાં શ્રેષ્ઠ પ્રદર્શન કરતાં મેચમાં કુલ 10 વિકેટ ઝડપી હતી. તેણે બીજી ઇનિંગ્સમાં 55 રન આપીને 6 વિકેટ ઝડપી, જે તેની કારકિર્દીની પ્રથમ ‘ફાઇવ વિકેટ હોલ’ (એક ઇનિંગ્સમાં 5 વિકેટ) છે. સુથારે મેચની પ્રથમ ઇનિંગ્સમાં પણ 76 રન આપીને 4 મહત્વપૂર્ણ વિકેટો ઝડપી હતી.
આ અગાઉ મેચનાં પાંચમાં દિવસે શ્રીલંકાના કેપ્ટન ધનંજય ડી સિલ્વા (59 રન) અને સોનલ દિનુશા (84 રન) એ ભારતીય બોલરોનો મક્કમતાથી સામનો કરીને મોટી ભાગીદારી કરી હતી. પરંતુ રવીન્દ્ર જાડેજાએ શ્રીલંકન કેપ્ટન ધનંજયને આઉટ કરીને આ જોડી તોડી હતી. જાડેજાએ બીજી ઇનિંગ્સમાં 16 રન આપીને 2 વિકેટ ઝડપીને સુથારનો સારો સાથ આપ્યો હતો.
લંચ પછીના સેશનમાં માનવ સુથારે તરખાટ મચાવતા શ્રીલંકાની નીચલી ઓર્ડરની વિકેટો ઝડપથી ઉખાડી ફેંકી હતી અને ટીમને આસાનીથી જીત તરફ દોરી ગયો હતો. પ્રથમ ઇનિંગ્સમાં ભારતના 462 રનના જવાબમાં શ્રીલંકા પ્રથમ ઇનિંગ્સમાં 284 રન જ બનાવી શક્યું હતું. ભારતની આ શાનદાર જીતથી વર્લ્ડ ટેસ્ટ ચેમ્પિયનશિપની પોઇન્ટ્સ ટેબલમાં પણ ભારતીય ટીમની સ્થિતિ વધુ મજબૂત બની છે.
માનવ સુથારે રચ્યો ઇતિહાસ
ભારતનાં 24 વર્ષીય યુવા ડાબોડી સ્પિનર માનવ સુથારે પોતાની કારકિર્દીની બીજી જ ટેસ્ટ મેચમાં શાનદાર પ્રદર્શન કરીને ક્રિકેટ જગતમાં સનસનાટી મચાવી દીધી છે. તેણે મેચની બંને ઇનિંગ્સમાં થઈને કુલ 10 વિકેટ ઝડપી હતી,જેમાં બીજી ઇનિંગ્સમાં માત્ર 55 રન આપીને લીધેલી 6 વિકેટ પણ સામેલ છે. બીજી ઇનિંગ્સ દરમિયાન તેણે સતત એક જ ઓવરમાં ત્રણ બેટ્સમેનોને પેવેલિયન ભેગા કરીને પોતાની બોલિંગની ધાર સાબિત કરી બતાવી હતી. તેની આ વિકેટ લેવાની અદ્ભુત ક્ષમતાને કારણે તેને ભારતીય ક્રિકેટમાં રવીન્દ્ર જાડેજાના ઉત્તરાધિકારી તરીકે પણ જોવામાં આવી રહ્યો છે.
ગોલના ઐતિહાસિક મેદાન પર 10 વિકેટ હોલ (મેચમાં 10 વિકેટ) પૂરી કરનારો માનવ સુથાર રવિચંદ્રન અશ્વિન અને હરભજન સિંહ પછી ત્રીજો ભારતીય બોલર બની ગયો છે. આ ઉપરાંત, આ મેદાન પર 10 કે તેથી વધુ વિકેટ ઝડપનારો તે ઓસ્ટ્રેલિયાનાં મિચેલ સ્ટાર્ક (2016) પછી વિશ્વનો બીજો વિદેશી ડાબોડી બોલર બનવાની સિદ્ધિ પણ પોતાના નામે કરી છે.
